ބޮންޑެޑްވެއާ ހައުސް އިން ސިނގިރޭޓް ގެއްލުމުން ވެރި ފަރާތުން 40 މިލިއަން ދައްކަން އަންގައިފި

މާލޭގެ ގެއެއްގައި ހަދާފައިވާ ބޮންޑެޑް ވެއާހައުސްއަކުން ގިނަ އަދަދެއްގެ ސިނގިރޭޓަށް ވީނުވީއެއް ނޭނގުނު މައްސަލާގައި އެ ތަކެތީގެ ވެރިފަރާތުން 40 މިލިއަން ރުފިޔާ ދައްކަން އަންގާފައިވާ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

މިދިޔަ މަހުގެ ތެރޭގައި "ވީނުވީއެއް" ނޭނގުނު ގިނަ އަދަދެއްގެ ސިނގިރޭޓް ކާޓަންގެ މައްސަލާގައި އިހުސާން ވިދާޅުވީ، އެ ތަކެތީގެ ވެރިފަރާތުން 40 މިލިއަން ރުފިޔާ ދައްކަން ކަސްޓަމްސް އިން މިހާރު އަންގާފައިވާ ކަމަށެވެ.

"އެއީ ކަސްޓަމްސް ޑިއުޓީ އާއި ޖޫރިމަނާ ވެސް ހިމަނައިގެން،" އޭނާ ވިދާޅުވި އެވެ.

އިހުސާން ވިދާޅުވި ގޮތުގައި ވެރި ފަރާތުން އެ ފައިސާ ދައްކަން އަންގާފައި ވަނީ ކަސްޓަމްސް އަށް ނާންގާ ބޮންޑެޑް ވެއާހައުސް އިން އެއްޗެއް ނެރުމަކީ މަނާ ކަމަކަށް ވާތީ އެވެ.

އޭނާ ވިދާޅުވީ، ގޭގޭގައި ހަދާފައިވާ ބޮންޑެޑް ވެއާހައުސްތަކުގައި ދެ ތަޅު ހަރުކޮށްފައި ހުންނަ ކަމަށާއި އޭގެ ތެރެއިން އެއް ތަޅުދަނޑި ކަސްޓަމްސްގައި އަދި އަނެއް ތަޅުދަނޑި އޮންނަނީ އެ ބޮންޑެޑް ވެއާހައުސްއަކަށް ޒިންމާވާން ޖެހޭ ފަރާތެއްގެ ހަވާލުގައި ކަމަށެވެ. އެހެންވެ، ކަސްޓަމްސް އަށް ނާންގާ އެ ތަނަށް ވަދެވުނު ގޮތެއް ބެލުމަށް ފުލުހުންނަށް ހުށަހަޅާފައިވާ ކަމަށް އިހުސާން ވިދާޅުވި އެވެ.

"ދެބައި މީހުން ތިބެހެން އެ ތަން ހުޅުވަން ޖެހޭނީ. އެހެންވެ، ފުލުހުން ބަލަނީ އެ އުސޫލު ބްރީޗުވި ގޮތެއް،" މިނިސްޓަރު ވިދާޅުވި އެވެ.

އެ މައްސަލަ ފެންމަތިވުމާ އެކު، ކަސްޓަމްސް އިން ވަނީ އަމިއްލަ މީހުންގެ ގޭގޭގައި ކަސްޓަމްސްގެ ބޮންޑެޑް ވެއާހައުސްތައް ހިންގުން މަނާކޮށްފަ އެވެ.

"ގޭގޭގައި މިހާރު ހުރި ބޮންޑެޑް ވެއާހައުސްތައް ވެސް ބަންދުކުރަން އަޅުގަނޑުމެން ވާނީ އަންގާފައި،" ކަސްޓަމްސްގެ ކަންކަމަށް ގާނޫނީ ގޮތުން ޒިންމާވާން ޖެހޭ މިނިސްޓަރު އިހުސާން ވިދާޅުވި އެވެ.

މިކަން ހިނގި ފަހުން ސަރުކާރުން ވަނީ ބޮންޑެޑް ވެއާހައުސް ހިންގޭނީ ހަމައެކަނި ކަސްޓަމްސްގެ ފުލް ކޮންޓްރޯލް އޮންނަ ސަަރަހައްދުގައި އެކަނި ކަމަށް ނިންމައިފަ އެވެ.