ރާއްޖޭގެ އެންމެ ބޮޑު ސްޕޯޓްސް ފިޝިން މުބާރާތް ވިޒިޓް މޯލްޑިވްސް ކްލަބުން ބާއްވަނީ

ވިޒިޓް މޯލްޑިވްސް ކްލަބް (ވީއެމްސީ) އިން ރާއްޖޭގައި ބާއްވާ އެންމެ ބޮޑު ސްޕޯޓް ފިޝިން މުބާރާތް، "ބުރުނު ބޮމަ" ރަސްމީކޮށް އިފްތިތާހުކޮށްފި އެވެ.

ޓޭބަލް ޓެނިސް ހޯލުގައި އޮތް ރަސްމިއްޔާތެއްގައި ފިޝިން އަދި އޯޝަން ރިސޯސަސް މިނިސްޓަރު އަހްމަދު ޝިޔާމް ވަނީ މުބާރާތުގެ ނަން އިފްތިތާހްކޮށް ދެއްވައިފަ އެވެ. އަދި އެ ރަސްމިއްޔާތުގައި "ބުރުނު ބޮމަ" މައިކްރޮސައިޓް ތައާރަފްކޮށް، މުބާރާތުގައި ދޭން ހަމަޖެހިފައިވާ ޑިޖިޓަލް ޝީލްޑް ވަނީ ދައްކާލައިފަ އެވެ.

ވީއެމްސީން ސިފަކުރި ގޮތުގައި، "ބުރުނު ބޮމަ" މުބާރާތަކީ ރާއްޖޭގައި ސްޕޯޓްސް ޓޫރިޒަމް ކުރިއަރުވަން އެޅުނު މުހިންމު ފިޔަވަޅެކެވެ. އަދި މި މުބާރާތަކީ ރާއްޖެއިން ދެމެހެއްޓެނިވި މަސްވެރިކަމުގެ އާދަތަކަށް ދޭ އަހައްމިއްޔަތުކަން ދައްކައިދޭނެ ކަމެއް ކަމަށް ވެސް ބުންޏެވެ.

"ބުރުނު ބޮމަ" މުބާރާތް އިފްތިތާހުކުރުމުގެ ރަސްމިއްޔާތުގައި ފިޝިން އަދި އޯޝަން ރިސޯސަސް މިނިސްޓަރު އަހުމަދު ޝިޔާމް ވިދާޅުވީ ބުރުނު ބޮމަ މުބާރާތަކީ ވަރަށް މުހިންމު މުބާރާތެއް ކަމަށެވެ. އަދި މި މުބާރާތް އޮންނާނީ ކްރޮސްރޯޑުގައި ކަމަށާއި އެ ތަނުގައި މުބާރާތް ބާއްވަނީ އެ ތަނުގައި މެރީނާއެއް އޮތުމުން ކަމަށް ވިދާޅުވި އެވެ.

"މިގޮތަށް މެރީނާއެއްގައި ބާއްވާ ފުރަތަމަ ޓޯނަމަންޓަށް ބުރުނު ބޮމަ ވެގެންދާނެ. ބުރުނު ބޮމާގެ ސަބަބުން ރާއްޖެއަށް ސްޕޯޓް ފިޝިންއަށް ޒިޔާރަތްކުރާނެ ކަން ޔަގީން،" މިނިސްޓަރު ވިދާޅުވި އެވެ.

އެ ރަސްމިއްޔާތުގައި އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވަނީ މުބާރާތުގެ މެއިން އިވްންޓުގެ ކުރިން ފޯރިގަދަ އެތައް އިވެންޓުތަކެއް އޮންނާނެކަން އިއުލާނު ކުރައްވައިފަ އެވެ.

"އިންޓަނޭޝަނަލް ސްޕޯޓްސް ފިޝިން ފެސްޓިވަލެއްގެ ގޮތުގައި ކުރިއަށް އޮތް ތަނުގައި މި މުބާރާތް ފެނިގެންދާނީ. އަޅުގަނޑުމެންގެ އަމާޒަކީ، ދިވެހިރާއްޖެއަކީ ސްޕޯޓްސް ފިޝިންއަށް ލޯބިކުރާ ފަރާތްތަކަށް އެންމެ އެދެވޭ މަންޒިލަކަށް ހަދައި، ބައިނަލްއަގުވާމީ ޓޫރިޒަމްގެ ކަލަންޑަރުގައި ފާހަގަކޮށްލެވޭ ހަރަކާތެއްގެ ގޮތުގައި ހެދުން،" އޭނާ ވިދާޅުވި އެވެ.

ވިޒިޓް މޯލްޑިވްސް ކްލަބުގެ ރައީސް އަހުމަދު ސާއިފް ވިދާޅުވީ އެ މުބާރާތަކީ ކޮންމެ އަހަރަކު ވެސް ބާއްވާނެ ގޮތަކަށް ރާވާފައިވާ މުބާރާތެއް ކަމަށެވެ. އަދި އެ މުބާރާތަކީ ރާއްޖޭގެ ޓޫރިޒަމްގެ ސިނާއަތުގެ މުހިންމު އިވެންޓަކަށް ވާނެ ކަމަށް ވިދާޅުވި އެވެ.

އަންނަ އަހަރުގެ އޭޕްރިލް މަހާއި މޭ މަހު ބާއްވަން ހަމަޖެހިފައިވާ މި މުބާރާތަކީ މަސްވެރިކަން ކުރަން ޝައުގުވެރިކަން ހުންނަ ފަރާތްތަކާއި ރާއްޖޭގެ ޓޫރިޒަމް ސިނާއަތުގެ ބައިވެރިންނަށް އަމާޒުކޮށް ބާއްވާ މުބާރާތެކެވެ.

"ބުރުނު ބޮމަ" މުބާރާތުގައި އިސްކަންދޭނީ "ކެޗް އެންޑް ރިލީޒް" އުސޫލަށެވެ. މި މުބާރާތުގައި ކަނޑުގެ ރައްކާތެރިކަމަށް ވަރަށް ބޮޑު އަހައްމިޔަތެއް ދޭނެ އެވެ.

ވިޒިޓް މޯލްޑިވްސް ކްލަބުގެ އަމާޒަކީ ދެމެހެއްޓެނިވި އުސޫލުތަކުގައި ހިފަހައްޓައި ސްޕޯޓްސް ޓޫރިޒަމަށް ގައުމުގެ ގާބިލްކަން ހުރި މިންވަރު ދައްކުވައިދީ ޕްރިމިއާ ގްލޯބަލް މަންޒިލެއްގެ ގޮތުގައި ރާއްޖެ ޕްރޮމޯޓުކުރުމެވެ.