ހަމާސް އިން ޣައްޒާގެ ބާރުތައް ދޫކޮށްލުމާ ބެހޭ މަޝްވަރާ ފަށައިފި

ފަލަސްތީނުގެ ޣައްޒާގައި މިހާރު ބަދަލުކުރަމުންދާ ހަމަލާތަކަށް ފަހު އެ ސިޓީ ފަލަސްތީނު އޮތޯރިޓީ (ޕީއޭ)ގެ ފުރިހަމަ ބާރުގެ ދަށުގައި ބޭއްވުމުގެ މަޝްވަރާއަށް، ފަލަސްތީނުގެ ވާދަވެރި ޖަމާއަތްތައް ކަމަށްވާ ފަތަހަ އާއި ހަމާސް ޖަމާއަތް މިސްރުގެ ވެރިރަށް ގާހިރާއަށް ގޮސްފައިވާ ކަމަށް އެ ގައުމުގެ ފޮރިން މިނިސްޓަރު ވިދާޅުވެއްޖެ އެވެ.

ހަމާ ޖަމާއަތުން މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހު އިޒްރޭލަށް ކުއްލި ގޮތަކަށް ދިން ހަމަލާއަށް ފަހު ޣައްޒާގައި ހަމާސް އާއި އިޒްރޭލާ ދެމެދު ނުރައްކާތެރި ކުރިމަތިލުންތައް ފެށުނީ އިޒްރޭލުގެ ބަދަލު ހިފުމުގެ ހަމަލާތަކާ އެކުގަ އެވެ.

ކުރިން ފަތަހް ޖަމާއަތުގެ ބާރުގެ ދަށުގައި އޮތް ޣައްޒާ ހަމާސްގެ ބާރުގެ ދަށަށް ގެންދިޔައީ 2007 ވަނަ އަހަރު އެވެ.

"ފަލަސްތީނު އޮތޯރިޓީގެ ފުރިހަމަ ކޮންޓްރޯލްގެ ދަށުގައި ޣައްޒާ ބޭއްވުމަށާއި އާންމު ދިރިއުޅުމާ ގުޅޭ ކަންކަން ބެލެހެއްޓުމާ ބެހޭ ގޮތުން ދެ ޖަމާއަތުން މަޝްވަރާކޮށް އަވަހަށް ހައްލެއް ހޯދޭތޯ އަންނަނީ މަސައްކަތް ކުރަމުން،" ނޫސްވެރިންގެ ބައްދަލުވުމެއްގައި މިސްރުގެ ފޮރިން މިނިސްޓަރު ބަދުރު އަބްދުލްއާތީ ވިދާޅުވި އެވެ.

އޭނާ ވިދާޅުވި ގޮތުގައި ފަލަސްތީން އޮތޯރިޓީއަކީ "އިޒްރޭލުގެ ބާރު ނިމުމަކަށް ގެނައުމަށް ފަހު، ސާފުކޮށް އަދި ފުރިހަމަ ގޮތެއްގައި ކަންކަން ކުރިއަށް ގެންދިއުމުގެ ފުރިހަމަ ގާބިލުކަން ލިބިގެންވާ އޮތޯރިޓީއަކަށް ވާން ޖެހޭ" ކަމަށެވެ.

ހަނގުރާމައަށްފަހު ޣައްޒާގެ ވެރިކަން ކުރާނީ ކޮން ބަޔަކުތޯ އެއީ މިހާރު އޮތް ފުޅާ ބަހުސެކެވެ.

ފަލަސްތީނުން ބުނަމުން އަންނަނީ އެ ސަރަހައްދުގެ މުސްތަގުބަލަކީ ބޭރުގެ އެއްވެސް ނުފޫޒެއް ނެތި ފުރިހަމަ އިހްތިޔާރާ އެކު ނިންމަންޖެހޭ މައްސަލައެއް ކަމަށެވެ.

އިޒްރޭލުގެ ކަމާބެހޭ ފަރާތްތަކުން ބުނެފައިވަނީ ޣައްޒާގައި ވެރިކަން ކުރުމުގެ ވިސްނުމެއް ނުގެންގުޅޭ ކަމަށާއި ނަމަވެސް ހަމާސް އަލުން ވެރިކަމަށް އައުމާ ދެކޮޅު ކަމަށެވެ.