އިންޓެލް ރިޕޯޓެއް: ފުލުހުން ބުނަނީ ބޭރުގައި ދިރިއުޅެވޭނެ ތަނަވަސްކަން މޫކޭގެ އެބަހުރި ކަމަށް

ދިގު މުއްދަތަކަށް ރާއްޖޭން ބޭރުގައި ދިރިއުޅެވޭނެ ވަރުގެ ތަނަވަސްކަން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ގެ ކިބައިގައި އެބަހުރި ކަމަށް ފުލުހުން ބުނެފި އެވެ.

މޫކޭގެ ޕާސްޕޯޓް ހިފަހައްޓަން ކްރިމިނަލް ކޯޓުން ނެރެފައިވާ އަމުރުގައި ބުނެފައިވަނީ އޭނާއަކީ ދިގު މުއްދަތަކަށް ރާއްޖޭން ބޭރުގައި ދިރިއުޅުމުގެ މާލީ ތަނަވަސްކަން ހުރި މީހެއް ކަމަށާއި އެހެންވެ އޭނާ ފުރައިގެން ގޮސްފިނަމަ، ތަހުގީގަށް ހެކި ހޯދަން ހުރަސް އެޅޭނެ ކަމަށް ފުލުހުން ބުނާ ކަމަށެވެ.

މި މައްސަލާގައި ހެއްކެއްގެ ގޮތުގައި ފުލުހުން ހުށަހަޅާފައިވަނީ އިންޓެލިޖެންސް ރިޕޯޓެއް އެކަންޏެވެ.

މޫކޭގެ އިތުރުން އާރުޑީސީގެ ކުރީގެ ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ ޕާސްޕޯޓް ވެސް ވަނީ ހިފަހައްޓައިފަ އެވެ.

ބުރާސްފަތި ދުވަހުގެ ރޭ ފުލުހުން ވަނީ ކޯޓު އަމުރުތަކެއް ހިފައިގެން ގޮސް މޫކޭގެ އެޕާޓްމަންޓަކާއި އޭނާގެ އަންހެނުންގެ އެޕާޓްމަންޓެއްގެ އިތުރުން ހިޔާނާތުގެ މައްސަލައިގެ ތުހުމަތު ދެން އަމާޒުވާ ޔާސިރު ދިރިއުޅޭ އެޕާޓްމަންޓް ބަލައި ފާސްކޮށްފަ އެވެ. އަދި އެތަނުން ބައެއް އިލެކްޓްރޯނިކް އައިޓަމްތަކެއް ގެންގޮސްފައިވާ ކަމަށް ފުލުހުން ކުރިން ބުނެފައިވެ އެވެ.

ޔާސިރުގެ އެކައުންޓަށް، ޝައްކު އުފެދޭ ގޮތަށް ގިނަ އަދަދަކަށް ފައިސާ ވަންނަމުން ގޮސް 13 މިލިއަން ރުފިޔާ ޖަމާވެފައިވާ ބުނާ މައްސަލަ އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިން ފުލުހުންނަށް ހުށަހަޅާފައިވާތީ އެ މައްސަލައިގެ ތަހުގީގު ފުލުހުން ފެށީ މިދިޔަ އަހަރުގެ ފަހުކޮޅު އެވެ. އަދި ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގެ މުއްދަތު ހަމަވާން ތިން ދުވަހަށް ވެފައި ވަނިކޮށް މިދިޔަ އަހަރުގެ ނޮވެމްބަރު 14 ވަނަ ދުވަހު ފުލުހުން ވަނީ އާރުޑީސީއަށް ވަދެ ލިޔުންތަކެއް ގެންގޮސްފައިވެ އެވެ.

މި ކަންކަމާ ގުޅުވައި މި ހިޔާނާތުގައި މޫކޭ ބައިވެރިވާ ކަމަށް ތުހުމަތުކޮށް ފެތުރޭ ވާހަކަތަކާއި ޔާސިރަށް ކުރާ ތުހުމަތު ވެސް އެ މީހުން ދޮގުކޮށްފައިވެ އެވެ.

ފުލުހުން ކުރިން ބުނެފައިވާ ގޮތުގައި، އެ ތިން މީހުންގެ އަމިއްލަ އެކައުންޓަށް އާރުޑީސީގެ 14 މިލިއަން ރުފިޔާ ދައުރު ކޮށްފައިވެ އެވެ. އޭގެ ތެރެއިން އެކެއްގެ އެކައުންޓަށް 11 މިލިއަން އަދި އިތުރު ދެ މީހެއްގެ އެކައުންޓަށް، ކޮންމެ އެކައުންޓަށް އެއް މިލިއަން ރުފިޔާ ޖަމާވެފައިވާ ކަމަށް ފުލުހުން މީޑިއާގައި ބުނެފައި ވެ އެވެ.

އެ މައްސަލާގައި ހިމެނޭ ފައިސާ ދައުރު ކޮށްފައިވަނީ ފުލުހުން ބުނެފައިވާ ގޮތުގައި 2018 އިން ފެށިގެން ސެޕްޓެމްބަރު 2022 އާ ހަމައަށެވެ. އަމިއްލަ ބޭނުންތަކަށް އެ ފައިސާ ދައުރު ކުރަން 216 ޓްރާންސެކްޝަން ހިންގާފައިވާ ކަމަށް ވެސް ފުލުހުން ވަނީ ބުނެފަ އެވެ.

ކުރީގެ ސަރުކާރުގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލް ވެސް އާރުޑީސީގެ ފައިސާއާ ގުޅޭ މައްސަލައެއްގެ ތުހުމަތަށް މި އަހަރުގެ މާޗު މަހު ފުލުސް އޮފީހަށް ހާޒިރުކުރި އެވެ.

ފައްޔާޒު އޭރު ވިދާޅުވެފައި ވަނީ ފުލުހުން ސުވާލުކުރީ އާރުޑީސީއާ އެކު ވިޔަފާރިކުރާ ކުންފުންޏަކުން އޭނާގެ އެކައުންޓަށް ފައިސާތަކެއް ފޮނުވާފައިވާތީ ކަމަށެވެ. ނަމަވެސް ފައްޔާޒު ވިދާޅުވި ގޮތުގައި އެއީ އެ ކުންފުނިން އޭނާ ނެންގެވި ލޯނެކެވެ.