"ސްކުއިޑް ގޭމް"ގެ ދެވަނަ ސީޒަން 93 ގައުމެއްގެ އެއްވަނައިގައި

ނެޓްފްލިކްސް އިން ގެނެސްދޭ ދެކުނު ކޮރެއާގެ ކާމިޔާބު ތުރިލާ ވެބް ސީރީޒް "ސްކުއިޑް ގޭމް"ގެ ދެވަނަ ސީޒަނަށް ތާރީހީ ރެކޯޑެއް ލިބިއްޖެ އެވެ.

"ސްކުއިޑް ގޭމް" ދެވަނަ ސީޒަން ސްޓްރީމްކުރަން ފެށީ މިދިޔަ ބުރާސްފަތި ދުވަހު އެވެ.

ފޯބްސް މެގަޒިން އިން ބުނީ ދެވަނަ ސީޒަން ސްޓްރީމްކުރަން ފެށިތާ ހަފުތާއެއް ނުވަނީސް 93 ގައުމެއްގެ އެއްވަނައަށް މި ސީރީޒް އަރާފައިވާ ކަމަށެވެ. އެއީ މީގެ ކުރިން ނެޓްފްލިކްސްގެ އެއްވެސް ސީރީޒަކަށް ލިބިފައިނުވާ ކާމިޔާބީއެއް ކަމަށް އެ ނޫހުން ބުންޏެވެ.

ނެޓްފްލިކްސް އިން "ސްކުއިޑް ގޭމް"ގެ ދެވަނަ ސީޒަންގެ ވިއުއާޝިޕް އަދަދުތައް އަދި އާންމެއް ނުކުރެ އެވެ.

ފުރަތަމަ ސީޒަނަށް ވަނީ 265 މިލިއަނަށް ވުރެ ގިނަ ވިއުސް ލިބިފަ އެވެ. އެކަމަކު، ނެޓްފްލިކްސް އިން ވިއުއާޝިޕްގެ އަދަދު ކަނޑައަޅާ މިންގަނޑުން ބަލާ ނަމަ، 2.2 ބިލިއަން ގަޑިއިރު ވަންދެން ފުރަތަމަ ސީޒަން ސްޓްރީމްކޮށްފައިވެ އެވެ.

ދެވަނަ ސީޒަން ބަލާ މީހުން ގިނަ ކަމަށް ދެއްކިޔަސް، ރޭޓިންސްތަކުން އުޅެނީ ވަރަށް ފަހަތުގަ އެވެ. ރޮޓެން ޓޮމާޓޯސްގައި މި ސީޒަންގެ އޯޑިއެންސް ސްކޯ މިވަގުތު ހުރީ 63 ޕަސެންޓުގަ އެވެ. ފުރަތަމަ ސީޒަންގައި އެ ސްކޯ ހުރީ 83 ގަ އެވެ.

"ސްކުއިޑް ގޭމް"ގެ ދެވަނަ ސީޒަންގައި ލީޑު ރޯލު ކުޅެނީ ފުރަތަމަ ސީޒަންގައި ވެސް އުޅުނު ލީ އުންޖޭ އެވެ. ފުރަތަމަ ސީޒަންއާ ހިލާފަށް މިފަހަރު ކާސްޓުގައި ވެސް ދެކުނު ކޮރެއާގެ މަޝްހޫރު އެތައް ތަރިންނެއް ހިމަނާފައިވެ އެވެ.

އާ ސީޒަންގައި ދައްކަނީ ސްކުއިޑް ގޭމް ހުއްޓުވަން އޭނާ ކުރާ މަސައްކަތެވެ. މި ސީޒަންގައި ދައްކަނީ ވެސް ފުރަތަމަ ސީޒަންގައި ހިނގި ކަންތައްތަކުގެ ދެ އަހަރު ފަހެވެ.

ފުރާނައަށް ނުރައްކާތެރި ގޭމް ކުޅެގެން މޮޅުވާ މީހަކަށް ފައިސާގެ ބޮޑު އިނާމެއް ލިބޭ "ސްކުއިޑް ގޭމް" 2021 ވަނަ އަހަރު ނެރުމާ އެކު، މި ސީރީޒްވީ ބޮޑު ހިޓަކަށެވެ. ނެޓްފްލިކްސްގެ އެންމެ ކާމިޔާބު އެއް ސީރީޒަށެވެ.