އެސްޓީއޯގެ ޑިޖިޓަލް ކަލަންޑަރު 2025އަށް އަޕްޑޭޓުކޮށް "ރީޔޫސް" ކުރަނީ

އެސްޓީއޯއިން މިދިޔަ އަހަރު ތައާރަފްކުރި ޑިޖިޓަލް ކަލަންޑަރުގެ ސޮފްޓްވެއާ އަޕްޑޭޓުކޮށް އެ ކަލަންޑަރު 2025ގައި "ރީޔޫސް" ކުރަން ނިންމައިފި އެވެ

އެ ކުންފުނިން ބުނީ 2025ވަނަ އަހަރުގެ ސޮފްޓްވެއާ އަޕްޑޭޓްކުރުމުގެ މައުލޫމާތާއި އިރުޝާދު އެސްޓީއޯ ވެބްސައިޓާ ސޯޝަލްމީޑިއާ މެދުވެރިކޮށް ވަރަށް އަވަހަށް ހިއްސާކުރާނެ ކަމަށެވެ. އަދި އާ ސޮފްޓްވެއާގައި އިނޮވޭޝަނާއި ޔޫޒާ އެކްސްޕީރިއަންސަށް އަހައްމިއްޔަތުކަން ދީފައިވާނެ ކަމަށާއި ފަސޭހައިން ސޮފްޓްވެއާ އަޕްޑޭޓްކުރުމުގެ އިތުރުން، ޑިޖިޓަލް ޓޫލްތަކާ ގުޅުވުމާ, ބޭނުންހިފޭ އިތުރު ކަންކަން ހިމެނިގެންދާނެ ކަމަށް ވެސް އެ ކުންފުނިން ބުންޏެވެ.

އަދި އާ އަޕްޑޭޓުގައި އާ ތީމްތަކާއި ވިޝުއަލްސްގެ އިތުރުން ކަސްޓަމް ރިމައިންޑާސް، އަދި އެސްޓީއޯގެ ބައެއް ބްރޭންޑްތަކުގެ މައުލޫމާތު ލިބޭނެ ކަމަށް ވެސް ބުންޏެވެ.

އެސްޓީއޯއިން މިދިޔަ އަހަރު ތައާރަފްކުރި ޑިޖިޓަލް ކަލަންޑަރަކީ އެ ކުންފުނީގެ ވިޔަފާރި އާއި ކުންފުނީގެ އާއްމު ހިންގުމުގައި ގެންގުޅޭ ސަސްޓެއިނަބިލިޓީ، އިނޮވޭޝަން ،އަދި ޑިޖިޓަލް ޓްރާންސްފޯމަޝަން ވިސްނުމުގެ ދަށުން އެ ކުންފުނިން ތައާރަފްކުރި ކަލަންޑަރެކެވެ.

އެސްޓީއޯއިން ބުނީ އެހެން އަހަރުތަކާ ހިލާފަށް އާ ކަލަންޑަރެއް ނެރުމުގެ ބަދަލުގައި މިދިޔަ އަހަރުގެ ކަލަންޑަރުގެ ސޮފްޓުވެއާ އަޕްޑޭޓުކޮށް އެ ކަލަންޑަރު "ރީޔޫސް" ކުރަން ނިންމީ ކުންފުނީގެ ސަސްޓެއިނަބިލިޓީގެ ވިސްނުމުގެ ދަށުން ކަމަށެވެ. އަދި އެއީ އެސްޓީއޯގެ ޕޭޕަލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަކުރުމަށް ކުރަމުންދާ މަސައްކަތްތަކަށް އިތުރަށް ބާރު ދިނުމުގެ ގޮތުން ނިންމި ނިންމުމެއް ކަމަށް ވެސް ބުންޏެވެ.

އެސްޓީއޯއިން ބުނީ ޕްރިންޓު ކަލަންޑަރެއް ނަމަ އަހަރެއްގެ މައްޗަށް އާންމުކޮށް އަށެއްކަހާސް ކަލަންޑަރު ޕްރިންޓު ކުރަން ޖެހޭ ކަމަށެވެ. އެހެން ކަމުން އެހާ ގިނަ ޕްރިންޓުކުރާ ކަލަންޑަރުތައް އުފެއްދުމާއި އުފުލުމުގައި ހީވެސް ނުކުރާ މިންވަރަށް ކާބަން ބޭރުވެފައިވާ ކަމަށް ބުންޏެވެ.

ކަލަންޑަރު ޕްރިންޓުކުރުން ހުއްޓާލުމަކީ އުކާލެވޭ ކުނި މަދުކޮށް، ގަސްތައް ސަލާމަތްކޮށް، ކާބަން ފުޓްޕްރިންޓް ކުޑަކުރަަން އެޅޭ ރަނގަޅު ފިޔަވަޅެއްގެ ގޮތުގައި އެ ކުންފުނިން ސިފަކުރެ އެވެ. އަދި ޕްރިންޓު ކަލަންޑަރު އުފެއްދުމުގައި އެތަައް ވަސީލަތަކާއި ވަގުތު ހޭދަވާ ކަމަށާއި ޑިޖިޓަލް ކަލަންޑަރު ތައާރަފްކޮށް އަލުން ބޭނުން ކުރުމަކީ މިލިއަނުން ކުރާ ހޭދަ ސަލާމަތްކުރެވޭނެ ކަމެއްގެ ގޮތުގައި ވެސް އެ ކުންފުނިން ފާހަގަކުރެ އެވެ.

އެސްޓީއޯ އަކީ ކަރުދާހަށް ކުރާ ހޭދަ ކުޑަކުރުމުގެ ސިޔާސަތުގެ ދަށުން ކަލަންޑަރުގެ އިތުރުން ކުންފުނީގެ ހިންގުމުގައި ކަރުދާސް ބޭނުންކުރާ މިންވަރު ވަރަށް ބޮޑަށް ދަށް ކޮށްފައިވާ ކުންފުންޏެކެވެ.