އިތުރު ހަތަރު ސްޓޭޝަނަކުން މާދަމާއިން ފެށިގެން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ: ރައީސް

އިތުރު ހަތަރު ސްޓޭޝަނަކުން މާދަމާ އިން ފެށިގެން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެއީ ޅ. ފެލިވަރާއި ގއ. ކޫއްޑު އާއި ކ. ހިންމަފުށި އަދި ސ. ހުޅުމީދޫ އެވެ.

މާދަމާ އިން ފެށިގެން މަސްވެރިންނަށް އެސްޓީއޯ ރޭޓުގައި ތެޔޮ ގަންނަން ލިބޭނީ، އެ ތަންތަނުގައި ހުންނަ ފިއުލް ސަޕްލައި މޯލްޑިވްސް (އެފްއެސްއެމް)ގެ ސްޓޭޝަންތަކުން ކަމަށް ރައިސް ވިދާޅުވި އެވެ.

ކ. ގާފަރަށް ވަޑައިގެން އެ ރަށުގެ ރައްޔިތުންނާ އެކު ބޭއްވި ބައްދަލުވުމުގައި ރައީސް ވިދާޅުވީ ސަރުކާރުން މަސައްކަތްކުރަމުން އަންނަނީ ކޫއްޑު އާއި ފެލިވަރުގައި ހުންނަ ސަރުކާރުގެ މަސް ކުންފުނި، މިފްކޯގެ ބޯޓުތަކުން ވެސް ހަމަ އެ ރޭޓުގައި މަސްވެރިންނަށް ތެޔޮ ދޫކުރަން ކަމަށެވެ.

އޭގެ އިތުރުން ވެސް ރާއްޖޭގެ އެހެން ސަރަހައްދުތަކުގައި ވެސް ކަނޑައެޅިފައިވާ ޕްލޭންގެ ތެރެއިން އިސްކަންދޭ ތަންތަނަށް ވިސްނައިގެން މަސްވެރިންނަށް ފަސޭހައިން ތެޔޮ ލިބޭނެ ގޮތް ހޯއްދަވައި ދެއްވުމަށް މަސައްކަތް ކުރަމުން އަންނަ ކަމަށް ވިދާޅުވި އެވެ.

"މި ގޮތަށް ގޮސް 2025 ނިމޭއިރު މުޅި ރާއްޖޭގައި، ވައުދުވީ ގޮތަށް އެސްޓީއޯ ރޭޓުގައި ތެޔޮ ލިބޭނެ... އަޅުގަނޑުމެން މަސައްކަތް މި ކުރަނީ މަސްވެރިންގެ އަޑު އަހައިގެން މަސްވެރިން އެދިވަޑައިގަންނަވާ ގޮތަށް ކަންތައްތައް ކުރެވޭތޯ،" އެ މަނިކުފާނު ވިދާޅުވި އެވެ.

ހުވަދު އަތޮޅުން މާލެއަށް ދަތުރުކުރާ މަސްވެރިންނަށް އެ ދަތުރުގެ މެދުތެރެއިން [މ. އަތޮޅުން] ތެޔޮ ލިބޭނެ ގޮތް ހެދުމުގެ ވިސްނުން ގެންގުޅުއްވާ ކަމަށް ވެސް ރައީސް ވިދާޅުވި އެވެ.

ރައީސް މުއިއްޒު މިއަދު ވަނީ މިދިޔަ އަހަރުގެ ރިޔާސީ އިންތިހާބު ކެމްޕެއިންގައި ވައުދު ވެވަޑައިގެންނެވި ގޮތަށް 48 ގަޑިއިރު ތެރޭގައި މަސްވެރިންނަށް މާދަމާ އިން ފެށިގެން ފައިސާ ދޫކުރަން ފަށާނެ ކަމަށް ވެސް މިއަދު އިއުލާނުކުރައްވައިފަ އެވެ.

ރައީސް ވިދާޅުވި ގޮތުގައި ކުރީގެ ސަރުކާރުން މަސްވެރިންނަށް ދައްކަން ޖެހޭ ފައިސާގެ ތެރެއިން ނުދައްކައި އޮތް 38 މިލިއަން ރުފިޔާ މިއަދު ވަނީ ދައްކައި ނިންމައިފަ އެވެ. މަސްވެރިންނަށް ދޭން ޖެހޭ ފައިސާގެ ބެކްލޮގް މިހާރު ހުސްކުރެވިފައި ވާތީ، ބީއެމްއެލްގައި އެކައުންޓު ހުރި ކޮންމެ މަސްވެރިއަކަށް މާދަމާ އިން ފެށިގެން 48 ގަޑިއިރު ތެރޭ ފައިސާ ދޫކުރަން ފަށާނެ ކަމަށް ރައީސް ވިދާޅުވި އެވެ