ޣައްޒާގެ ހަމަލާތައް ހުއްޓާލުމުގެ އެއްބަސްވުމަކާ "ދުވަހަކު ނުދެވޭހާ ގާތަށް" ދެވިއްޖެ

ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓާލުމާ ގުޅޭ ގޮތުން އެއްބަސްވުމެއް ގާއިމުކުރުމަށް ކުރަމުން އަންނަ މަސައްކަތުގައި "ދުވަހަކު ވެސް ނުދެވޭހާ ގާތަށް" މިހާރު ދެވިފައިވާ ކަމަށް ހަމާސް އާއި ފަލަސްތީނުގެ އެހެން ދެ ޖަމާއަތަކުން ބުނެފި އެވެ.

އެ ޖަމާއަތްތަކުން މިހާރު ބުނަނީ އަހަރު ދުވަސް ވެފައިވާ ހަމަލާތައް ހުއްޓާލުމަށް އިޒްރޭލުން ދެން އިތުރު ޝަރުތެއް ނުކޮށްފި ނަމަ އެއްބަސްވުމަކާ ހަމަޔަށް ދެވޭނެ ކަމަށެވެ.

ގަތަރާއި މިސްރާއި އެމެރިކާ އިން މެދުވެރިވެ އިޒްރޭލާއި ހަމާސް ޖަމާއަތާ ދެމެދު ނުސީދާ މަޝްވަރާތައް މިދިޔަ ހަފުތާ ތެރޭ ދޯހާގައި ކުރިއަށް ގެންގޮސް، އެއްބަސްވުމެއްގެ އުއްމީދު ވަނީ ކުރިން ވެސް އާވެފަ އެވެ.

"ދުޝްމަނުން އާ ޝަރުތުތައް ކުރުން ހުއްޓާލައިފި ނަމަ [ހަނގުރާމަ ހުއްޓާލުމާއި ގައިދީން ބަދަލުކުރުމުގެ އެއްބަސްވުމަކަށް] ދިއުމުގެ ފުރުސަތު ކުރިއަށްވުރެ މިހާރު މާ ގާތް،" ހުކުރު ދުވަހު މިސްރުގެ ގާހިރާގައި ބޭއްވި މަޝްވަރާތަކަށްފަހު ހަމާސް، އިސްލާމިކް ޖިހާދު އަދި ލެފްޓް ޕޮޕިއުލާ ފްރަންޓް ފޯ ދަ ލިބަރޭޝަން އޮފް ފަލަސްތީން ގުޅިގެން ނެރުނު ބަޔާނެއްގައި ބުނެފައިވެ އެވެ.

ހަމާސްގެ ލީޑަރަކު ހޮނިހިރު ދުވަހު އޭއެފްޕީއަށް ވިދާޅުވީ ފާއިތުވި ދުވަސްތަކުގައި މަޝްވަރާތަކުން ބޮޑެތި އަދި މުހިންމު ކުރިއެރުންތަކެއް ލިބިފައިވާ ކަމަށެވެ.

"ހަނގުރާމަ ހުއްޓާލުމާއި ގައިދީން ބަދަލުކުރުމުގެ މައްސަލަތަކާ ގުޅޭ ގިނަ ކަންކަމަށް އެއްބަސްވެފައި ވޭ،" ނަން ނުޖެހުމަށް ޝަރުތުކޮށް އޭނާ ވިދާޅުވި އެވެ.

"ހައްލު ނުކުރެވި ބައެއް ކަންކަން އެބަހުރި، އެކަމަކު އެއީ މަޝްވަރާއަށް ހުރަހެއް ހޫން. [އިޒްރޭލުގެ ބޮޑުވަޒީރު] ބެންޖަމިން ނަތަންޔާހޫގެ އާ ޝަރުތުތަކުގެ ސަބަބުން އެއެއްބަސްވުމަށް ބުރޫނާރާ ނަމަ، މިއަހަރު ނިމުމުގެ ކުރިން އެއްބަސްވުން ފައިނަލް ކުރެވިދާނެ."

އޭނާ ވިދާޅުވީ އެއްބަސްވުމަކަށް އާދެވިއްޖެ ނަމަ ފިޔަވަހިތަކަކަށް ބަހާލައިގެން އެކަން ތަންފީޒުކުރާނެ ކަމަށާއި އެންމެ ފަހު ކަމަކަށް އޮންނާނީ "ގައިދީން ބަދަލުކުރުމުގެ ސީރިއަސް އެއްބަސްވުމަކާއި ހަނގުރާމަ ދާއިމީކޮށް ހުއްޓާލުމާއި ޣައްޒާއިން [އިޒްރޭލު ސިފައިން] އެއްކޮށް ފޭބުން" ކަމަށެވެ.

ބުދަ ދުވަހު އެމެރިކާގެ ސެކްރެޓަރީ އޮފް ސްޓޭޓް ވޒީރު އެންޓަނީ ބްލިންކެން ވެސް ވަނީ އެއްބަސްވުމަކަށް އަންނާނެ ކަމުގެ އުއްމީދު އެބައޮތް ކަމަށާއި ނަމަވެސް އެ އެއްބަސްވުން ހަގީގަތަކަށް ވާނީ ކޮން އިރަކުން ކަމެއް ލަފާކޮށް ވާހަކަ ދައްކަން ބޭނުން ނުވާ ކަމަށް ވިދާޅުވެފަ އެވެ.

މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ހަމާސް ޖަމާއަތް އިސްވެ އޮވެ އިޒްރޭލަށް ދިން ހަމަލާގައި އިޒްރޭލުގެ 251 މީހަކު ރަހީނުކޮށްފަ އެވެ. އޭގެ ތެރެއިން 96 މީހަކު އަދިވެސް ޣައްޒާގައި ހައްޔަރުކޮށްފައިވާއިރު 36 މީހަކު މަރުވެފައިވާ ކަމަށް އިޒްރޭލުގެ އަސްކަރިއްޔާއިން ބުނެ އެވެ.

މި ހަމަލާގެ ބަދަލުހިފަން އިޒްރޭލުން އޭރުން ފެށގެން ދެމުން ގެންދާ ހަމަލާތަކުގައި މިހާތަނަށް ފަލަސްތީނުން 45،000 އަށް ވުރެ ގިނަ މީހުން ޝަހީދުވެ މުޅި ޣައްޒާ ވަނީ ބިމާ ހަމަވެފަ އެވެ.