މޮޅުވެގެން އުފާފާޅުކޮށްލާނެ ފުރުސަތެއް ރެއާލަށް ނުލިބުނު، އަނިޔާގެ ވޭން އިތުރަށް ބޮޑުވެއްޖެ

މެޑްރިޑް (ނޮވެމްބަރު 10) – އޮސަސޫނާއާ ދެކޮޅަށް ކުޅުނު މެޗުން މޮޅުވެ، އުފާފާޅުކޮށްލާނެ ފުރުސަތު ވެސް ނުލިބި ރެއާލް މެޑްރިޑަށް އަނިޔާގެ އިތުރު މައްސަލަތަކެއް ކުރިމަތިވެއްޖެ އެވެ.

ވިނީޝިއުސް ޖޫނިއާގެ ހެޓްރިކާއި މި ސީޒަނުގައި ޖޫޑެ ބެލިންހަމް ޖެހި ފުރަތަމަ ގޯލާ އެކު އޮސަސޫނާގެ މައްޗަށް ބޮޑު މޮޅެއް ހޯދި މެޗަކީ މޮޅުވުމުގެ ރޭހަށް، ރެއާލުން އެނބުރި އައި މެޗެވެ. އޭގެ ކުރިން ކުޅުނު ދެ މެޗުގައި އެ ޓީމު ވަނީ ބާސެލޯނާ އާއި އޭސީ މިލާން އަތުން ބަލިވެފަ އެވެ. އެ ހިތްހަމަޖެހުމުގައި އުފާފާޅުކޮށްލާނެ ފުރުސަތެއް އެ ޓީމަށް ނުލިބުނެވެ.

އެ މެޗުގެ ކުރިން ވެސް، އެ ޓީމު އޮތީ އަނިޔާގެ ބަލި އެނދުގަ އެވެ. އަނިޔާގެ ލިސްޓްގައި އެންމެ ގިނައިން ތިބީ ވެސް ދިފާއީ ކުޅުންތެރިންނެވެ.

ރޭގެ މެޗުގައި އަނިޔާވި، ޑިފެންޑަރު އެޑާ މިލިޓާއޯގެ ލިގަމެންޓަށް ވަނީ ސީރިއަސް މައްސަލަތަކެއް ކުރިމަތި ވެފަ އެވެ. ރެއާލްގެ އެތެރޭގެ މަސްދަރަކާ ހަވާލާދީ އީއެސްޕީން އިން ބުނީ ނުވަ މަސް ދުވަހު، މިލިޓާއޯ ކުޅުމާ ދުރުގައި ހުންނަން ޖެހޭނެ ކަމަށެވެ.

ރޭގެ މެޗުގައި ރޮޑްރިގޯ ގޮއިސް އާއި ލޫކަސް ވަޒްކުއޭޒް ވެސް ބަދަލު ކުރަން ޖެހުނީ އަނިޔާވެގެންނެވެ. އެ ދެ ކުޅުންތެރިން ކުޅުމާ ދުރުގައި ތިން ހަފުތާ ހޭދަ ކުރަން ޖެހޭނެކަމަށް އީއެސްޕީއެންގައި ބުނެފައި ވެ އެވެ. އެ ތިން ކުޅުންތެރިންނަށް ވެސް އަނިޔާވީ މެޗުގެ ފުރަތަމަ ހާފުގަ އެވެ.

ރެއާލްގެ ކޯޗު ކާލޯ އަންޗެލޮޓީ ބުނީ ޓީމު ރަނގަޅަށް ކުޅުނު ނަމަވެސް ލަދުވެތި ކަމަކީ ފުރަތަމަ ހާފުގައި ކުރިމަތިވި އަނިޔާގެ މައްސަލަތައް ކަމަށެވެ.

ޖެނުއަރީ ޓްރާންސްފާގައި ކުޅުންތެރިންގެ ނުގެންނާނެ ކަމަށް ކުރިން ބުނި ރެއާލުން ވަނީ މިހާރު ވިސްނުން ބަދަލުކޮށްފަ އެވެ. އަންޗެލޮޓީ ރޭ ބުނީ އަންނަ މަހުގައި އެ ފުރުސަތުތަކަށް ކްލަބުން ބަލާނެ ކަމަށެވެ.

ރެއާލްގެ ދިފާއި ކުޅުންތެރިންގެ ތެރެއިން ޑެނީ ކާވަހާލް އަށް ކުރިމަތިވި އަނިޔާގައި، އޭނާ އަށް ވަނީ ސީޒަން ނިމިފަ އެވެ. ޑޭވިޑް އަލަބާ ވެސް ކުޅުމުގެ ތެރެއަށް އެނބުރި އަންނާނެ ދުވަހެއް ނޭނގެ އެވެ. ކީޕަރު ޓިބޯ ކޯޓުއާ ވެސް ހުރީ އަނިޔާގަ އެވެ. ސެންޓްރަލް ޑިފެންޑަރުގެ މަގާމަށް ވެސް ކުޅެވޭ، މިޑްފީލްޑަރު އައުރޭލިއަން ޗުއަމެނީ ވެސް ހުރީ އަނިޔާގަ އެވެ.

މެޗަށް ފަހު ރެއާލްގެ މޮރޮކޯ ފޯވާޑް ބްރަހީމް ޑިއާޒް ބުނީ ކުޅުންތެރިންނަށް ކުރިމަތިވި އަނިޔާގެ ވާހަކަ ދައްކަން ވެސް ހިތައް ދަތިވާ ކަމަށެވެ.

"އެވާހަކަ ދައްކަން އަހަރެން ބޭނުމެއް ނޫން، އަހަރެމެންގެ ކުޅުންތެރިން ރޮމުންދާތަން ފެނުމުން އަހަރެންގެ ހިތައް ތަދުވާތީ،" ގިނަ ދުވަސްތަކެއް އަނިޔާގައި ހުރުމަށް ފަހު، އެނބުރި އައި ބްރަހީމް ބުންޏެވެ.