މަރުވެފައި އޮއްވާ ފެނުނު މީހެއްގެ ޕޯސްޓްމޯޓަމް ހަދަނީ

މާލޭގެ ގެއެއްގެ ތެރޭގައި މަރުވެފައި އޮއްވައި މިއަދު ހެނދުނު ފެނުނު މީހެއްގެ ޕޯސްޓްމޯޓަމް ހަދަން ފުލުހުން ނިންމައިފި އެވެ.

ފުލުހުން ބުނީ، އެލްސިއޯން ބޭކަރީ ކައިރީގައި ހުންނަ މ. ތަރިވިލާގޭ ހުސައިން އަހުމަދު، 41، އެ ގޭގެ ތެރޭގައި މަރުވެފައި އޮއްވައި ފެނިގެން އައިޖީއެމްއެޗަށް ގެންދިޔަ ކަމުގެ ރިޕޯޓް ހެނދުނު 9:53 ހާއިރު ލިބުނު ކަމަށެވެ.

އެ މަރާ ގުޅިގެން ބަލަންޖެހޭ ކަންތައްތަކެއް ހުރުމުން ޕޯސްޓްމޯޓަމް ހަދަން ނިންމީ ކަމަށް ފުލުހުން ބުންޏެވެ.

ހުސައިން އަހުމަދަކީ ތަފާތު އެކިއެކި މައްސަލަތަކާ ގުޅިގެން އެކި ފަހަރު މަތިން ހޯދަން ފުލުހުން ފޮޓޯއާ އެކު އާންމުކުރާ މީހެކެވެ. އެންމެ ފަހުން އޭނާ ހޯދަން ފުލުހުން އިއުލާންކުރީ މިދިޔަ އަހަރުގެ އޮކްޓޫބަރު މަހު އެވެ.