އާރުޑީސީގެ ހިޔާނާތް: މޫކޭ އާއި ޔާސިރުގެ އިލެކްޓްރޯނިކް ސާމާނުތަކެއް ފުލުހުން ގެންގޮސްފި

ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ގެ ސަރުކާރުގެ ދުވަސްވަރު އާރުޑީސީގެ ތެރޭގައި ހިންގި ކަމަށް ބުނާ ހިޔާނާތުގެ މައްސަލަތަކުގެ ތަހުގީގަށް އެ ކުންފުނީގެ އޭރުގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) އާ ގުޅުން ހުރި ތަންތަނަށް ވަދެ ފުލުހުން މީގެ އިރުކޮޅެއް ކުރިން ފާސްކުރަން ފަށައިފި އެވެ.

އެނގިފައިވާ ގޮތުގައި ފުލުހުން ކޯޓު އަމުރުތަކެއް ހިފައިގެން ގޮސް މިހާރު ބަލައި ފާސްކުރަމުން އަންނަނީ މޫކޭގެ އެޕާޓްމަންޓަކާއި އޭނާގެ އަންހެނުންގެ އެޕާޓްމަންޓެއްގެ އިތުރުން ހިޔާނާތުގެ މައްސަލައިގެ ތުހުމަތު ދެން އަމާޒުވާ ޔާސިރު ހަސަން ދިރިއުޅޭ އެޕާޓްމަންޓެެވެ.

ޔާސިރު ހަސަނަކީ އާރުޑީސީގެ ކުރީގެ ޗީފް ފައިނޭންޝަލް އޮފިސަރު (ސީއެފްއޯ) އެވެ. ޔާސިރު ވަނީ މީގެ ދުވަސްގަނޑެއް ކުރިން މޫކޭގެ ކޮއްކޮއަކާ ކައިވެނިކޮށްފަ އެވެ.

މި ކަންކަމާ ގުޅުވައި މި ހިޔާނާތުގައި މޫކޭ ބައިވެރިވާ ކަމަށް ތުހުމަތުކޮށް ފެތުރޭ ވާހަކަތަކާއި ޔާސިރަށް ކުރާ ތުހުމަތު ވެސް މޫކޭ ކުރިން ދޮގުކުރައްވާފައި ވެ އެވެ.

ޔާސިރުގެ އެކައުންޓަށް، ޝައްކު އުފެދޭ ގޮތަށް ގިނަ އަދަދަކަށް ފައިސާ ވަންނަމުން ގޮސް 13 މިލިއަން ރުފިޔާ ޖަމާވެފައިވާ ބުނާ މައްސަލަ އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) އިން ފުލުހުންނަށް ހުށަހަޅާފައިވާތީ އެ މައްސަލައިގެ ތަހުގީގު ފުލުހުން ފެށީ މިދިޔަ އަހަރުގެ ފަހުކޮޅު އެވެ. އަދި އިބޫގެ ވެރިކަމުގެ މުއްދަތު ހަމަވާން ތިން ދުވަހަށް ވެފައި ވަނިކޮށް، މިދިޔަ އަހަރުގެ ނޮވެމްބަރު 14 ވަނަ ދުވަހު ފުލުހުން އާރުޑީސީ އަށް ވަދެ ލިޔުންތަކެއް ގެންގޮސްފައި ވެ އެވެ.

ފުލުހުން އާރުޑީސީ އަށް ވަދެ ގިނަ އަދަދެއްގެ ލިޔުންތަކެއް ގެންދިޔަ މައްސަލާގައި މޫކޭ ވަނީ އޭރުގެ ޕޮލިސް ކޮމިޝަނަރު މުހައްމަދު ހަމީދު (އެމްސީ) އާ މެދު ވެސް ހިތްހަމަޖެހިވަޑައިނުގެން ވާހަކަ ދައްކަވައިފަ އެވެ. މޫކޭ ވިދާޅުވީ، އެއްވެސް ކަމެއް ނުވާ ކަމަށާއި އާރުޑީސީ އޮފީހަށް ފުލުހުން ވަނީ "ހެޑްލައިން ހަދަން" ކަމަށެވެ.

މި އަހަރުގެ މާޗު މަހު ބޭއްވި މީޑިއާ ބްރީފިންއެއްގައި ފުލުހުން ބުނެފައި ވަނީ އާރުޑީސީގެ ހިޔާނާތުގައި ބައިވެރިވާ ކަމަށް ތުހުމަތު ކުރެވޭ މީހުންގެ ތެރެއިން، އެކެއްގެ އެކައުންޓަށް 11 މިލިއަން ރުފިޔާ ވަދެފައިވާކަން، އޭސީސީއާ ގުޅިގެން ހިންގާ ތަހުގީގުން އެނގިފައިވާ ކަމަށެވެ.

އެ މައްސަލަ ފުލުހުންނަށް ހުށަހެޅީ ސެޕްޓެމްބަރު 2022 ގައި ކަމަށާއިި އޭރުއްސުރެ މައްސަލައިގެ ޓެކްނިކަލް ކަންތައްތައް ކުރަން ފަށާފައިވާ ކަމަށް ފުލުހުން ބުނެފައި ވެ އެވެ. އެ ޑިޕާޓްމަންޓުން ބުނީ، މިހާތަނަށް ކުރި މަސައްކަތުގައި އާރުޑީސީގެ ހިޔާނާތުގައި ސަރުކާރުގެ ގިނަ މުވައްޒަފުންގެ ބައިވެރިވުން އޮތް ކަމަށް ތުހުމަތު ކުރެވޭ ކަމަށެވެ.

އެކަމަކު، ތިން މީހެއްގެ ބައިވެރިވުން އޮތްކަން ޔަގީން ކުރެވިފައިވާ ކަމަށް ފުލުހުންގެ އިކޮނޮމިކް ކްރައިމް ޑިޕާޓްމަންޓުން ބުނެފައި ވެ އެވެ.

ފުލުހުން ކުރިން ބުނެފައިވާ ގޮތުގައި، އެ ތިން މީހުންގެ އަމިއްލަ އެކައުންޓަށް އާރުޑީސީގެ 14 މިލިއަން ރުފިޔާ ދައުރު ކޮށްފައި ވެ އެވެ. އޭގެ ތެރެއިން އެކެއްގެ އެކައުންޓަށް 11 މިލިއަން އަދި އިތުރު ދެ މީހެއްގެ އެކައުންޓަށް، އެ އިން ކޮންމެ މީހެއްގެ އެކައުންޓަށް އެއް މިލިއަން ރުފިޔާ ޖަމާވެފައިވާ ކަމަށް ފުލުހުން މީޑިއާގައި ބުނެފައި ވެ އެވެ.

"...މި 11 މިލިއަން ރުފިޔާ ހުރީ ކުރިން ބުނި ކުންފުނިތަކަށާއި އަދި ކުންފުނީގެ ބޭރުން ވެސް އެކި ފަރާތްތަކަށް ޑިސްޓްރިބިއުޓް ކޮށްފައި. އެކި މީހުންގެ އެކައުންޓަށް ވަދެފައި،" މި އަހަރުގެ މާޗު މަހު ބޭއްވި ނިއުސް ކޮންފަރެންސްގައި އިކޮނޮމިކް ކްރައިމް ޑިޕާޓްމަންޓު ބުންޏެވެ.

އެ މައްސަލާގައި ހިމެނޭ ފައިސާ ދައުރު ކޮށްފައި ވަނީ ފުލުހުން ބުނެފައިވާ ގޮތުގައި 2018 އިން ފެށިގެން ސެޕްޓެމްބަރު 2022 އާ ހަމައަށެވެ.

އަމިއްލަ ބޭނުންތަކަށް އެ ފައިސާ ދައުރު ކުރަން 216 ޓްރާންސެކްޝަން ހިންގާފައިވާ ކަމަށް ވެސް ފުލުހުން ވަނީ ބުނެފަ އެވެ.

އިބޫގެ ސަރުކާރުގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލް ވެސް އާރުޑީސީގެ ފައިސާއާ ގުޅޭ މައްސަލައެއްގެ ތުހުމަތަށް މި އަހަރުގެ މާޗު މަހު ފުލުސް އޮފީހަށް ހާޒިރުކުރި އެވެ.

ފައްުޔާޒު އޭރު ވިދާޅުވެފައި ވަނީ ފުލުހުން ސުވާލުކުރީ އާރުޑީސީއާ އެކު ވިޔަފާރިކުރާ ކުންފުންޏަކުން އޭނާގެ އެކައުންޓަށް ފައިސާތަކެއް ފޮނުވާފައިވާތީ ކަމަށެވެ. ނަމަވެސް ފައްޔާޒު ވިދާޅުވިގޮތުގައި، އެއީ އެ ކުންފުނިން އޭނާ ނެންގެވި ލޯނެކެވެ.

ފައްޔާޒު ވިދާޅުވެފައިވާ ގޮތުގައި، މި އަހަރުގެ މާޗު މަހު ފުލުހުން އޭނާއާ ސުވާލުކުރީ އޭނާއާ ގުޅުން އޮންނަ ބައެއްގެ ކުންފުންޏަކުން ސެޕްޓެމްބަރު 2022 ގައި ނެންގެވި ލޯނަކާ ބެހޭ ގޮތުންނެވެ. އެއީ 160،000ރ. ގެ ލޯނެކެވެ. އެ ކުންފުނިން ވަނީ އާރުޑީސީއާ އެކު ވިޔަފާރީގެ މުއާމަލާތްތަކެއް ކޮށްފަ އެވެ.

"އަޅުގަނޑާ ކުރި ސުވާލުގައި އެ ބޭފުޅުން ގުޅުވަން އުޅެނީ އަޅުގަނޑަށް ލޯނު ދީފައި އޮތް ކުންފުންޏަކީ އާރުޑީސީއާ އެއްކޮށް ވިޔަފާރީގެ މުއާމަލާތްކުރާ ކުންފުންޏެއްކަން. އަދި އެ މުއާމަލާތުގެ ތެރެއިން އެ ކުންފުންޏަށް ފައިސާ ލިބިފައިވާ ކަމަށް. އެ ކުންފުނިން ފައިސާ ހޯދަނީ ކިހިނެއް ކަމެއް އަޅުގަނޑަކަށް ނޭނގޭ،" ފައްޔާޒު ވިދާޅުވެފައި ވެ އެވެ.