އަސްކަރީ ބާރުން އެކަނި ރަހީނުން ސަލާމަތެއް ނުވާނެ: ގަލަންޓް

ފަލަސްތީނުގެ ހަމާސް އިން ޣައްޒާގައި ހިފަހައްޓާފައި ތިބި ރަހީނުން މިނިވަންކުރުމަށް "ހިތްދަތި ފިޔަވަޅުތަކެއް" އަޅަންޖެހިދާނެ ކަމަށާއި، ހަމައެކަނި އަސްކަރީ މަސައްކަތުން މަގްސަދު ހާސިލްނުވާނެ ކަމަށް އިޒްރޭލުގެ ޑިފެންސް މިނިސްޓަރު ޔޯވް ގަލަންޓް އިއްޔެ ބުނެފި އެވެ.

"ހަމައެކަނި އަސްކަރީ ފިޔަވަޅުތަކުން އެކަނި ހުރިހާ މަގްސަދެއް ޙާޞިލެއް ނުކުރެވޭނެ... ރަހީނުން އަނބުރާ ގެނައުމުގެ ޒިންމާ އަދާކުރުމަށްޓަކައި، ހިތްދަތި ފިޔަވަޅުތަކެއް އަޅަންޖެހޭނެ" ކަމަށް ގަލަންޓް ބުންޏެވެ.

އޭނާ މިހެން ބުނީ ހަމާސްއިން އޮކްޓޯބަރު 7 ގައި ދިން ހަމަލާއަށް ހިބްރޫ ކަލަންޑަރުގެ އަހަރީ ދުވަހާ ގުޅިގެން ދިން ބަޔާނެއްގަ އެވެ.

ގަލަންޓް ބުނީ އަހަރަކަށްވުރެ ގިނަ ދުވަހުގެ ހަނގުރާމައިގައި އަސްކަރީ ކާމިޔާބީތަކެއް ވެސް ހާސިލްލުކުރެވިފައިވާ ކަމަށް ވެސް ބުނެފަ އެވެ.

"ދެކުނުގައި، އަސްކަރީ ޖަމާއަތެއްގެ ގޮތުގައި ހަމާސް ހަރަކާތްތެރިވުން ހުއްޓިފައިވޭ، އުތުރުގައި، ހިޒްބުﷲ އަށް ގެއްލުންތައް ލިބެމުންދޭ އަދި އެ ޖަމާއަތުގެ ލީޑަޝިޕް ނައްތާލެވިފައިވޭ، އެ ޖަމާއަތުގެ ގިނަ ރޮކެޓް އާސެނަލްތައް ނައްތާލެވި، އެމީހުންގެ ބާރުތައް ބޯޑަރު ސަރަހައްދުން ފަހަތަށް ޖެހިފައިވޭ،" އޭނާ ބުންޏެވެ.

އިޒްރޭލުގެ ތަފާސްހިސާބުތަކުގެ މައްޗަށް ބިނާކޮށް އޭއެފްޕީން އެއްކުރި މައުލޫމާތުން ދައްކާ ގޮތުގައި، ހަމާސްގެ އޮކްޓޯބަރު 7 ގެ ހަމަލާގައި 1,206 މީހުން މަރުވި އެވެ. މީގެ ގިނައީ އާންމުންނެވެ.

ޣައްޒާގެ ސިއްހީ ވުޒާރާގެ ތަފާސްހިސާބުތަކުން ދައްކާ ގޮތުގައި، މިހާތަނަށް އިޒްރޭލުގެ ހަމަލާތަކުގައި މަދުވެގެން 42,924 މީހަކު ފަލަސްތީނުން ޝަހީދުވެއްޖެ އެވެ. މީގެ ތެރޭގައި ވެސް ގިނައީ އާންމުންނެވެ.

މި ހަނގުރާމައިގެ ސަބަބުން، އީރާނުގެ އެހީތެރިކަން ލިބޭ ސަރަހައްދުގެ އެކި ޖަމާއަތްތައް މީގެ ތެރެއަށް ވަދެފައިވެ އެވެ. ހާއްސަކޮށް ލުބުނާނުގެ ހިޒްބުﷲ އެވެ. ސެޕްޓެމްބަރު މަހުގެ ފަހުކޮޅުން ފެށިގެން އިޒްރޭލުން ވަނީ ލުބުނާނަށް ވައިގެ މަގުންނާއި އެއްގަމު މަގުން ހަމަލާތައް ދީފަ އެވެ. -- އޭއެފްޕީ