"އިންޑިއާ އައުޓް ކެމްޕެއިނަކީ ޔާމީންގެ ކަމެއް، މި ސަރުކާރު އެކަމުން ބަރީއަވަން"

އިންޑިއާ އައުޓް ކެމްޕެއިނަކީ ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން ފެށްޓެވި މަސައްކަތެއް ކަމަށާއި މި ސަރުކާރުން އެކަމުން އެއްކޮށް ބަރީއަވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.

އިންޑިއާގެ "ވިއޯން ނިއުސް" އަށް ދެއްވި އިންޓަވިއުއެއްގައި ހަލީލް ވިދާޅުވީ އިންޑިއާ އައުޓް ކެމްޕެއިންގައި އިސްކޮށް އުޅުއްވި ޔާމީން ވަނީ ރައީސް ޑރ. މުހައްމަދު މުއިއްޒުގެ ސަރުކާރާ ފެއަށް ޖެހިވަޑައިގެންފަ އެވެ. އަދި ވަކި ޕާޓީއެއް އުފައްދަވައިގެން ސަރުކާރާ ދެކޮޅަށް އެމަނިކުފާނު މަސައްކަތް ކުރައްވަމުން އަންނަ ކަމަށް ހަލީލް ވިދާޅުވި އެވެ.

ރާއްޖެ އާއި އިންޑިއާ ދެމެދު އޮތް ގުޅުން އިތުރަށް ވަރުގަދަ ކުރުމަށް އިންޑިއާ އާއެކު ކުރިޔަށް ވަޑައިގަންނަވާނެ ކަމަށް ރައީސް ތަކުރާރުކޮށް ވިދާޅުވެފައިވާ ކަމަށް ހަލީލް ވިދާޅުވި އެވެ.

"އިންޑިއާގެ ގުޅުމަކީ އަޅުގަނޑުމެންނަށް ވަރަށް ހާއްސަ އަދި އިސްކަން ދޭނެ ގުޅުމެއް." ހަލީލް ވިދާޅުވި އެވެ. "އަޅުގަނޑުމެން އެކަމުން [އިންޑިއާ އައުޓް ކެމްޕެއިން] އިން އެއްކޮށް ބަރީއަވަން." އޭނާ ވިދާޅުވި އެވެ.

ހަލީލް ވިދާޅުވީ އެ ކެމްޕެއިނާ ސަރުކާރުން ކަނޑައެޅިގެން ދެކޮޅު ހެދި ނަމަވެސް އެ ސިޔާސަތާ ދިމާނުވާ ގޮތަށް ސަރުކާރުގެ ތެރޭގައި ތިބި ބައެއް ފަރާތްތަކުން ބައެއް ފަހަރު ޖަޒުބާތުގައި ޖެހިގެން އެއްޗެހި ވިދާޅުވާ ކަމަށެވެ.

ނަމަވެސް އެއީ ސަރުކާރުގެ ސިޔާސަތެއް ނޫން ކަމަށާއި އަދި އެފަދަ ފަރާތްތަކާ މެދު ރައީސް ފިޔަވަޅު އެޅުއްވުމަކީ އިންޑިއާއާ ދެމެދު އޮތް ގާތް ގުޅުމުގެ ހެއްކެއް ކަމަށް އޭނާ ވިދާޅުވި އެވެ.

ހަލީލް ވިދާޅުވި ގޮތުގައި އިންޑިއާގެ ސެކިއުރިޓީ އަކީ ރާއްޖޭގެ ވެސް ސެކިއުރިޓީ އެވެ.

އެހެންކަމުން އިންޑިއާ ކަނޑުގެ ސުލްހަ އާއި ސަލާމަތީ ކަންކަމަށް ފުރިހަމަ އަށް އެއްބާރުލުން ދޭނެ ކަމުގެ ޔަގީންކަން ހަލީލް ދެއްވި އެވެ.