ފާޑުކިޔުންތަކަށް އެމްބާޕޭ ރައްދު ދިނީ "ވަރަށް ނުރައްކާ"ކޮށް

މެޑްރިޑް (ޑިސެމްބަރު 2) – ގެޓާފޭއާ ދެކޮޅަށް ރެއާލް މެޑްރިޑުން ރޭ ކުޅުނު މެޗުގައި ކީލިއަން އެމްބާޕޭ ފެނުނީ ވަރަށް ނުރައްކާ ކުޅުންތެރިއެއްގެ ގޮތުގައި ކަމަށް ބުނެ އޭނާ އަށް ކުރިމަތިވާ ފާޑުކިޔުންތަކަށް އެ ޓީމުގެ ކޯޗު ކާލޯ އަންޗެލޮޓީ ރައްދުދީފި އެވެ.

ރޭގެ މެޗަށް ނުކުތް އިރު އެމްބާޕޭ އަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ. ޗެމްޕިއަންސް ލީގުގައި އެންމެ ފަހުން ލިވަޕޫލާ ދެކޮޅަށް ރެއާލުން ކުޅުނު މެޗުގައި، އެމްބާޕޭ ދެއްކި ދަށް ކުޅުމާ އެކު އޭނާ އަށް މިދިޔަ ހަފުތާގައި ކުރިމަތިވި ފާޑުކިޔުންތައް ވީއިތުރެވެ.

އެކަމަކު ރޭ ގެޓާފޭ އަތުން 2-0 އިން ރެއާލް މޮޅުވި މެޗުގައި އޭނާ ޖެހި މޮޅު ގޯލާ އެކު ފާޑުކިޔުންތަކަށް މިވަނީ ރައްދުދީފަ އެވެ.

ރެއާލްގެ އަމިއްލަ ދަނޑު، ސެންޓިއާގޯ ބާނެބެއޫގައި ކުޅުނު މެޗު ރެއާލްގެ ފުރަތަމަ ލަނޑު ޕެނަލްޓީ އަކުން ޖެހީ ޖޫޑް ބެލިންހަމް އެވެ. ރެއާލްގެ ޕެނަލްޓީ ޖަހާ ކުޅުންތެރިންގެ ލިސްޓްގައި އެންމެ ކުރީގައި އޮތް އެމްބާޕޭގެ ބަދަލުގައި ޕެނަލްޓީ ޖެހީ ބެލިންހަމް އެވެ. ލިވަޕޫލާ ދެކޮޅަށް ކުޅުނު މެޗުގައި ރެއާލް އަށް ލިބުނު ޕެނަލްޓީ، ނާކާމިޔާބުކޮށްލުމުން، ރޭގެ މެޗުގައި ޕެނަލްޓީ ޖަހަން އިހްތިޔާރު ދިނީ ބެލިންހަމް އެވެ.

ގެޓާފޭގެ ކީޕަރު ޑޭވިޑް ސޯރިއާ ނުބައި ފަޅިއަކަށް ޑައިވް ކުރި އިރު ބެލިންހަމް، ތިރިތިރިން ބޯޅަ ފޮނުވާލީ ގޯލްގެ މެދަށެވެ.

އެމްބާޕޭ ލަނޑު ޖެހީ ބެލިންހަމް ދިން ޕާސް ލިބިގަނެ އޭރިއާގެ ތެރެއަށް ވަދެ، ކަނާދިމާލުގައި ހުރެފައި ގޯލްގެ ތިރީ ކަނަށެވެ.

ދެ ވަނަ ހާފުގައި ވެސް އޭނާ އަށް ލަނޑު ޖަހާނެ އިތުރު ފުރުސަތުތައް ލިބިގެން ދިޔަ އެވެ.

ރެއާލްގެ ބްރެޒިލްގެ ފޯވާޑް އެންޑްރިކް، މެޗަށް ނުކުންނަން ވޯމްއަޕް ވެސް ކުރި އެވެ. އެކަމަކު އަންޗެލޮޓީ ނިންމީ ބަދަލު ނުކޮށް އެމްބާޕޭ ދަނޑުގައި ބަހައްޓާށެވެ.

"އަހަރެން ނިންމީ އެ ބަދަލު ނުގެންނަން. ސަބަބަކީ ހަމަލާތަކުގައި އެމްބާޕޭ ފެނުނީ ވަރަށް ނުރައްކާކޮށް ކަމަށްވާތީ،" އަންޗެލޮޓީ ބުންޏެވެ.

މެޗުން ހޯދި ތިން ޕޮއިންޓާ އެކު ރެއާލުން ވަނީ، އެއް ވަނައިގައި އޮތް ވާދަވެރި ބާސެލޯނާއާ އެއް ޕޮއިންޓަށް ފަރަގު ކުޑަކޮށްފަ އެވެ. ޖުމުލަ 34 ޕޮއިންޓް ހޯދާފައިވާ ބާސާއިން ވަނީ ރެއާލް އަށް ވުރެ އިތުރަށް އެއް މެޗު ކުޅެފަ އެވެ.