މަދުވީ އެސްޓީއޯގެ ހަކުރު ކޯޓާއިން ބައެެއް

އިންޑިއާ އިން ރާއްޖެ އަށް ކާޑުގެ ބާވަތްތައް އެތެރެކުރަން ދީފައިވާ ހާއްސަ ހުއްދައިގެ ދަށުން ދޫކޮށްފައިވާ ހަކުރު ކޯޓާ އިން މަދުވީ އެސްޓީއޯ އަށް ކަނޑައަޅާފައިވާ އަދަދުން ބައެއް ކަމަށް އެ ކުންފުނިން މިރޭ ބުނެފި އެވެ.

މިދިޔަ އޭޕްރީލް މަހު ރާއްޖެ އާއި އިންޑިއާއާ ދެމެދު ހަދާފައިވާ އެއްބަސްވުމެއްގެ ދަށުން، އަހަރު ތެރޭގައި، ހަކުރު ކޯޓާގެ ގޮތުގައި ރާއްޖެ އެތެރެ ކުރެވޭނީ 64،000 މެޓްރިކް ޓަނެވެ.

ހަކުރު ކޯޓާ އިން އެސްޓީއޯ އަށް ކަނޑައަޅާފައިވާ އަދަދުން ބައެއް މަދުވެފައިވާކަން އެ ކުންފުންޏަށް ވެސް ފާހަގަކުރެވިފައިވާ އިރު އިންޑިއާގެ ޑައިރެކްޓަރޭޓް ޖެނެރަލް އޮފް ފޮރިން ޑްރޭޑް (ޑީޖީއެފްޓީ) އިން ވެސް ވަނީ ރާއްޖޭގެ ކޯޓާ މެދުވެރިކޮށް، ލަންކާ އަށް ހަކުރު އެތެރެ ކުރާ ކަމުގެ މައްސަލައެއް ފެންމަތިވުމުން އެ މައްސަލަ ބަލަން ފަށައިފަ އެވެ.

އެ އިދާރާ އިން ބަލަމުން އަންނަނީ މިދިޔަ މަހުގެ 25 ގައި އިންޑިއާ އިން ބޭރު ކުރި 64 ހާސް ޓަނުގެ ހަކުރުގެ ޝިޕްމެންޓެއްގެ މައްސަލަ އެވެ. މި މައްސަލައާ ހެދި މިހާރު ވަނީ ރާއްޖެ އަށް އިންޑިއާ އިން ހަކުރު ގެނައުން މަޑުޖައްސާލާފައިވާ ކަމަށް ވެސް ބުނެފައި ވެ އެވެ.

އެސްޓީއޯ އިން ބުނީ، އެ މައްސަލަ އިންޑިއާ އިން ބަަލަމުން އައި ނަމަވެސް، ހަކުރު ސްޓޮކް އެބަހުރި ކަމަށާއި އާންމުންނަށް ހަކުރު ލިބުމުގައި އެއްވެސް ދައްޗެއް ދިމާނުވާނެ ކަމަށެވެ.

މި މައްސަލަ ފެންމަތިވުމާ އެކު، ލަންކާ އިން މިހާރު ވަނީ އިންޑިއާގެ ހަކުރު ޝިޕްމަންޓަށް ކްލިއަރެންސް ދިނުމުގެ މަސައްކަތް މެދުކަނޑާލައި، މައްސަލަ ބަލަން ފަށައިފަ އެވެ.

މިދިޔަ އޮކްޓޫބަރު މަހުގެ ނިޔަލަށް، އިންޑިއާ އިން ލަންކާ އަށް ގެންދިޔަ ހަކުރުގެ ތެރޭގައި ރާއްޖެ އަށް ދޫކުރި ހުއްދައިގެ ދަށުން ގެންގޮސްފައިވާ ހަކުރުގެ 80 ކޮންޓެއިނަރު ހިމެނޭ ކަމަށް ވެ އެވެ. އާންމުވެފައިވާ، ސެޕްޓެމްބަރު 30 ވަނަ ދުވަހުގެ ބިލް އޮފް ލޭޑިންއަކުން ދައްކާ ގޮތުގައި އިންޑިއާގެ ނެވާ ޝިވާ ޕޯޓުން ބޭރުކުރި 270 ޓަނުގެ ހަކުރުގެ ފައިނަލް ޕޯޓް އޮފް ޑެސްޓިނޭޝަނަކަށް ވެސް ޖަހާފައި އޮތީ ލަންކާގެ ކޮލަމްބޯ އެވެ.

އިންޑިއާއާ އެކު މިހާރު ވެފައިވާ އެއްބަސްވުމުގެ ދަށުން ރާއްޖެ އަށް ބޭނުންވާ އަސާސީ ނުވަ ބާވަތެއް ފަސޭހަކަމާއެކު އަދި ހާއްސަ އަގުތަކުގައި ރާއްޖެ އަށް ގެނެވެ އެވެ. އޭގެ ތެރޭގައި ހަނޑޫ، ހަކުރު، ފުށް، އަލުވި، ބިސް، ފިޔާ، މުގު، ހިލަ އަދި ހިލަވެލި ހިމެނެ އެވެ.