ސަލްމާންގެ "ސިކަންދަރު"ގެ ފުރަތަމަ ފެނިލުން ދައްކާލައިފި

ސަލްމާން ހާންގެ ކުރިއަށް އޮތް ފިލްމު "ސިކަންދަރު"ގެ ފުރަތަމަ ޓީޒާ އިއްޔެ އާންމުކޮށްފި އެވެ.

މިނެޓާއި 41 ސިކުންތުގެ މި ޓީޒާގައި ދައްކަނީ ސަލްމާން އޭނާގެ ދުޝްމަނުންގެ ބަޔަކާ ތަޅާފޮޅާ ތަނެވެ. ބެލެވޭ ގޮތުގައި، މި ވެސް ވަރަށް ވަރުގަދަ އެކްޝަން ފިލްމަކަށް ވާނެ އެވެ.

ސަލްމާންއާ އެކު، މި ފިލްމުގައި ލީޑު އެކްޓްރެސްގެ ރޯލުން ފެންނާނީ ރަޝްމިކާ މަންދަނާ އެވެ.

މި ފިލްމުގެ ޑައިރެކްޓަރަކީ އާމިރް ހާންގެ މަޝްހޫރު ފިލްމު "ގަޖްނީ" ޑައިރެކްޓުކުރި އޭއާރް މުރުގަޑޮސް އެވެ. ސަލްމާންއާ އެކު އޭނާ މަސައްކަތްކުރާ މިއީ ފުރަތަމަ ފަހަރެވެ.

ރަޝްމިކާ އެންމެފަހުން ފެނުނީ މިދިޔަ އަހަރު ނުކުތް ބޮލީވުޑްގެ ބްލޮކްބާސްޓާ ފިލްމު "އެނިމަލް" އިންނެވެ. ރަންބީރް ލީޑު ރޯލު ކުޅުނު އެ ފިލްމަކީ މިދިޔަ އަހަރު އެންމެ ބޮޑު އާމްދަނީއެއް ލިބުނު އެއް ފިލްމެވެ.

ސަލްމާންގެ އެކްޝަން ފިލްމު "ސިކަންދަރު" ރިލީޒްކުރަން ނިންމާފައި ވަނީ އަންނަ އަހަރުގެ ކުޑަ އީދުގަ އެވެ.