ހަނިއްޔާ އަވަހާރަކޮށްލި ކަމަށް އިޒްރޭލުން އެއްބަސްވެއްޖެ

މި އަހަރުގެ ކުރީކޮޅު ހަމާސްގެ ކުރީގެ ލީޑަރު އިސްމާއިލް ހަނިއްޔާ އަވަހާރަކޮށްލީ އިޒްރޭލުން ކަމަށް، ޔަމަނުގައި އުޅޭ ހޫތީންގެ ދުވަސް ދުއްވާލާނެ ކަމަށް އިންޒާރު ދެމުން އިޒްރޭލުގެ ޑިފެންސް މިނިސްޓަރަށް އެއްބަސްވެވިއްޖެ އެވެ.

"ހޫތީންނަށް ވަރަށް ވަރުގަދައަށް ހަމަލާދޭނަން... އަދި އެމީހުންގެ ލީޑަރޝިޕް ނައްތާލާނަން - ތެހެރާން، ޣައްޒާ އަދި ލުބުނާނުގައި ހަނިއްޔާ، (ޔަހްޔާ) ސިންވާރް އަދި (ހަސަން) ނަސްރުﷲ އާ މެދު ކަންތައް ކުރި ގޮތަށް، އެކަން ކުރާނީ ހުދައިދާ އާއި ސަންއާގައި،"އިޒްރާއިލް ކާޓްޒް ބުންޏެވެ.

ޔަމަންގެ ވެރިރަން ސަންއާ އާއި ހޫތީންގެ ބާރުގަދަ ހުދައިދާގެ ނަން ގެންނަމުން ކާޓްސް ބުންޏެވެ.

ޑިފެންސް މިނިސްޓްރީގައި ބޭއްވި އިވެންޓެއްގައި ކާޓްސް މިހެން ބުނެފައި ވާއިރު މިއީ ހަނިއްޔާއަށް ހަމަލާ ދިން ކަމަށް އިޒްރޭލުން އާންމުކޮށް އެއްބަސްވި ފުރަތަމަ ފަހަރެވެ.

"އިސްރާއީލާ ދެކޮޅަށް އަތް އުފުލާ ކޮންމެ މީހެއްގެ އަތް ކަނޑާލާނަން. އައިޑީއެފް (އިޒްރޭލުގެ އަސްކަރިއްޔާގެ) ދިގު އަތް އެ މީހަކު ޖަވާބުދާރީ ކުރުވާނެ،" މިނިސްޓްރީން ނެރުނު ބަޔާނެއްގައި ބުނެފައިވެ އެވެ.

ހަނިއްޔާ އަވަހާރަކޮށްލި ކަމަށް މިހާތަނަށް އިޒްރޭލުން އިއުތިރާފުވެފައި ނުވި ނަމަވެސް އީރާނާއި ހަމާސް އިން ވަނީ ހަމާސްގެ ސިޔާސީ ލީޑަރުގެ މަރުގެ ޒިންމާ އިޒްރޭލުގެ ބޮލުގައި އަޅުވައިފަ އެވެ.

ޣައްޒާގައި ހަނގުރާމަ ހުއްޓާލުމަށް ހަމާސް އިން ކުރަމުން އަންނަ މަޝްވަރާތަކުގައި އިސްކޮށް އުޅުއްވި ހަނިއްޔާ މިދިޔަ ޖުލައި މަހުގެ 31 ވަނަ ދުވަހު ތެހެރާންގެ ގެސްޓްހައުސްއެއްގައި ޝަހީދުކޮށްލީ ހަނިއްޔާ ހުންނަވާ ކޮޓަރީގައި އެތައް ދުވަހެއް ކުރިން އިޒްރޭލުގެ އެޖެންޓުން ހަރުކުރި ގޮވާތަކެތި ބޭނުންކޮށްގެން ކަމަށް މީޑިއާގައި ރިޕޯޓްކޮށްފައިވެ އެވެ.

ހަނިއްޔާ އަވަހާރަކޮށްލީ އީރާންގެ މިހާރުގެ ރައީސް މަގާމާ ހަވާލުވެ ވަޑައިގަތުމުގެ ރަސްމިއްޔާތަށް ވަޑައިގަތްތާ އެއް ދުވަސް ފަހުންނެވެ.

މިދިޔަ ސެޕްޓެމްބަރު މަހުގެ 27 ވަނަ ދުވަހު އިޒްރޭލުން ބެއިރޫތު ހަމަލާދީ ނަސްރުﷲ ޝަހީދުކޮށްލި އިރު، އޭގެ ފަހުން މިދިޔަ އޮކްޓޯބަރު މަހުގެ 16 ވަނަ ދުވަހު ވަނީ ހަނިއްޔާގެ ބަދަލުގައި ހަމަޖެއްސި ޔަހްޔާ ސިންވާރު ވެސް އަވަހަރާކޮށްލައިފަ އެވެ.