ހަމާސްގެ ލީޑަރުގެ އަންހެން ކޮއްކޮ ހައްޔަރުކޮށްފި

ހަމާސްގެ ލީޑަރު އިސްމާއިލް ހަނިއްޔާގެ އަންހެން ކޮއްކޮ، ޓެރަރިޒަމްގެ މައްސަލައެއްގެ ތަހުގީގަށް ކަމަށް ބުނެ އިޒްރޭލުން ހައްޔަރުކޮށްފި އެވެ.

އިޒްރޭލުގެ ރަށްވެހިކަން އޮންނަ ސަބާހް އަބްދުއްސަލާމް ހަނިއްޔާ، 57، ހައްޔަރުކުރީ ހަމާސްގެ މެންބަރުންނާ ގުޅުން ބާއްވައި އިޒްރޭލާ ދެކޮޅަށް ޓެރަރިޒަމްގެ އަމަލުތައް ހިންގުމަށް ހިތްވަރުދީ އެކި މަސައްކަތްތައް ކުރާ ކަމުގެ ތުހުމަތަށް ކަމަށް ފުލުހުން ބުންޏެވެ.

ފުލުހުން ބުނި ގޮތުގައި ހަނިއްޔާގެ ކޮއްކޮގެ ގެއިން، އޭނާއަށް ތުހުމަތުކުރެވޭ ކަންކަމާ ގުޅޭ ޑޮކިއުމެންޓްތަކާއި ފޯނާއި އެކި ސާމާނުތައް ވެސް ވަނީ ފެނިފަ އެވެ.

އިސްމާއިލް ހަނިއްޔާ އަކީ ހަމާސްގެ ސިޔާސީ ގޮފީގެ ލީޑަރެވެ. އޭނާ ދިރިއުޅެނީ ދުބާއީގަ އެވެ. -- އޭއެފްޕީ