ލޭންޑްމާކް ޑިޒައިން ކޮށްގެން 20،000ރ. ހޯދުމުގެ ފުރުސަތު

އެމްއެމްޕީއާރުސީން ދިވެހިންނަށް ހާއްސަކޮށްގެން ލޭންޑްމާކް ފަރުމާ ކުރުމުގެ މުބާރާތެއް ބޭއްވުމަށް އިއުލާން ކޮށްފި އެވެ.

އެ އިދާރާ އިން މިއަދު ބުނީ، ލޭންޑްމާކް ބެހެއްޓުމަށް ރޭވިފައި ވަނީ ވެލާނާ އިންޓަނޭޝަނަލް އެއާޕޯޓާއި މާލެ އާއި ކަނޑުއަޑި އަދި ތަފާތު ރަށްރަށުގަ އެވެ.

މިއީ ރާއްޖޭގެ ހިތްގައިމުކަން ދައްކުވައިދިނުމާއި ދިވެހިންގެ ފަންނުވެރިކަން ދައްކައިލުމަށާއި ޓޫރިޒަމުން ރާއްޖެ އިން ލިބެން ހުރި ތަފާތު ތަޖުރިބާތައް އިތުރު ކުރުމުގެ މަގުސަދުގައި ބާއްވާ މުބާރާތެއް ކަމަށް އެމްއެމްޕީއާރުސީން ބުންޏެވެ.

އުމުރުން 18 އަހަރުން މަތީގެ ހުރިހާ ދިވެހިންނަށް އެ މުބާރާތުގައި ބައިވެރިވެވޭނެ އެވެ. އެކިއެކި ރަށްތަކާއި ސަރަހައްދުތަކުގެ މުއްސަނދި ތަރިކަ އާއި ސަގާފަތާއި ހިތްގައިމު ގުދުރަތީ ރީތިކަން ދައްކުވައިދޭ ފަރުމާތައް ހުށަހެޅޭނެ ކަމަށް ވެސް އެމްއެމްޕީއާރްސީއިން ބުންޏެވެ.

މުބާރާތުގެ އެންމެ މޮޅު 10 ޑިޒައިން ހޮވާނީ ޓެކްނިކަލް ޖަޖުންގެ ޕެނަލެއްގެ އިވެލުއޭޝަނާއި އާންމުންގެ ވޯޓާ އެއްކޮށްގެންނެވެ. މުބާރާތުގެ އެންމެ މަތިން މާކްސް ލިބޭ 10 މީހަކަށް 20،000ރ. ގެ ފައިސާގެ އިނާމަކާއި ސްޕޮންސަރުންގެ ގިފްޓް ޕެކެއް ވެސް ލިބޭނެ އެވެ. ހޮވޭ އެންމެ މޮޅު 10 ޑިޒައިން އެމްއެމްޕީއާރުސީގެ މާކެޓިން ހަރަކާތްތަކުގައި ބޭނުން ކުރުމަށް ހަމަޖެހިފައިވަނީ ފަރުމާކުރި ފަރާތްތަކަށް ކްރެޑިޓް ދީގެންނެވެ.

ދެމެހެއްޓެނިވި ތަކެތި ބޭނުންކޮށްގެން ޑިޒައިންތައް ހަދަން ވާނީ އުސްމިނުގައި 20 ފޫޓު ހުންނަ ގޮތަށެވެ. ކޮންމެ ލޭންޑްމާކެއް ވެސް ޑިޒައިން ކުރަން ޖެހެނީ، ދިވެހި ތާރީހާއި އެ ރަށެއް ނުވަތަ ސަރަހައްދެއްގެ ތަފާތު ސިފަތައް ހިމަނައިގެންނެވެ. އުފެއްދުންތެރިކަމާއި ރައްކާތެރިކަމާއި ވިޝުއަލް އެޕީލް އަދި ދިގު މުއްދަތަކަށް ދެމިހުންނާނެ ފަދަ ޑިޒައިންތަކަށް ޖަޖިން ޕެނަލް އިން އިސްކަން ދޭނެ ކަމަށް އެމްއެމްޕީއާރުސީ އިން ބުންޏެވެ.

މުބާރާތުގައި ބައިވެރިވާން ބޭނުންވާ މީހުން އަންނަ މަހުގެ 30 ގެ ކުރިން އެމްއެމްޕީއާރުސީ އަށް އީމެއިލް ކުރުމަށް ވަނީ އެދިފަ އެވެ. އީމެއިލް ފޮނުވާނީ contest@visitmaldives.com އަށެވެ.

ކޮންމެ ބައިވެރިއަކަށް ވެސް ހުށަހެޅޭނީ އެއް ލޭންޑްމާކްގެ ފަރުމާ އެކެވެ. ހުށަހެޅުންތައް ހުންނަން ވާނީ ކެޑް އަދި ޕީޑީއެފް ފޯމެޓްގައި ސާފު ޑައިމެންޝަންތަކެއް ބަޔާންކޮށްފައިވާ ގޮތަށް ކަމަށް އެމްއެމްޕީއާރުސީން ބުންޏެވެ. މުބާރާތުގައި ބައިވެރިވުމަށް ލޭންޑްމާކް ހުށަހަޅާފައިވާ ތަނުގެ ވިޝުއަލް ރިޕްރެޒެންޓޭޝަނަކާއި (އޮޕްޝަނަލް) ފުރިހަމަ އެޕްލިކޭޝަން ފޯމަކާއި ސައްހަ އައިޑީއެއްގެ ކޮޕީއެއް ހުށަހަޅަން ޖެހެ އެވެ.