ގޯލްޑެން ގްލޯބްސްގައި ގިނަ އެވޯޑުތައް "އެމިލިއާ ޕެރޭޒް" އާއި "ޝޯގަން"އަށް

މި އަހަރުގެ ގޯލްޑެން ގްލޯބްސްގައި އެންމެ ގިނަ އެވޯޑުތައް ފިލްމުތަކުގެ ބައިން "އެމިލިއާ ޕެރޭޒް" އަށް އަދި ސީރީޒްތަކުގެ ބައިން "ޝޯގަން"އަށް ލިބިއްޖެ އެވެ.

ގޯލްޑެން ގްލޯބްސް ބޭއްވީ އިއްޔެ އެވެ.

ފްރާންސްގެ ފިލްމެއް ކަމަށްވާ "އެމިލިއާ ޕެރޭޒް" އަށް ވަނީ ހަތަރު އެވޯޑެއް ލިބިފަ އެވެ. މިއުޒިކަލް އެންޑް ކޮމެޑީ ކެޓަގަރީން އެ ފިލްމަށް ވަނީ އެންމެ މޮޅު ފިލްމުގެ އެވޯޑާއި އެންމެ މޮޅު ނޮން-އިންގްލިޝް ލޭންޖުއޭޖް ފިލްމުގެ އެވޯޑާއި ބެސްޓް ސަޕޯޓިން އެކްޓްރެސްގެ އެވޯޑު އަދި ބެސްޓް އޮރިޖިނަލް ސޯންގެ އެވޯޑު ވެސް ލިބިފަ އެވެ.

ކަރްލާ ސޯފިއާ ގަސްކޯން އާއި ޒޯއީ ސެލްޑާނިއާ އަދި ސެލީނާ ގޯމޭޒް މުހިންމު ރޯލުތައް ކުޅުނު "އެމިލިއާ ޕެރޭޒް"އަށް ޖުމްލަ 10 ނޮމިނޭޝަނެއް ވެސް ލިބިފައިވެ އެވެ.

ޑްރާމާ ކެޓަގަރީން އެންމެ މޮޅު ފިލްމަކަށް ހޮވުނީ އިނގިރޭސި ފިލްމެއް ކަމަށްވާ "ދަ ބްރޫޓަލިސްޓް" އެވެ.

އެންމެ މޮޅު ސީރީޒްގެ އެވޯޑާ އެކު ސީރީޒްތަކުގެ ޑްރާމާ ކެޓަގަރީން "ޝޯގަން"އަށް ވަނީ ހަތަރު އެވޯޑެއް ލިބިފަ އެވެ. އެއީ ޖަޕާނުގެ ތާރީހާ ގުޅުވައިގެން ގެނެސްދިން ކާމިޔާބު ސީރީޒެކެވެ. ދެން އެންމެ ގިނަ އެވޯޑު ލިބުނު ނެޓްފްލިކްސްގެ ސީރީޒް "ބޭބީ ރެއިންޑިއާ" އިން ވަނީ ދެ އެވޯޑެއް ކާމިޔާބުކޮށްފަ އެވެ.

ދުނިޔޭގެ ފިލްމާއި ސީރީޒްތަކަށް ދޭ ޝަރަފުވެރި އެވޯޑެއް ކަމަށްވާ ގޯލްޑެން ގްލޯބްސްގައި 29 ކެޓަގަރީއަކުން މި އަހަރު އެވޯޑުތައް ދީފައިވެ އެވެ.

މިއީ އެ އެވޯޑު ބޭއްވި 82 ވަނަ އަހަރެވެ.