މެޑްރިޑާ ގުޅޭ ވާހަކަތަކުން އެލެގްޒެންޑާ އާނޯލްޑަށް އަސަރެއް ނުކުރާނެ: ސްލޮޓް

ޓްރެންޓް އެލެގްޒެންޑާ އާނޯލްޑް ގެންދަން ރެއާލް މެޑްރިޑުން މަސައްކަތް ކުރަމުންދާކަމުގެ ވާހަކަތަކުން އޭނާ އަށް އަސަރެއް ނުކުރާނެ ކަމަށް ލިވަޕޫލްގެ ކޯޗު އާން ސްލޮޓް ބުނެފި އެވެ.

ކަނާތު ބެކަށް ކުޅޭ ޑިފެންޑަރު ގެންދަން ރެއާލުން ލިވަޕޫލަށް ބިޑް ހުށަހަޅާފައިވާކަމަށް ޓްރާންސްފާގެ ޚަބަރުތައް ބުނެ އެވެ. ޑެނީ ކާވަހާލަށް އަނިޔާވެ އޭނާ އަށް ސީޒަންގެ ބާކީބައިގައި ނުކުޅެވޭނެ ތީ ރެއާލުން ބިޑް ހުށަހެޅީ މިހާރު ކުރިއަށްދާ ޓްރާންސްފާ ޕީރިއަޑްގައި އެލްގެޒެންޑާ އާނޯލްޑް ސޮއި ކުރުވުމަށެވެ. އެކަމަކު ރެއާލްގެ އެ ބިޑް ލިވަޕޫލުން ގަބޫލެއް ނުކުރި އެވެ.

ލިވަޕޫލާ އެކު އާނޯލްޑް މިހާރު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. އާ އެއްބަސްވުމެއްގައި ސޮއި ނުކުރާނަމަ ހިލޭ ޓްރާންސްފާގައި އޭނާ ސޮއި ކުރުވުމުގެ ފުރުސަތު ކޮންމެ ކްލަބަކަށް ވެސް ލިބޭނެ އެވެ.

ޔުނައިޓެޑާ ދެކޮޅަށް ލިވަޕޫލުން ރޭ ކުޅުނު މެޗުގައި އިނގިރޭސި ޑިފެންޑަރަށް އެކަށީގެންވާ ކުޅުމެއް ނުދެއްކުނެވެ. އޭނާގެ ކުޅުމަށް އަސަރު ކުރީ ރެއާލުން އޭނާ ގެންދަން ޝައުގުވެރިވާ ވާހަކަތަކާ ގުޅިގެން ތޯ ސުވާލު ކުރުމުން ސްލޮޓް ބުނީ އެ ކަހަލަ ވާހަކަތަކުގެ ސަބަބުން އޭނާގެ ކުޅުމަށް އަސަރު ކުރާނެކަމަށް ގަބޫލު ނުކުރާ ކަމަށެވެ.

"އަހަރެން ތިކަން ގަބޫލުނުކުރާނަން. ފަހަރެއްގައި 10 މީހުންގެ ތެރެއިން ނުވަ މީހަކު ބުނެފާނެ އޭނާގެ ކުޅުމަށް އަސަރުކުރީ ތިހެންވެގެންނޭ. އެކަމަކު އަހަރެން ވާނީ 10 ވަނަ މީހާ އަށް އޭނަ އަށް ރަނގަޅަށް ނުކުޅެވުނީ އެހެންވެގެން ނޫންކަން ގަބޫލު ކުރާނެ،" ސްލޮޓް ބުންޏެވެ.

އޭނާ ބުނީ އިއްޔެ އަކީ އާނޯލްޑަށް އެންމެ ރަނގަޅު ކުޅުމެއް ދެއްކުނު ދުވަހަކަށް ނުވީ ކަމަށެވެ. "އޭނާގެ ކުޅުމަށް އަސަރު ކުރި ސަބަބެއްކަމަށް އަހަންނަށް ހީވަނީ ބްރުނޯ ފެނާންޑޭޒާއި ޑިއޭގޯ ޑަލޮޓްއާ ދެކޮޅަށް ކުޅެން އުނދަގޫވީހެން. އެއީ ޕޯޗުގަލްގެ ވަރަށް ވަރަށް މޮޅު ދެ ކުޅުންތެރިން.... އޭގެއިން ބުނެދޭ ކިހާ ފެންވަރު ރަނގަޅު ޓީމެއް ޔުނައިޓެޑްގައި އެބައޮތްކަން. އެ ކުޅުންތެރިން އެކުގައި ދަނޑުމަތީގައި އެހާ މޮޅަށް ކުޅުމެއް ދައްކަމުންދާނަމަ އެ ކުޅުންތެރިންނާ ދެކޮޅަށް ކުޅެން އުނދަގޫ ވާނެ."

ސްލޮޓް ބުނީ ހުރިހާ މެޗެއްގައި ޔުނައިޓެޑްގައި އެކުޅުން ނުދެއްކުނަސް ރޭ ގެ މެޗުގައި އެ ޓީމުން މޮޅު ކުޅުމެއް ދެއްކި ކަމަށެވެ. އެހެންވެ އެ ކުޅުންތެރިންނާ ދެކޮޅަށް ކުޅެން އާނޯލްޑަށް އުނދަގޫވީ ކަމަށް ނެދަލެންޑްސްގެ ކޯޗު ބުންޏެވެ.

ރޭގެ މެޗުގައި ޔުނައިޓެޑުން ވަނީ ރަނގަޅު ފޯމެއްގައި އޮތް ލިވަޕޫލާ އެއްވަރުކޮށް ޕޮއިންޓެއް ހޯދާފަ އެވެ.