އެކްސިޑެންޓުގައި ނިޔާވީ އަޝްފާ އާއި ތޭރަވާގެ ހަމައެކަނި ދަރިފުޅު

މާލޭގައި މިރޭ ހިނގި ނުރައްކާތެރި އެކްސިޑެންޓުގައި ނިޔާވީ ލަވަކިޔުންތެރިޔާ މަރިޔަމް އަޝްފާ އާއި މުހައްމަދު އަބްދުލް ޣަނީ (ތޭރަވާ)ގެ ހަމަ އެކަނި ދަރިފުޅު އަލްސަލް މުހައްމަދު ކަން އެނގިއްޖެ އެވެ.

ބޮޑުތަކުރުފާނު މަގުގައި ހިނގި އެ އެކްސިޑެންޓުގައި ސައިކަލު ދުއްވަން އިނީ 16 އަހަރާއި 17 އަހަރުގެ ދެ ކުދިންނެވެ. އޭގެ ތެރެއިން އެއް ކުއްޖަކު ހޮސްޕިޓަލުގައި ފަރުވާދެމުން ދަނިކޮށް ވަނީ ނިޔާވެފައި އެވެ.

"މިހާރު" އަށް އެނގިފައިވާ ގޮތުގައި ނިޔާވީ ހ.ވާވޮއި، އަލްސަން މުހައްމަދު އެވެ.

ސައިކަލުގައި އިން 16 އަހަރުގެ ކުއްޖާ އާއި ޒެބްރާ ކްރޮސްއިން ހުރަސްކުރި 40 އަހަރުގެ މީހާ ވެސް ހާލު ސީރިއަސް ކަމަށް ހޮސްޕިޓަލުން ބުންނެވެ.

ފުލުހުން ބުނީ ބާރު ސްޕީޑެއްގައި ދުއްވާފައި ދިޔަ ސައިކަލެއް، ޒިބްރާ ކްރޮސްއަކުން މަގު ހުރަސްކުރަން އުޅުނު މީހެއްގެ ގައިގައި ޖެހި އަދި އެ ތަނުން ދަތުރުކުރި ޕިކަޕެއްގައި ޖެހި އެކްސިޑެންޓު ވެފައިވާ މައްސަލައެއް ރިޕޯޓު ކުރީ މިރޭ 8:00 ހާއިރު އެވެ.

އެ އެކްސިޑެންޓުގެ ވީޑިއޯތައް ސޯޝަލް މިޑިއާގައި ދައުރުވާއިރު އެ ވީޑިއޯތަކުން ފެންނަ ގޮތުން އެކްސިޑެންޓްވި ސަރަހައްދުގައި ގިނަ އަދަދެއްގެ ލޭ ހުއްޓެވެ.

އެކްސިޑެންޓްވި ސައިކަލާއި ހެލްމެޓެއެއްގެ ބައިތައް ވަކިވެ ބިންމަތީގައި ހުރިއިރު، ޕިކަޕުގެ ކުރީކޮޅު ވެސް އޮތީ ހަލާކުވެފަ އެވެ.