މަސްވެރިންގެ ހުރި ކަންބޮޑުވުންތަކާ އެކު ކެޔޮޅުން ރައީސްގެ އަރިހަށް!

މަސްވެރިންގެ ހުރި ކަންބޮޑުވުންތައް ހިއްސާކުރުމަށް ބައެއް ކެޔޮޅުން ރައީސް ޑރ. މުހައްމަދު މުއިއްޒުއާ މިއަދު ބައްދަލުކޮށްފި އެވެ.

އެ ބައްދަލުވުން އޮތީ މިއަދު ހެނދުނު ރައީސް އޮފީހުގަ އެވެ.

ރައީސް އޮފީހުން ބުނީ މަސްވެރިކަމުގެ ސިނާއާތުގައި ރަނގަޅުކުރަން ބޭނުންވާ ކަންކަމާއި، އެ ސިނާއަތުގައި ހުރި ކަންބޮޑުންވުންތައް އެ ބައްދަލުވުމުގައި ކެޔޮޅުން ރައީސްއާ ހިއްސާކުރި ކަމަށެވެ. މަހުގެ އަގު ދަށް ކަމާއި ފައިސާ އާއި ތެޔޮ ލިބުމުގައި ހުރި ދަތިތަކާއި މަސްކިރުމުގައި ހުރި ގޮންޖެހުންތައް ވެސް، ކެޔޮޅުން ރައީސްއާ ހިއްސާކުރި ކަމަށް ރައީސް އޮފީހުން ބުންޏެވެ.

ރައީސްގެ ވައުދާ އެއްގޮތަށް މަސްވެރިކަމުގެ ސިނާއަތް ކުރިއެރުވުމަށް ކުރައްވާ މަސައްކަތްތައް ކުރިއަށް ގެންދެވުމަށް ވެސް ކެޔޮޅުން އެދުނު ކަމަށް ރައީސް އޮފީހުން ބުންޏެވެ.

ކެޔޮޅުން ވަނީ ޓެކްނޮލޮޖީގެ އެހީގައި މަސްވެރިކަމުގެ ސިނާއަތް ޒަމާނީ ފެންވަރުގައި ކުރިއެރުވުމަށް ކުރެވިދާނެ ކަންކަން ވެސް ރައީސްއާ ހިއްސާކޮށްފަ އެވެ. މަސްވެރިކަމުގެ މާކެޓް އިތުރުކޮށް، މަހުގެ ފެންވަރު ނުވަތަ ކޮލިޓީ ރަނގަޅުކުރުމަށް ކުރެވިދާނެ ކަންކަމާ ގުޅޭގޮތުން ވެސް އެ ބައްދަލުކުރެއްވުމުގައި ކެޔޮޅުން މަޝްވަރާކުރި އެވެ.

ސަރުކާރުން މަސްވެރިންނާއި ކެޔޮޅުންނާ ގާތުން، އެ މީހުންގެ ކަންބޮޑުވުންތަކަށް ހައްލު ލިބޭނެ ގޮތަށް މަސައްކަތް ކުރައްވާނެ ކަމަށް ރައީސް އެ ބައްދަލުވުމުގައި ވިދާޅުވި ކަމަށް ރައީސް އޮފީހުން ބުންޏެވެ.

"އަދި ބައްދަލުކުރެއްވުމުގައި ފާހަގަކުރެއްވި ކަންކަން، ވަރަށް ސީރިއަސް ގޮތެއްގައި ބައްލަވައި، އެ ކަންކަމަށް އަވަސް ފިޔަވަޅުތަކެއް އެޅުއްވުމަށް މަސައްކަތްޕުޅު ކުރައްވާނެ ކަމުގައި އެމަނިކުފާނު ވިދާޅުވި އެވެ. އަދި މިއަދު ކުރިއަށް ދިޔަ ފަދަ ބައްދަލުވުންތައް ގިނަ ގިނައިން ބޭއްވެވުމަށް މަސައްކަތްޕުޅު ކުރައްވާނެ ކަމުގައި ވެސް އެމަނިކުފާނު ވިދާޅުވި އެވެ،" ރައީސް އޮފީހުން ބުންޏެވެ.

އެ ބައްދަލުވުމުގައި ބައިވެރިވި ކެޔޮޅަކު ބުނީ ސަރުކާރުން ފަށާފައި ހުރި މަސްވެރިކަމާ ގުޅޭ ބައެއް މަޝްރޫއުތައް ހުއްޓިފައި ހުރުމުން އެ މަސައްކަތްތައް އަލުން ފެށުމާ ގުޅޭ ގޮތުން ވެސް އެ ބައްދަލުވުމުގައި ރައީސްއާ މަޝްވަރާކުރި ކަމަށެވެ.

މަސްވެރިންގެ ދުވަސް ފާހަގަކުރަން ހާއްސަ ބަޖެޓެއް ކަނޑައަޅައި ސަރުކާރުން މަސްވެރިންނަށް އިސްކަންދޭކަން އަންގައިދިނުމަށް ކެޔޮޅުން އެދުނު ކަމަށް ވެސް އޭނާ ބުންޏެވެ.

ފެލިވަރާއި ކޫއްޑޫގައި ހިންގާ މަސް ފެކްޓަރީ، ވަކި ދެ ކުންފުންޏެއްގެ ދަށުން ހިންގާ ތަނަކަށް ބަދަލުކޮށްދިނުމަށް ވެސް ކެޔޮޅުން ވަނީ ރައީސްގެ އަރިހުގައި އެދިފަ އެވެ.

"ރައީސް ވިދާޅުވީ އަޅުގަނޑުމެންގެ ފަރާތުން ލިބުނު ހިޔާލާއި، އަދި ރައީސަށް ވަރަށް ގިނަ ކަންކަން އޮޅުންފިލައިފި ކަމަށް ވެސް ވިދާޅުވި. އަދި އެއީ މީގެ ކުރިން ރައީސްއާ ހަމައަށް ތިލަ ނުވެ ހުރި މައުލޫމާތުތައް ކަމަށް ވެސް ވިދާޅުވި،" އޭނާ ބުންޏެވެ.