ލިވަޕޫލް އަތުން ޕޮއިންޓެއް ލިބުނަސް އަމޯރިމް ދެރަވެފައި

ޕްރިމިއާ ލީގުގައި ރޭ ލިވަޕޫލާ 2-2 އިން މެންޗެސްޓާ ޔުނައިޓެޑް އެއްވަރުވި މެޗުގައި އެ ޓީމުން ދެއްކި ކުޅުމަށް އޭނާ ނޫން އެންމެން ހިތްހަމަޖެހުނު ކަމަށް ޔުނައިޓެޑުގެ ކޯޗު ރުބެން އަމޯރިމް ބުނެފި އެވެ.

މެޗުގައި ފުރަތަމަ ލީޑު ނެގީ ޔުނައިޓެޑުންނެވެ. ދެވަނަ ހާފު ފެށިގެން ހަތްވަނަ މިނެޓްގައި ލިސަންޑްރޯ މާޓިނޭޒް އެ ޓީމަށް ލީޑް ނަގައިދިން ނަމަވެސް ކޯޑީ ގޮކްޕޯ އާއި މުހައްމަދު ސަލާހްގެ ލަނޑުތަކުން ލިވަޕޫލުން ލީޑް ނެގި އެވެ. ސަލާހް ލަނޑު ޖެހީ ލިބުނު ޕެނަލްޓީއަކުންނެވެ. އޭގެ 10 މިނެޓް ފަހުން ޑިއާލޯ ޔުނައިޓެޑަށް ނަތީޖާ ހަމަހަމަކޮށް ދިނެވެ.

ކުރިން ކުޅުނު ހަތަރު މެޗުން ވެސް ބަލިވި ޔުނައިޓެޑަށް ރޭ ލިވަޕޫލް އަތުން ލިބުނު ޕޮއިންޓަކީ އެ ޓީމަށް ލިބުނު ބޮޑު ހިތްހަމަޖެހުމެކެވެ. މި ސީޒަނުގައި ރަނގަޅު ފޯމެއްގައި އޮތް ލިވަޕޫލާ ދެކޮޅަށް ޔުނައިޓެޑް ދެއްކި ކުޅުމާ މެދު ގިނަ ބަޔަކު ހިތްހަމަޖެހޭ ކަމަށް އަމޯރިމް ބުންޏެވެ.

މެޗުގެ ކުރިން އަމޯރިމް ބުނީ ޔުނައިޓެޑްގެ ބައެއް ކުޅުންތެރިން ތިބީ ކުޅެން ބިރުގެންފައި ކަމަށެވެ. މެޗަށް ޓީމު ނެރުނީ އޭނާ ދިން "ޝޮކް" ތެރަޕީއަކުންނެވެ. އަމޯރިމް ބުނީ ތަފާތު ގޮތްގޮތަށް ޓީމަށް ހިތްވަރު ހޯދައިދޭން އޭނާ މަސައްކަތް ކުރާ ކަމަށެވެ. ފަހަރުގައި އެއީ ހުރިހާ މެޗަކަށް އެންމެ ރަނގަޅު ގޮތްކަމަށް ނުވެދާނެކަމަށް ކުރިން ސްޕޯޓިން ލިޒްބަންއާ އެކު ކާމިޔާބު ހޯދި ކޯޗު ބުންޏެވެ.

"ބައެއް ފަހަރު އަހަރެމެން ބޭނުންވޭ ޝޮކެއް. މިއަދު ފެންނާނެ އަހަރެމެން ތަފާތުކަން. އެއީ ކޮންމެހެން ވަކި ސިސްޓަމަކަށް ކުޅެގެނެއް ނޫން. އެއީ އަހަރެމެން މުބާރާތާ ކުރިމަތިލި ގޮތް ބަދަލުކޮށްލައިގެން. އަހަންނަށް ހީވަނީ ޓީމުގެ ކިބައިން ރަނގަޅު ކަންކަމެއް ފެނިއްޖެހެން. (ހާލަތު) ރަނގަޅު (ކުރެވޭނެ ކަމުގެ) އަލާމާތްތަކެއް ފެނިއްޖެ. އެކަން ވަރަށް ސާފުކޮށް ފެނުނު. ކުރިން ކުޅުނު މެޗުތަކުގެ ތެރެއިން އަމިއްލަ ދަނޑުގައި ވިދިވިދިގެން ތިން މެޗުން އަހަރެމެން ބަލިވި. ބައެއް މެޗުތަކުގައި އަހަރެމެން ކޮޅަށް ދެ ގޯލް ވަން އެއްވެސް ކަމެއް ނުކޮށްތިއްބައި ވެސް،" ތަފްސީލުތަކާ އެކު އަމޯރިމް ވާހަކަ ދެއްކި އެވެ.

"އަހަރެމެން މިހުރީ މިއަދު ދެރަވެފައި. ހަމަ ހަގީގަތުގައި ވެސް ދެރަވެފައި. ކުޅުންތެރިން ދެއްކި ކުޅުމާ މެދު ހިތްހަމަޖެހޭ. އެކަމަކު އެންމެން ވެސް މިއަދު [ރޭ] ބުނާނެ ޓީމުން ވަރަށް ރަނގަޅު މަސައްކަތްތަކެއް ކުރިއޭ. އަހަރެން އެކަނި ޓީމުގެ މަސައްކަތާ މެދު ހިތްހަމަނުޖެހުނީ. އެކަމަކު ކޮންމެގޮތެއް ވިޔަސް މިއަދު އަހަރެމެންނަކީ ޓީމެއް."

ލިބުނު ޕޮއިންޓާ އެކު އެއްވަނައިގައި ލިވަޕޫލަށް ހަ ޕޮއިންޓްގެ ލީޑެއް ލިބުނީ އެވެ. ދެވަނައިގައި އޮތީ އާސެނަލް އެވެ. ޔުނައިޓެޑް އޮތީ 13 ވަނައިގަ އެވެ.