ޣައްޒާގެ ހަމަލާތައް ހުއްޓުވޭނެ އެއްބަސްވުމެއް އަދި ނެތް: އެމެރިކާ

ފަލަސްތީނުގެ ޣައްޒާގައި ހަމާސް ޖަމާއަތާއި އިޒްރޭލާ ދެމެދު ބަދަލުކުރާ ހަމަލާތައް ހުއްޓުމަކަށް ގެނެސް ރަހީނުން މިނިވަންކުރުމުގެ އެއްބަސްވުމަކާ ހިސާބަށް ދެވޭތޯ ވައިޓް ހައުސް އިން މަސައްކަތް ކުރަމުން އަންނަ ކަމަށާއި އެކަމަކު އަދި އެއްބަސްވުމަކާ ހިސާބަށް ނުދެވޭ ކަމަށް އެމެރިކާނެ ނެޝަނަލް ސެކިއުރިޓީ އެޑްވައިޒަރު ޖޭކް ސުލިވާން ވިދާޅުވެއްޖެ އެވެ.

"އަޅުގަނޑުމެން މި އަންނަނީ އެކަން ހަގީގަތަކަށް ހެދުމަށް މަސައްކަތްކުރަމުން. ސަރަހައްދުގެ މުހިންމު ފަރާތްތަކާ ވަރަށް ބޮޑަށް ގުޅިގެން މި މަސައްކަތް ކުރަނީ. މިއަދުވެސް މި މަސައްކަތް ކުރިއަށްދިޔަ،" ސުލީވިއަން އެންބީސީ އަށް ދެއްވި އިންޓަވިއުއެއްގައި ވިދާޅުވި އެވެ.

"އިތުރު ވާހަކަތަކާއި މަޝްވަރާތައް ކުރިއަށް ދާނެ، އަޅުގަނޑުމެންގެ އުއްމީދަކީ ހަނގުރާމަ ހުއްޓާލުމާއި ރަހީނުން މިނިވަންކުރުމުގެ އެއްބަސްވުމަކަށް އާދެވުން. އެކަމަކު އަދި އެ ހިސާބަކަށް ނުދެވޭ،" އޭނާ ވިދާޅުވި އެވެ.

ސުލިވާން މިހެން ވިދާޅުވެފައި މިވަނީ އިޒްރޭލުން ލުބުނާނުގެ ހިޒްބުﷲ އަށް ދޭ ހަމަލާތައް ހުއްޓާލިކަން އިއުލާނުކުރިތާ ދެ ދުވަހެއް ފަހުން ލުބްނާންގެ ސަރަހައްދަކަށް އަނެއްކާވެސް ހަމަލާ ދީފައި ވަނިކޮށެވެ.

އޭނާ ވިދާޅުވީ ލުބްނާންގައި ހަމަލާތައް ހުއްޓާލުމަށް ހެދި އެއްބަސްވުން ލުބްނާންގެ އަސްކަރިއްޔާއިން ފުރިހަމައަށް ތަންފީޒުކުރާ ކަމަށެވެ.

"ހަމަލާތައް ހުއްޓާލުމުގެ އެއްބަސްވުން ސަލާމަތްކޮށް، އެއަށް އަމަލުކުރަން ޖެހޭނެ،" ސުލިވާން ވިދާޅުވި އެވެ.

އެއްބަސްވުމަށް ފަހު ވެސް ދިން ހަމަލާއާ ގުޅޭ ގޮތުން އޭނާ ވިދާޅުވީ ކޮންމެ ބަޔަކަށް ވެސް އެ ބަޔަކު އަމިއްލަ ދިފާއުގައި ފިޔަވަޅު އަޅަންޖެހޭ ކަމަށް ގަބޫލުކުރެއްވިޖެ ނަމަ ބައިނަލްއަގުވާމީ ގާނޫނުތަކުގެ ތެރެއިން އެކަން ކުރެވޭނެ ކަމަށެވެ.

ލުބްނާންގައި ހަމަލާތައް ހުއްޓާލިކަން އިއުލާނުކުރުމާ އެކު ހަމާސް އިން ވަނީ އެފަދަ އެއްބަސްވުމެއް ގާއިމުކުރުމަށް މަޝްވަރާއަށް ތައްޔާރަށް އޮތްކަން ހާމަކޮށްފަ އެވެ. އަދި މިހާރު ވަނީ އެކަމުގައި ބާއްވާ މަޝްވަރާތައް މިސްރުގައި ފަށައިފަ އެވެ.