ޕޮލިސްގެ ކާރުގައި ޖެހި އެކްސިޑެންޓުވި މީހާގެ އާއިލާއިން ފުލުހުންގެ ވާހަކަ ދޮގުކުރޭ

ހުޅުމާލޭ 2 ގައި ފުލުހުންގެ ކާރަކާއި ސައިކަލެއް ޖެހި މިދިޔަ ބުރާސްފަތި ދުވަހުގެ ރޭ ދަންވަރު ހިނގި އެކްސިޑެންޓާ ގުޅިގެން ފުލުހުން ދެއްކި ވާހަކަތައް އެ އެކްސިޑެންޓުގައި އަނިޔާވި ޒުވާނާގެ އާއިލާއިން ދޮގުކޮށްފި އެވެ.

އެ މައްސަލައާ ގުޅިގެން ފުލުހުން ނެރުނު ބަޔާނުގައިވާ ގޮތުން އެކްސިޑެންޓުވީ ހުޅުމާލެ 2 ގެ ގުލްއަލާ މަގުން އިރުން ހުޅަނގަށް، ނިރޮޅު މަގު ހުރަސް ކުރަމުންދިޔަ ފުލުހުންގެ ކާރެއްގައި ބާރު ސްޕީޑުގައި ދުއްވާފައި ދިޔަ ސައިކަލެއް ޖެހިގެންނެވެ. އެ އެކްސިޑެންޓުގައި އަނިޔާވީ ކަސްޓަމްސްގައި މަސައްކަތްކުރާ 19 އަހަރުގެ ޒުވާނަކަށެވެ.

އެ ބަޔާނުގައި ބުނީ ސައިކަލު ދުއްވި ޒުވާނާއަކީ އެއްގަމު ދަތުރުފަތުރު ކުރުމުގެ ގާނޫނާ ހިލާފުވެގެން މިދިޔަ ހަފުތާގައި ލައިސަންސް ހިފަހައްޓާފައިވާ ޒުވާނެއް ކަމަށެވެ.

އެކަމަކު އާއިލާ އިން އެކަން ދޮގުކޮށް، "މިހާރު" އަށް އެ ޒުވާނާގެ ބޭބެ ބުނީ އެކްސިޑެންޓުވި މީހާ މީގެ ދުވަސްކޮޅެއް ކުރިން ދުއްވި ސައިކަލެއް މޮޑިފައި ކޮށްފައި ހުރުމުން އެ ސައިކަލު ހިފަހައްޓައި، ސައިކަލުގެ ވެރިފަރާތް ޖޫރިމަނާކުރި ކަމަށެވެ.

އެކަމަކު އޭނާގެ ލައިސަންސް ހިފެހެއްޓިކަން އެނގިފައި ނެތް ކަމަށް ބޭބެ ބުންޏެވެ. އެހެންވެ، ލައިސަންސް ހިފަހައްޓާފައިވާ ނަމަ، އެކަމުގެ ލިޔުން އާއިލާއަށް ދެއްކުމަށް ފުލުހުންގެ ކިބައިން އެދޭނެ ކަމަށް އޭނާ ބުންޏެވެ.

"އަޅުގަނޑަށް ހަމަ ޔަގީން ލައިސަންސް ހިފަހައްޓާފައި އޮތް ނަމަ، ސައިކަލު ދުއްވާނެ ކުއްޖެއް ނޫން އެއީ. އެއަށް ވުރެ މަޑުމައިތިރި ރަނގަޅު ކުއްޖެއް އެއީ،" އެ ކުއްޖާއާ ގާތް ގުޅުމެއް އޮންނަ ބޭބެ ބުންޏެވެ.

އޭނާ ބުނިގޮތުގައި އައިޖީއެމްއެޗުގައި އެ ޒުވާނާއަށް ފަރުވާދެމުން އަންނައިރު ހާލަތަށް އަދި މާބޮޑު ބަދަލެއް ނާދެ އެވެ. އޭނާއަށް އަދިވެސް ފަރުވާދެމުން ދަނީ އައިސީޔޫގައި ވެންޓިލޭޓަރުގެ އެހީގައި ކަމަށާއި އަދިވެސް އޭނާ ހޭނާރާ ކަމަށް އޭނާ ބުންޏެވެ.

އޭނާ ބުނީ އެ ޒުވާނާއަކީ އުމުރުން 9 އަހަރުގައި ވެސް ބޮލުގެ ބޮޑު ސާޖަރީއެއް ހަދާފައިވާ މީހެއް ކަމަށެވެ. އަދި މި ފަހަރުގެ އެކްސިޑެންޓުގައި ވެސް އަނިޔާވީ ބޮލަށެެވެ.

"ސްކޫލުގައި ކުޅެން އުޅުމުގެ ތެރޭގައި ޑެސްކެއްގައި ޖެހިގެން ބިން މައްޗަށް ވެއްޓި ބޯ ޖެހިގެން، ލަންކާ އިން ބޮލުގެ ވަރަށް ބޮޑު ސާޖަރީއެއް ހަދާފައި ހުންނަނީ. ސިކުނޑިއަށް އެއްޗެއް ލައްވާފައި، އެއީ ވެސް 9 ގަޑިއިރުގެ ބޮޑު ސާޖަރީއެއް. އަޅުގަނޑުމެން ވެސް އޭނާ ނުލިބޭނެ ކަމަށް އޭރު ހީކޮށްގެން ތިބީ،"

"..އެކަމަކު ﷲ ގެ އިރާދަފުޅުން ރަނގަޅުވެފައި ހުއްޓާ މިފަހަރު މިހެން މިވީ. މިފަހަރު ވެސް އަޅުގަނޑުމެން އުއްމީދު ކުރަނީ ލިބޭނެ ކަމަށް،" އައިޓީ ދާއިރާ އިން ޑިގްރީއަށް ކިޔަވަމުން އަންނަ އެ ޒުވާނާގެ ހާލަތާ ގުޅިގެން އޭނާގެ ބޭބެ ބުންޏެވެ.

އެކްސިޑެންޓުވި މަންޒަރު ދުށް މީހުންނާ ހަވާލާދީ އާއިލާ އިން ބުނާގޮތުގައި ފުލުހުންގެ ކާރު އަނބުރާލަން އުޅެފައި އޮތީ މަގު ހުރަސްކުރާ ކާރެއް އަނބުރާނެ ދިމާލަކަށް ނޫނެވެ. އެެހެންވެ، ޕޮލިހުންގެ އިހުމާލު ވެސް އޮތް ކަމަށް އާއިލާ އިން ތުހުމަތު ކުރެ އެވެ.

ފުލުހުން ކުރިން ބުނެފައިވާ ގޮތުގައި އެ އެކްސިޑެންޓުގައި ޕޮލިސް ކާރު ދުއްވި އޮފިސަރުގެ އެއްވެސް އިހުމާލެއް ވޭތޯ ބަލާނެ އެވެ.