ޕާޓާގެ ބޯޑު މެންބަރަކަށް ޝިއުރީ

ޓޫރިޒަމް ދާއިރާގެ އޭޝިއާ ސަރަހައްދުގެ އެންމެ ބޮޑު އެއް ޖަމިއްޔާ، ޕެސިފިކް އޭޝިއާ ޓްރެވަލް އެސޯސިއޭޝަން (ޕާޓާ)ގެ ބޯޑު މެންބަރު ކަމަށް އެމްއެމްޕީއާރްސީގެ މެނޭޖިން ޑިރެކްޓަރު އިބްރާހިމް ޝިއުރީ ހޮވިއްޖެ އެވެ.

ޕާޓާގެ ބޯޑު މެންބަރުންނަކީ، އެ ޖަމިއްޔާ ހިންގުމުގައި އެންމެ އިސްކޮށް ހަރަކާތްތެރިވާ މެންބަރުންނެވެ. އެ ބޯޑު މެންބަރުން ހޮވަނީ، މެންބަރުން ނޮމިނޭޓް ކުރާ ބޭފުޅުންގެ މެދުގައި މެންބަރު ގައުމުތަކުން ވޯޓު ނަގައިގެންނެވެ.

ޕާޓާގެ ބޯޑުގައި ހަތް މެންބަރުން ތިބެ އެވެ. ޝިއުރީގެ އިތުރުން ދެން ތިބީ، ކޮރެއާ، ހޮންގްކޮންގް، ތައިލެންޑް، ޗައިނާ، ސައުދީ އަރަބިއްޔާ އަދި ޓައިވާންގެ ބޭފުޅުންނެވެ.

ޕާޓާ އުފެއްދީ 1951 ވަނަ އަހަރު އެވެ. ޓޫރިޒަމް ދާއިރާގެ ތަފާތު ހަރަކާތްތަކެއް ކޮންމެ އަހަރަކު ވެސް ހިންގާ އެ ޖަމިއްޔާގައި 95 ގައުމެއް ބައިވެރިވެ އެވެ. އެ ޖަމިއްޔާ އިން އެނުއަލް ސަމިޓް އެންޑް ޓްރެވަލް މާޓަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ ޓްރެވަލް އިވެންޓެކެވެ. އެ ޖަމިއްޔާއިން އަންނަނީ ޓޫރިޒަމް ދާއިރާއާ ގުޅޭ މުހިއްމު އެވޯޑުތަކެއް ވެސް ދެމުންނެވެ.

ޝިއުރީ ވިދާޅުވީ، ޕާޓާގެ ބޯޑު މެންބަރަކަށް ވުމުން، ރާއްޖޭގެ ޓޫރިޒަމް އިތުރަށް ފުޅާކޮށް ޕްރޮމޯޓު ކުރެވޭނެ ކަމަށެވެ. އެ ޖަމިއްޔާގެ ދަށުން 27 އެއާލައިން ހިމެނޭ އިރު ގިނަ ގައުމުތަކެއްގެ ޓްރެވަލް އޭޖެންސީތަކުން ވެސް މަސައްކަތް ކުރަމުން އަންނަ ކަމަށާއި، އެފަރާތްތަކާ އެކު ރާއްޖޭގެ ޓޫރިޒަމް ޕްރޮމޯޓު ކުރުމުގެ ހަރަކާތްތައް އިތުރަށް ފުޅާ ކުރެވޭނެ ކަމަށް އޭނާ ވިދާޅުވި އެވެ.