އިންޑިއާއާ އެކު އޮންނަ ގުޅުން ހީނަރުވިޔަ ނުދޭނެ: ހަލީލް

ބައިނަލްއަގުވާމީ މައިދާނުގައި އެހެން ގައުމުތަކާ އޮންނަ ރަހުމަތްތެރިކަމުގެ ގުޅުމާ އެކު، އިންޑިއާގެ ގުޅުން ހީނަރުވިޔަ ނުދޭނެ ކަމަށް މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.

މިދިޔަ ހަފުތާ ބަންދުގައި އިންޑިއާ އަށް ކުރެއްވި ރަސްމީ ދަތުރުގައި، އެ ގައުމުގެ ވިއޯން ނޫހަށް ދެއްވި އިންޓަވިއުއެއްގައި، ޗައިނާއާ އެކު އޮންނަ ގާތް ގުޅުމުގެ ސަބަބުން އޮންނަ އިންޑިއާގެ ނުތަނަވަސްކަމާ ގުޅޭގޮތުން ހަލީލަށް ވަނީ ސުވާލު އަމާޒު ވެފަ އެވެ.

އެ ސުވާލަށް ޖަވާބު ދެއްވަމުން، ހަލީލް ވިދާޅުވި ގޮތުގައި، ބަވަނަވެފައިވާ ދުނިޔޭގައި، ގައުމުތަކާ އެކު ގާތް ރަހުމަތްތެރި ގުޅުމެއް ގާއިމުވެފައި އޮތުމަކީ ރާއްޖެ އަށް އެންމެ ފައިދާ ބޮޑު ސިޔާސަތު ކަމަށެވެ.

ނަމަވެސް، ވިޔަފާރި އާއި ތަރައްގީ އަދި އިޖުތިމާއީ ފަދަ ގިނަ ދާއިރާތަކުން ރާއްޖެ އާއި އިންޑިއާއާ ދެމެދު އޮތީ ޒަމާންވީ ގުޅުމެއް ކަން މިނިސްޓަރު ފާހަގަކުރެއްވި އެވެ.

އެހެން ގައުމުތަކާ އެކު އޮންނަ ގުޅުމުގެ ތެރެއިން، ރާއްޖެ އާއި އިންޑިއާއާ ދެމެދު އޮތް ގުޅުން ހީނަރުވިޔަ ނުދޭނެ ކަމުގެ ޔަގީންކަން ވެސް ހަލީލް ދެއްވި އެވެ.

"އިންޑިއާ އަކީ ރާއްޖެއާ އެންމެ އަވައްޓެރި ގައުމު. ރާއްޖެއަށް ކުރިމަތިވާ ކޮންމެ ކަމެއްގައި އިންޑިއާ އަކީ އެންމެ ފުރަތަމަ އިޖާބަދޭ ގައުމު. އެހެންވީމާ އެހެން ގައުމަކާ އޮންނަ ގުޅުމުގެ ސަބަބުން، އިންޑިއާއާ އެކު އޮންނަ ގުޅުން ހީނަރުވިޔަ ނުދޭނަން،" މިދިޔަ އަހަރުގެ ސެޕްޓެމްބަރު 30 ގައި މަގާމާ ހަވާލުވެވަައިގެންނެވި ފަހުން އިންޑިއާ އަށް ކުރެއްވި ފުރަތަމަ ރަސްމީ ދަތުރުގައި ހަލީލް ވިދާޅުވި އެވެ.

ހަލީލް ވިދާޅުވި ގޮތުގައި، މުޅި އިންޑިއާ ކަނޑުގެ ސަރަހައްދުގެ ރައްކާތެރިކަމާއި ހަމަޖެހުން ގުޅިފައިވަނީ އިންޑިއާގެ ސަލާމަތާއި ރައްކާތެރިކަމުގެ މައްޗަށެވެ.

މި އިންޓަވިއުގެ ތެރެއިން، ހަލީލް ވަނީ، އޭރުގެ އިދިކޮޅު ޕާޓީގެ ގޮތުގައި އޮވެގެން ކުރިއަށް ގެންދިޔަ "އިންޑިއާ އައުޓް" ކެމްޕޭނާ ވެސް ފެއަށް ޖެހިވަޑައިގެންފަ އެވެ.

އެ ކެމްޕެއިނަކީ ހަލީލް ވިދާޅުވި ގޮތުގައި ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން ފެއްޓެވި މަސައްކަތެކެވެ. މި ސަރުކާރުން އެކަމުން ބަރީއަވާ ކަމަށް އޭނާ ވިދާޅުވި އެވެ.

ހަލީލް ވިދާޅުވީ އެ ކެމްޕެއިނާ ސަރުކާރުން ކަނޑައެޅިގެން ދެކޮޅު ހެދި ނަމަވެސް އެ ސިޔާސަތާ ދިމާނުވާ ގޮތަށް ސަރުކާރުގެ ތެރޭގައި ތިބި ބައެއް ފަރާތްތަކުން ބައެއް ފަހަރު ޖަޒުބާތުގައި ޖެހިގެން އެއްޗެހި ވިދާޅުވާ ކަމަށެވެ.

ނަމަވެސް އެއީ ސަރުކާރުގެ ސިޔާސަތެއް ނޫން ކަމަށާއި އަދި އެފަދަ ފަރާތްތަކާ މެދު ރައީސް ފިޔަވަޅު އެޅުއްވުމަކީ އިންޑިއާއާ ދެމެދު އޮތް ގާތް ގުޅުމުގެ ހެއްކެއް ކަމަށް އޭނާ ވިދާޅުވި އެވެ.