18 އަހަރު ނުފުރޭ ކުއްޖަކު ދުއްވި ޕިކަޕެއް ގޮސް އެރީ އެއާޕޯޓް ފެންސަށް

އުމުރުން 18 އަހަރު ނުފުރޭ ކުއްޖަކު ދުއްވި ޕިކަޕަކުން ޖެހި ކުޅުދުއްފުށީ އެއާޕޯޓްގެ ފެންސަށް ގެއްލުން ލިބިއްޖެ އެވެ.

ސޯޝަލް މީޑިއާގައި އާންމުވެފައިވާ ވީޑިއޯއަކުން ފެންނަ ގޮތުގައި ބާރު ސްޕީޑްގައި ދިޔަ ޕިކަޕް ކޮންޓްރޯލުން ނެއްޓި އެއާޕޯޓް ބޭރު ފެންސްގައި ޖެހެ އެވެ. ފެންސަށް ގެއްލުން ލިބުނުއިރު، އެ ޕިކަޕުން މީހަކާއި ކުޑަ ކުއްޖަކު ފައިބާ މަންޒަރު ފެނެ އެވެ.

ވީޑިއޯ އިން ފެންނަ ގޮތުގައި އެކްސިޑެންޓް ހިނގުމުން އެ މީހުން އެ ސަރަހައްދުގައި މަޑުނުކޮށް ދިޔައީ އެވެ.

ފުލުހުން ބުނި ގޮތުގައި އެ ޕިކަޕް ދުއްވަން އިނީ 18 އަހަރު ނުފުރޭ ކުއްޖެކެވެ. އެކްސިޑެންޓްވި ޕިކަޕް ޓޯކޮށް މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.