އިޒްރޭލުގެ 34 ރަހީނަކު މިނިވަންކުރަން ހަމާސް ތައްޔާރު

އިޒްރޭލާ އެކު ހަދަން މަސައްކަތްކުރާ އެއްބަސްވުމުގެ "ފުރަތަމަ މަރުހަލާގައި" 34 ރަހީނަކު މިނިވަން ކުރަން އެ ޖަމާއަތުން ތައްޔާރަށް އޮތް ކަމަށް ހަމާސްގެ އޮފިޝަލަކު އިއްޔެ ވިދާޅުވެއްޖެ އެވެ.

މެދުވެރިންގެ ގޮތުގައި މަސައްކަތްކުރާ ގަތަރާއި މިސްރު އަދި އެމެރިކާ އިން ވަނީ ހަނގުރާމަ ނިމުމަކަށް ގެނައުމަށް އެއްބަސްވުމަކަށް އައުމަށް އެތައް މަހެއް ވަންދެން މަސައްކަތްކޮށްފަ އެވެ. މިފަހަރު މަސައްކަތް ފަށާފައިވަނީ މި މަހުގެ 20 ވަނަ ދުވަހު އެމެރިކާގެ ރައީސްކަމާ ޑޮނަލްޑް ޓްރަމްޕް ހަވާލުވެވަޑައިގަތުމުގެ ކުޑަ ދުވަސްކޮޅެއް ކުރިންނެވެ.

ނުސީދާ ގޮތެއްގައި މަޝްވަރާތައް ކުރިއަށް ގެންގޮސްފައިވަނީ އިޒްރޭލުން އާދީއްތަ ދުވަހު ޣައްޒާއަށް ދިން ހަމަލާތަކުގައި 23 މީހަކު ޝަހީދުކޮށްލާފައި ވަނިކޮށެވެ.

އިޒްރޭލުގެ ހަމަލާތަކަށް މިހާރު 15 މަސް ދުވަސް ވެފައި ވާއިރު މި މުއްދަތުގެ ތެރޭގައި ހަމަލާތައް މެދުކަނޑާލީ އެންމެ ފަހަރަކު އެވެ. އެއީ 2023 ވަނަ އަހަރުގެ ނޮވެމްބަރު މަހު އެއް ހަފުތާއަށެވެ. އެފަހަރު އިޒްރޭލުގެ ޖަލުތަކުން ފަލަސްތީނުގެ 240 މީހުންނާ އެކު އިޒްރޭލުގެ 80 ރަހީނަކު ވަނީ މިނިވަންކޮށްފަ އެވެ.

ފަލަސްތީނުގެ ހަމާސްގެ އޮފިޝަލަކު ވިދާޅުވި ގޮތުގައި ގައިދީން ބަދަލުކުރުމުގެ އެއްބަސްވުމުގެ ފުރަތަމަ ފިޔަވަހީގެ ދަށުން އިޒްރޭލުން ހުށަހެޅި ލިސްޓުން 34 ރަހީނަކު ދޫކޮށްލުމަށް ހަމާސް އިން މިހާރު ވަނީ އެއްބަސްވެފަ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ މިނިވަންކުރާނެ ރަހީނުންގެ ލިސްޓެއް ހަމާސްގެ ފަރާތުން އަދި ނުލިބޭ ކަމަށެވެ.

މިހާރު ކުރިއަށްދާ މަޝްވަރާތަކާ ބެހޭ ގޮތުން މީޑިއާގައި ވާހަކަ ދެއްކުމުގެ ހުއްދަ ނެތުމުން ނަން ހާމަ ނުކުރުމަށް ޝަރުތުކޮށް ހަމާސްގެ އޮފިޝަލް ވިދާޅުވީ ފުރަތަމަ މިނިވަަންކުރާނީ ރަހީނުންގެ ތެރޭގައި ތިބި އަންހެނުންނާއި ކުޑަކުދިންނާއި އުމުރުން ދުވަސްވީ މީހުންނާއި ބަލި މީހުން ކަމަށެވެ. އެކަމަކު ރަހީނުންގެ ހާލަތު ދެނެގަތުމަށް ހަމާސް އަށް ވަގުތު ބޭނުންވާނެ ކަމަށް ވިދާޅުވި އެވެ.

"ހަމާސް އިން ވަނީ އެ 34 ރަހީނުން ދިރިތިއްބާ ނުވަތަ މަރުވި ނަމަވެސް ދޫކޮށްލަން އެއްބަސްވެފައި،" އޮފިޝަލް ވިދާޅުވި އެވެ. "ނަމަވެސް ރަހީނުން އެ މީހުންނާ ބެހޭ މައުލޫމާތު ކަށަަވަރުކުރުމަށް އަދި ދިރިތިބި މީހުންނާއި މަރުވެފައިވާ މީހުން ދެނެގަތުމަށް ހަފްތާއަކަށް ހަމަލާތައް މެދުކަނޑާލަން ޖެހޭނެ."

އޮކްޓޯބަރު 7، 2023 ގައި ހަމާސް އިން އިޒްރޭލަށް ހަމަލާދީ ހާހަކަށް ވުރެ ގިނަ މީހުން މަރާލައި 251 މީހަކު ރަހީނުކޮށްފައި ވާއިރު އޭގެ ތެރެއިން 96 މީހުން ޣައްޒާގައި އެބަތިއްބެވެ. އޭގެ ތެރެއިން 34 މީހުން މަރުވެފައިވާ ކަމަށް އިޒްރޭލުގެ އަސްކަރިއްޔާއިން ބުނެ އެވެ.

މި ހާދިސާގެ ފަހުން އިޒްރޭލުން ޣައްޒާއަށް ހަމަލާދޭން ފެށީ ހަމާސް ނައްތާލުމުގެ ނަމުގަ އެވެ. ހަމަލާތަކުގައި ޣައްޒާއިން މިހާތަނަށް ގާތްގަނޑަކަށް 46،000 މީހަކު ޝަހީދުކޮށްލާފައި ވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.