ބެކްލޮގް ހުސްކުރެވިއްޖެ، މާދަމާ އިން ފެށިގެން 48 ގަޑިއިރުތެރޭ މަސްވެރިންނަށް ފައިސާ ދޫކުރާނެ: ރައީސް

މިދިޔަ އަހަރުގެ ރިޔާސީ އިންތިހާބު ކެމްޕެއިންގައި ވައުދު ވެވަޑައިގެންނެވި ގޮތަށް 48 ގަޑިއިރު ތެރޭގައި މަސްވެރިންނަށް މާދަމާ އިން ފެށިގެން ފައިސާ ދޫކުރަން ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ކ. އަތޮޅަށަށް މިއަދު ފެއްޓެވި ދަތުރުފުޅުގައި ގާފަރަށް ވަޑައިގެން ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ ކުރީގެ ސަރުކާރުން މަސްވެރިންނަށް ދައްކަން ޖެހޭ ފައިސާގެ ތެރެއިން ނުދައްކައި އޮތް 38 މިލިއަން ރުފިޔާ މިއަދު ދައްކައި ނިންމާފައިވާ ކަމަށެވެ.

އެއީ ބީއެމްއެލްގައި އެކައުންޓު ގެންގުޅޭ 196 މަސްވެރިއަކާއި އެމްއައިބީގައި އެކައުންޓު އޮޕަރޭޓްކުރާ 20 މަސްވެރިންނަށް ދޫކުރި ފައިސާ އެވެ.

މަސްވެރިންނަށް ދޭން ޖެހޭ ފައިސާގެ ބެކްލޮގް މިހާރު ހުސްކުރެވިފައި ވާތީ، ބީއެމްއެލްގައި އެކައުންޓު ހުރި ކޮންމެ މަސްވެރިއަކަށް މާދަމާ އިން ފެށިގެން 48 ގަޑިއިރު ތެރޭ ފައިސާ ދޫކުރަން ފަށާނެ ކަމަށް ރައީސް މުއިއްޒު މިއަދު ވިދާޅުވި އެވެ. އެމްއައިބީގައި އެކައުންޓު ހުރި މަސްވެރިންނަށް 48 ގަޑިއިރު ތެރޭ ފައިސާ ހަމަޖެއްސުމުގެ މަސައްކަތް ކުރަމުން އަންނަ ކަމަށް ވެސް ރައީސް ވިދާޅުވި އެވެ.

ރައީސް ވިދާޅުވީ އެ ވައުދު ފުއްދެވުމަކީ ހާލަތު އޮތް ގޮތުން، ވެރިކަމާ ހަވާލުވެވަޑައިގަންނަވާތާ ދެވަނައަށްވާ ދުވަހު ކުރެވެން އޮތް ކަމެއް ނޫން ކަމަށެވެ.

"އެކަމަށް ވަގުތު ނަގާ. މިފްކޯއަށް ވެސް ބޮޑެތި އިސްލާހީ ބަދަލުތަކެއް ގެންނަން ޖެހިފައި އޮތް. އެ ކުންފުނީގެ އިދާރީ އިންތިޒާމުތައް ވެސް ހުރީ އެންމެ ރަނގަޅަކަށް ނޫން،" އެމަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި އެއީ އެ ވައުދު ފުއްދެވުމަށް ދިމާވި ބޮޑު ގޮންޖެހުމެކެވެ.

"އެންމެ ފަހުން މިދިޔަ 14 ދުވަަހުގެ ތެރޭގައި ގާތްގަނޑަކަށް 38 މިލިއަން ރުފިޔާ ހުރި ޕެންޑިންގައި މަސްވެރިންނަށް ދޭން. އެ 38 މިލިއަން ރުފިޔާ ދާދި ދެންމެއަކުވަނީ އޮޑިވެރިންނަށް ޖަަމާކޮށްދެވިފައި،" ރައީސް ވިދާޅުވި އެވެ.

މަސްވެރިންނަށް ފައިސާ ދޫކުރުމާ ގުޅޭ ގޮތުން ފިނޭންސް މިނިސްޓްރީ އާއި މިފްކޯ އަދި ބޭންކް އޮފް މޯލްޑިވްސްގެ މެދުގައި މުހިއްމު އެއްބަސްވުމެއް ގާއިމުކުރެވިފައިވާކަން ފާހަގަ ކުރައްވައި އެމަނިކުފާނު ވިދާޅުވީ އެ އެއްބަސްވުމުގެ ދަށުން ކުރިއަށް އޮތް ތަނުގައި މަސްވެރިންނަށް ފައިސާ ނުދެވި ލަސްވެ، ބެކްލޮގެއް ނުއުފެދޭނެކަމުގެ ޔަގީންކަން ވެސް ރައީސް ދެއްވި އެވެ.

ރައީސް މުއިއްޒުގެ ވައުދާ އެއްގޮތަށް މަސްވެރިންނަށް 48 ގަޑިއިރުގެ ތެރޭގައި މާދަމާއިން ފެށިގެން ފައިސާ ދޫކުރަން ފަށާނެކަން އެ މަނިކުފާނު އިއުލާން ކުރެއްވިއިރު މާދަމާއަކީ މި އަހަރުގެ މަސްވެރިންގެ ދުވަހެވެ.