10،000 ޑޮލަރަށް ވުރެ ގިނައިން ބޭރަށް ގެންދާ ނަމަ، އެ ހޯދި ގޮތް ބުނެދޭން ޖެހޭ ގޮތް ހަދައިފި

ރާއްޖެ އިން ބޭރަށް ނަގުދު ފައިސާ ބޭރުކުރުމުގައި ފިޔަވަޅުތަކެއް އަޅާފައިވާ ކަމަށާއި މީގެފަހުން 10،000 ޑޮލަރަށް ވުރެ އިތުރަށް ނަގުދު ފައިސާ ރާއްޖެ އިން ބޭރަށް ގެންދެވޭނީ އެ ފައިސާ ހޯދި ގޮތެއް ސާފުކޮށްދިނުމަށް ފަހު ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ހޯމް މިނިސްޓްރީ އާއި އެތަނުގެ ދަށުން ހިންގާ އިދާރާތަކުން މިއަދު ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ ކަސްޓަމްސްގެ ކޭޝް ޑިކްލަރޭޝަން ގަވައިދަށް ބޮޑު އިސްލާހެއް ގެނެސް، 10،000 ޑޮލަރަށް ވުރެ މަތިން ރާއްޖެ އިން ބޭރަށް ފައިސާ ގެންދާ ނަމަ، އެ ފައިސާ ހޯދި ގޮތެއް ސާބިތުކޮށްދޭން ޖެހޭނެ ކަމަށެވެ.

"މީގެކުރިން 10،000 ޑޮލަރަށް ވުރެ މަތިން ހިފައިގެންދާ މީހާ ތިމަންނާ މި ދަނީ މިވެނި އަދަދަކަށް ފައިސާ ހިފައިގެންނޭ ބުނެ ހަމަ ދާންވީ. އެ ޑިކްލިއާ ކުރެވުނީ. ނަމަވެސް ބައިނަލްއަގްވާމީ އިދާރާތަކުގައި މިކަމަށް މިންގަނޑުތަކެއް އޮވޭ. އެމީހާ 10،000 ޑޮލަރަށް ވުރެ މަތިން ހިފައިގެންދަންޏާ ސޯސް އޮފް އިންކަމް ޑިކްލިއާ ކުރަން ޖެހޭ. އޭނާ ކޮންތާކުން ހޯދި ލާރިއެއްތޯ ހިފައިގެން މި ދަނީ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ސަރުކާރާ ހަވާލުވިއިރު ބައެއް ބިދޭސީން ރާއްޖެއަށް ލޭބަރެއްގެ ގޮތުގައި އެތެރެވެ، އޭނާ ހަފުތާއަކު އެއް ފަހަރު ރާއްޖެ އިން ބޭރަށް އެތައް ލައްކަ ޑޮލަރު ހިފައިގެންދާ ކަމަށެވެ. މިހާރު އެގޮތަށް ބިދޭސީންނަށް ވެސް އަދި ދިވެހިންނަށް ވެސް ނުދެވޭނެ ކަމަށާއި އެގޮތަށް ގެންދާ ޑޮލަރު މީގެ ފަހުން ހިފަހައްޓާނެ ކަމަށް މިނިސްޓަރު ވިދާޅުވި އެވެ.

"ބޭރު މީހަކު ވިޔަސް ދިވެއްސަކު ވިޔަސް ރާއްޖެ އިން ބޭރަށް 10،000 ޑޮލަރަށް ވުރެ ގިނައިން ހިފައިގެންދާ ކަމަށްވާ ނަމަ، ރަނގަޅަށް ޑިކްލައިކޮށް ކޮންތާކުން ކިހިނެއް ހޯދި އެއްޗެއްތޯ ގާނޫނީ އިމުގެ ތެރެއިން ބަލާއިރު ހަމަޖެހޭ ވާހަކައެއްތޯ އެމީހަކު އެ ދައްކަނީ ބަލާފައި އެ ޑިކްލަރޭޝަން ނިމުނީމަ ނޫނީ އެ ފައިސާ އަޅުގަނޑުމެން ދުލެއް ނުކުރަން،" މިނިސްޓަރު ވިދާޅުވި އެވެ.

"ރާއްޖެ އިން ބޭރަށް ބޮޑު އަދަދުން ކޭޝް ނުވަތަ ނަގުދު ފައިސާ ބޭރު ކުރުން ގާތްގަނޑަކަށް މި ވަނީ ހުއްޓުމަކަށް ގެނެވިފައި."

ކަސްޓަމްސްގެ ޑެޕިއުޓީ ކޮމިޝަނާ ޖެނަރަލް އިބްރާހިމް މަފާޒު ވިދާޅުވީ 2015 ވަނަ އަހަރުން ފެށިގެން އަމަލު ކުރަމުން އަންނަ ރާއްޖެއަށް އެތެރެކުރާ ނުވަތަ ބޭރުކުރާ ނަގުދު ފައިސާ ރިޕޯޓް ކުރުމުގެ ގަވައިދު އޮތް ގޮތުން ގަވައިދާ ހިލާފަށް ފައިސާ ބޭރު ކުރާ ފަރާތްތަކާ މެދު ފިޔަވަޅެއް ނޭޅޭ ކަމަށެވެ.

އެ ގަވައިދުގެ ދަށުން އެޅެން އޮތް ހަމައެކަނި ފިޔަވަޅަކީ ކަސްޓަމްސްއަށް އޮޅުވާލައިގެން ނުވަތަ ފޮރުވައިގެން ގިނަ އަދަދެއްގެ ފައިސާ ބޭރު ކުރަން އުޅޭ މައްސަލަތަކުގައި ފުލުހުން މެދުވެރިކޮށް ޖިނާއީ ތަހުގީގެއް ހިންގައި ދައުވާ ކުރުން ކަމަށް މަފާޒު ވިދާޅުވި އެވެ. ނަމަވެސް، ކޯޓުގައި މައްސަލަތައް ދިގުލައި، އިޖުރާއީ މައްސަލަތައް ވެސް ބޮޑުވެ ގިނަ މައްސަލަތައް ސާބިތު ނުވެ އެ ފައިސާ އަނބުރާ ދޭން ޖެހޭ ކަން އޭނާ ފާހަގަކުރެއްވި އެވެ.

އަދި ޖިނާއީ މައްސަލައެއްގެ މިންގަނޑަށް ނުފެތޭތީ ވެސް ގިނަ މައްސަލަތަކެއްގައި ފިޔަވަޅު ނޭޅި އެބަހުރި ކަމަށް ވެސް ވިދާޅުވި އެވެ. ގަވައިދަށް ގެނައި އިސްލާހުގެ ސަބަބުން އެކަންކަމަށް ހައްލު ލިބިގެން ދާނެ ކަމަށް ޑެޕިއުޓީ ކޮމިޝަނާ ޖެނަރަލް ވިދާޅުވި އެވެ.

"މި ގެނައި ބަދަލާ އެކު ގަވައިދާ ހިލާފުވާ ފަރާތްތަކާ މެދު އިދާރީ ފިޔަވަޅު އަވަސްކަމާ އެކު އެޅި ގާނޫނީ ބާރު ލިބިގެން ގޮސްފި. ޖިނާއީ ތަހުގީގުތައް ހިންގުމަށް ވެސް ފަސޭހަވެގެންދޭ،" މަފާޒު ވިދާޅުވި އެވެ.