ޕޮލިސް ކާރާއި ސައިކަލް އެކްސިޑެންޓުވި މަންޒަރު ދުށް ބަޔަކު ހޯދަނީ

ހުޅުމާލޭ 2 ގައި ފުލުހުންގެ ކާރަކާއި އާންމުންގެ މީހެއްގެ ސައިކަލެއް ޖެހި މިދިޔަ މަހު 27 ގައި ހިނގި އެކްސިޑެންޓުގެ ތަހުގީގަށް، އެ މަންޒަރު ދުށް ބަޔަކު ހޯދަން ފުލުހުން މިއަދު އިއުލާންކޮށްފި އެވެ.

ފުލުހުންގެ އިއުލާނުގައި ބުނީ އެ ރޭ ދަންވަރު 1:45 ހާއިރު ހުޅުމާލެ 2 ގެ ނިރޮޅުމަގާއި ގުލްއަލާމާހިނގުން ގުޅޭ ހިސާބުގައި ފުލުހުންގެ ކާރަކާއި ސައިކަލެއް ޖެހި ހިނގާފައިވާ ނުރައްކާތެރި އެކްސިޑެންޓްގެ މަންޒަރު ދުށް މީހަކު ހޯދަން ބޭނުންވާ ކަމަށެވެ.

އެ އެކްސިޑެންޓް ހިނގި ވަގުތު މަންޒަރު ދުށް މީހަކު ހުރި ނަމަ، ފުލުހުންގެ ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅައި މައުލޫމާތު ހިއްސާކުރަން އެ އިއުލާނުގައި ވަނީ އެދިފަ އެވެ.

އެ އެކްސިޑެންޓުގައި ވަނީ ސައިކަލު ދުއްވަން އިން 19 އަހަރުގެ ފިރިހެނަކަށް ވަރަށް ބޮޑަށް އަނިޔާވެފަ އެވެ. އޭނާއަށް އަދިވެސް ފަރުވާދެމުން އަންނަނީ އައިޖީއެމްއެޗުގެ އައިސީޔޫގަ އެވެ.

އެ އެކްސިޑެންޓު ހިނގި ފަހުން ފުލުހުން ނެރުނު ބަޔާނެއްގައި ބުނި ގޮތުގައި، އެކްސިޑެންޓުވީ ހުޅުމާލެ 2 ގެ ގުލްއަލާމަގުން އިރުން ހުޅަނގަށް، ނިރޮޅުމަގު ހުރަސްކުރަން އުޅުނު ފުލުހުންގެ ކާރެއްގައި ބާރު ސްޕީޑުގައި ދުއްވާފައި ދިޔަ ސައިކަލެއް ޖެހިގެންނެވެ. އެ އެކްސިޑެންޓުގައި އަނިޔާވީ ކަސްޓަމްސްގައި މަސައްކަތްކުރާ ޒުވާނަކަށެވެ.

އެ ބަޔާނުގައި ބުނީ ސައިކަލު ދުއްވި ޒުވާނާއަކީ އެއްގަމު ދަތުރުފަތުރުކުރުމުގެ ގާނޫނާ ހިލާފުވެގެން، އެ އެކްސިޑެންޓު ހިނގުމުގެ ހަފުތާއެއް ކުރިން ލައިސަންސް ހިފަހައްޓާފައިވާ މީހެއް ކަމަށެވެ.

ފުލުހުން ބުނީ އެ އެކްސިޑެންޓު ހިނގުމުގައި ޕޮލިސް ކާރު ދުއްވި އޮފިސަރުގެ އިހުމާލެއް އޮތްތޯ ވެސް ބަލާނެ ކަމަށެވެ.

އެކަމަކު، ފުލުހުންގެ ބަސް ދޮގުކޮށް، އެކްސިޑެންޓުވި މީހާގެ އާއިލާއިން ބުނީ އޭނާ މީގެ ދުވަސްކޮޅެއް ކުރިން ދުއްވި ސައިކަލެއް މޮޑިފައިކޮށްފައި ހުރުމުން އެ ސައިކަލު ހިފަހައްޓައި، ސައިކަލުގެ ވެރިފަރާތް ޖޫރިމަނާކުރީ ކަމަށެވެ. އެކަމަކު އޭނާގެ ލައިސަންސް ހިފެހެއްޓިކަން އެނގިފައި ނެތް ކަމަށެވެ. އެހެންވެ، ލައިސަންސް ހިފަހައްޓާފައިވާ ނަމަ، އެކަމުގެ ލިޔުން އާއިލާއަށް ދެއްކުމަށް ފުލުހުންގެ ކިބައިން އެދޭނެ ކަމަށް ބުންޏެވެ.

އެކްސިޑެންޓުވި މަންޒަރު ދުށް މީހުންނާ ހަވާލާދީ އާއިލާއިން ބުނާ ގޮތުގައި ފުލުހުންގެ ކާރު އަނބުރާލަން އުޅެފައި އޮތީ މަގު ހުރަސްކުރާ ކާރެއް އަނބުރާނެ ދިމާލަކަށް ނޫނެވެ. އެެހެންވެ، ފުލުހުންގެ އިހުމާލު ވެސް އޮތް ކަމަށް އާއިލާއިން ތުހުމަތު ކުރެ އެވެ.