އެންސީއައިޓީގެ އެކްސް އެކައުންޓް ހެކްކޮށްފި

ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) ގެ އެކްސް އެކައުންޓް ރޭ ހެކްކޮށްފި އެވެ.

ސަރުކާރުގެ ޓެކްނޮލޮޖީގެ ކަންތައް ބަލަހައްޓާ ސެންޓަރުން އިއްޔެ މެންދުރު ވަނީ މައިކްރޮސޮފްޓް 365 އެޑްމިނިސްޓްރޭޓަރުންނަށް ބޭއްވި ފަސް ދުވަހުގެ ތަމްރީން ޕްރޮގްރާމެއް ކާމިޔާބުކަމާއެކު ނިންމާފައިވާ ކަމަށް ޕޯސްޓުކޮށްފަ އެވެ.

ނަމަވެސް، އެ އެކައުންޓުގެ އެކްސެސް ފަހުން ވަނީ ގެއްލިފަ އެވެ.

އެންސީއައިޓީގެ އެކްސްގެ ނަން ވެސް، އެލްސީއެމްބާޑު ނަމަކަށް ކިޔާ ބިޓްކޮއިންގެ ވިޔަފާރިކުރާ ބައެެއްގެ ނަމަކަށް ވަނީ ބަދަލުކޮށްފަ އެވެ. އެކަމަކު، އެކައުންޓުގެ ޔޫޒާ ނަމަށް ބަދަލެއް ނާދެ އެވެ.

އެ ތަން ހިންގާ ހޯމްލޭންޑު ސެކިއުރިޓީ މިނިސްޓްރީން ބުނީ އެކައުންޓުގެ ކޮންޓްރޯލް ހޯދުމުގެ މަސައްކަތް ކުރަމުން އަންނަ ކަމަށެވެ.

އެ ސެންޓަރުގެ އެކައުންޓް ހެކްކުރުމުން ސޯޝަލް މީޑިއާގައި ބައެއް މީހުންގެ ފާޑުކިޔުން ވެސް އަމާޒުވެފައިވެ އެވެ. އެ މީހުން ބުނާގޮތުން ސޯޝަލް މީޑިއާ އެކައުންޓުތަކުގެ ރައްކާތެރިކަން ނެތްއިރު، އެންސީއައިޓީން ބަލަހައްޓާ ދިވެހިންގެ ޒާތީ މައުލޫމާތުތައް ލީކް ނުވާނެތޯ ބައެއް މީހުން ސުވާލު އުފެދެ އެވެ.