ވިނީ އަށް ރަތެއް، ރެއާލަށް ފަހު ވަގުތު މޮޅެއް

ވިނީ ޖޫނިއާ އަށް ދެއްކި ރަތްކާޑާ އެކު އެކަކު މަދުކޮށް ކުޅެ ރެއާލް މެޑްރިޑުން ފަހު ވަގުތު ފަހަތުން އަރައި 2-1 އިން ވެލެންސިއާ ބަލިކޮށް ތާވަލުގެ އެއް ވަނަ އަށް އަރައިފަ އެވެ.\

ރެއާލް އެއް ވަނައިގައި އޮތީ 19 މެޗު ކުޅެގެން 43 ޕޮއިންޓް ހަމަކޮށްގެންނެވެ. ދެ ވަނައިގައި 18 މެޗު ކުޅެގެން އޮތީ 41 ޕޮއިންޓާ އެކު އޮތީ އެތުލެޓިކޯ މެޑްރިޑެވެ. ފަހަކާ ޖެހެންދެން އެއް ވަނައިގައި އޮތް ބާސެލޯނާ މިހާރު އޮތީ 38 ޕޮއިންޓާ އެކު އެވެ.

ވެލެންސިއާގެ ސްޓޭޑިއަމުގައި ކުޅުނު މި މެޗުގެ 27 ވަނަ މިނެޓުގައި އެ ޓީމުގެ ހޫގޯ ޑުރޯ ލީޑު ނެގި އެވެ. އޭގެ ފަހުން ރެއާލަށް އެއްވަރުކުރަން ލިބުނު ރަނުގެ ފުރުސަތު ގެއްލުނީ ޖޫޑް ބެލިންހަމް އަތުން ޕެނަލްޓީ ނާކާމިޔާބުވުމުންނެވެ.

މެޗުގެ ފަހު 15 މިނެޓަށް ދިޔައިރު ވެސް ބަލިވެފައި އޮތް ރެއާލަށް އިތުރު މައްސަލައެއް ދިމާވީ 79 ވަނަ މިނެޓުގައި އެ ޓީމުގެ އެންމެ މުހިއްމު އެއް ކުޅުންތެރިޔާ ވިނީ އަށް ރަތްކާޑު ދެއްކުމުންނެވެ. ވިނީ ދަނޑުން ފޮނުވާލީ ވެލެންސިއާގެ ގޯލްކީޕަރު އޭނާ ކޮއްޕާލުމުން ރައްދުގައި ކަންފަތްމަތީ ޖެހުމުންނެވެ. ވީއޭއާރް ބެލުމަށް ފަހު ރެފްރީ ވިނީ އަށް ރަތްކާޑު ދެއްކުމުން އޭނާ ރުޅިގަދަވެ ރެފްރީއާ ދިމާލަށް ދާން ވެސް މަސައްކަތްކުރި އެވެ.

އެކަކު މަދުކޮށް ކުޅެމުން ދިޔަ ރެއާލަށް އެއްވަރުކޮށްދިނީ 85 ވަނަ މިނެޓުގައި ލޫކާ މޮޑްރިޗެވެ. އަދި އިތުރު ވަގުތުގެ ފަސް ވަނަ މިނެޓުގައި ބެލިންހަމް ގޯލް ޖަހައި އެ ޓީމު މޮޅުކޮށްދިނެވެ.

ރެއާލުގެ ކޯޗު ކާލޯ އަންޗެލޮޓީ ވިނީ އަށް ދެއްކި ރަތްކާޑު ބަލައިނުގަންނަ ކަމަށާއި އެ ކާޑުގެ މައްސަލަ އެޕީލްކުރާނެ ކަމަށެވެ.

"އެއީ ދެ ކުޅުންތެރިންނަށް ރީނދޫ ކާޑު ދައްކައި ނިންމާލަން ޖެހޭ ކަމެއް،" އަންޗެލޮޓީ ބުންޏެވެ.

އޭނާ ބުނީ ފުރަތަމަ ހާފުގައި ރެއާލުގެ ފަރާތުން ފެނުނީ ދަށް ކުޅުމެއް ކަމަށާއި އެކަމަކު ފަހު ވަގުތު އެކަކު މަދުކޮށް ކުޅެ ދެއްކީ އެހާ މޮޅު ކުޅުމެއް ކަމަށެވެ.

"ވަރަށް މުހިއްމު ތިން ޕޮއިންޓް މި ލިބުނީ،" އަންޗެލޮޓީ ބުންޏެވެ.