އިޒްރޭލު ސިއްސުވާލި ހަމަލާއަށް އަހަރެއް؛ އީރާނަށް ހަމަލާދޭން ތައްޔާރު

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިޒްރޭލަށް ދިން ވަރުގަދަ ހަމަލާތަކަށް އަހަރު ފުރުމާ ދިމާކޮށް އިޒްރޭލު ސިފައިންގެ ފައުޖުތަކުގެ ތައްޔާރީ ހާލަތު އިތުރަށް މައްޗަށް ޖައްސާފައިވާ ކަމަށާއި އަދި އީރާންގެ ކިބައިން ބަދަލު ހިފުމުގެ ހަމަލާއަށް ވެސް ތައްޔާރުވަމުންދާ ކަމަށް ބުނެފި އެވެ.

ހަމާސް އިން އިޒްރޭލަށް ކުއްލި އަދި ވަރުގަދަ ހަމަލާތަކެއް ދީ 1،205 މީހަކު މަރާލައި 250 އަށް ވުރެ ގިނަ މީހުން ރަހީނުކުރުމާ އެކު އިޒްރޭލުން ދޭން ފެށި ހަމަލާތަކުގައި މިހާތަނަށް 41،825 މީހަކު ފަލަސްތީނުން ވަނީ ޝަހީދުވެފަ އެވެ.

އިޒްރޭލުގެ ހަމަލާތަކުގެ ބަދަލު ހިފުމަށް ލުބްނާންގެ ހިޒްބުﷲ އިން ހަމަލާދޭތީ ލުބްނާނުގެ ހިޒްބުﷲ ޖަމާއަތާ ދެކޮޅަށް އިޒްރޭލުން ދޭ ހަމަލާތައް މިހާރު ވަނީ އިތުރަށް ވަރުގަދަކޮށްފަ އެވެ. އަދި ފަލަސްތީނުގެ ޣައްޒާ އާއި ލުބްނާނަށް ދޭ ހަަމަލާތަކުގެ ބަދަލު ހިފުމަށް އީރާނުން އިޒްރޭލަށް ހަމަލާދޭން އެތައް ސަތޭކަ މިސައިލެއް ފޮނުވާލުމުން އެކަމުގެ ބަދަލު ހިފުމަށް ވެސް އިޒްރޭލުން ދަނީ ތައްޔާރުވަމުންނެވެ.

އިޒްރޭލު އަސްކަރިއްޔާގެ ވެރިޔާ ލެފްޓިނެންޓް ޖެނެރަލް ހަރްޒީ ހަލެވީ ވަނީ ހިޒްބުﷲ އަށް ދޭ ހަމަލާތަކަށް ކުޑަ ނަމަވެސް ލުޔެއް ނުދޭނެ ކަމުގެ އިންޒާރު ދީފަ އެވެ.

ހިޒްބުﷲގެ އިސް އޮފިޝަލަކު ހޮނިހިރު ދުވަހު ވިދާޅުވީ، އެ ޖަމާއަތުގެ ލީޑަރު ހަސަން ނަސްރުﷲ އިޒްރޭލުގެ ހަމަލާއެއްގައި އަވަހާރަކޮށްލުމުން އެ މަގާމަށް އައްޔަންކުރާނެ ކަމަށް އެންމެ ބޮޑަށް ބެލެވޭ ހާޝިމް ސަފީދީން ވަނީ އިޒްރޭލުގެ ވަރުގަދަ ހަމަލާތަކަކަށް ފަހު "ގެއްލިފަ" އެވެ. އޭނާއާ މިހާރު ނުގުޅޭ ކަމަށް އޮފިޝަލް ވިދާޅުވި އެވެ.

ހަމަލާގެ އަހަރީ ދުވަހާ ދިމާކޮށް އަސްކަރިއްޔާގެ ތަރުޖަމާނު ރިއާ އެޑްމިރަލް ޑެނިއަލް ހަގާރީ ވަނީ މި ދުވަހު ދިމާވެދާނެ ކަމަކަށް ބަލައި އިތުރު ސިފައިންނާ އެކު ތައްޔާރަށް ތިބި ކަމަށް ބުނެފަ އެވެ.

ހަމަލާއަށް އަހަރެއް ވީއިރު ޣައްޒާގައި ދޭ ހަމަލާތައް ކުޑަކޮށް ލުއިކޮށްފައި ވިޔަސް އިޒްރޭލުން ވަނީ އުތުރުން ލުބްނާނަށް ދޭ ހަމަލާތައް ވަރުގަދަކޮށްފަ އެވެ. އަދި ލުބްނާންގެ ހިޒްބުﷲ އަށް އެހީވާ އީރާނާ ދެކޮޅަށް ވެސް ހަމަލާދޭން އިޒްރޭލުން ދަނީ ތައްޔާރުވަމުންނެވެ.

އިޒްރޭލުގެ އަސްކަރިއްޔާ އިން ބުނީ ހިޒްބުﷲއާ ދެކޮޅަށް ހޯމަ ދުވަހުން ފެށިގެން ވަޔާއި އެއްގަމު މަގުން ދިން ހަމަލާތަކުގައި 440 ހަނގުރާމަވެރިއަކު މަރާލާފައިވާ ކަމަށެވެ.

އިޒްރޭލުން ބުނަނީ އަމާޒަކީ އިޒްރޭލުގެ އުތުރުގެ ސަރަހައްދަށް ހިޒްބުﷲ އިން ރޮކެޓް ހަމަލާތައް ދޭތާ ގާތްގަނޑަކަށް އަހަރެއްހާ ދުވަސް ވީއިރު އެ ސަރަހައްދުން ގެދޮރު ގެއްލިފައިވާ އިޒްރޭލުގެ އެތައް ހާސް ބަޔަކަށް އެނބުރި އާދެވޭނެ ފުރުސަތު ހޯދައިދިނުން ކަމަށެވެ.

"އީރާނަށް ހަމަލާދޭންޖެހޭ"

މިފަހަރު އިޒްރޭލަށް އީރާނުން ފޮނުވާލި މިސައިލްތަކުގައި އެކަކު މަރުވެފައި ވާއިރު އިޒްރޭލުގެ ވައިގެ ސިފައިންގެ މަރުކަޒަކަށް ވެސް ގެއްލުން ވެފައިވާ ކަމަށް ސެޓެލައިޓް ފޮޓޯތަކުން ދައްކަ އެވެ.

އިޒްރޭލަށް އީރާނުން ހަމަލާ ދިން ދުވަހު އިޒްރޭލުން ވަނީ އެއްގަމު މަގުން ލުބްނާނަށް އަރައި ހިޒްބުﷲގެ މަގާމުތަކަށް ހަމަލާދޭން ފަށައިފަ އެވެ.

އޭއެފްޕީއާ ވާހަކަ ދެއްކި އިޒްރޭލުގެ އަސްކަރީ އޮފިޝަލުން ބުނީ އިޒްރޭލުން މިހާރު ދަނީ އީރާނަށް ރައްދު ހަމަލާދޭން ތައްޔާރުވަމުން ކަމަށެވެ. އިޒްރޭލަށް އީރާނުން ދެ ފަހަރު އެތައް ސަތޭކަ މިސައިލަކުން ހަމަލާދީފިކަން ފާހަގަކޮށް އިޒްރޭލުގެ ބޮޑުވަޒީރު ބިންޔާމިން ނަތަންޔާހޫ ވެސް ވަނީ ތަކުރާރުކޮށް އިންޒާރު ދީފަ އެވެ.

"އިޒްރޭލުގެ ދިފާއުކުރުމާއި މި ހަމަލާތަކަށް ރައްދު ދިނުމުގެ މަސްއޫލިއްޔަތާއި ހައްގު އެބައޮތް. އެކަން ކުރާނަން،" ނަތަންޔާހޫ ބުންޏެވެ.

ނަތަންޔާހޫއަށް ފާޑުކިޔާ ފަރާތްތަކުން ތުހުމަތު ކުރާ ގޮތުގައި ޣައްޒާގެ ހަނގުރާމަ ހުއްޓާލުމަށާއި ހަމާސް ޖަމާއަތުން އަދިވެސް ހިފަހައްޓައިގެން ތިބި މީހުން މިނިވަން ކުރުމުގެ އެއްބަސްވުމަށް ހުރަހަކީ ވެސް އޭނާ އެވެ.