މާލޭގައި ބިދޭސީންގެ ނުފޫޒުގަދަ ދެ ސަރަހައްދަކުން 25 ބިދޭސީއަކު ހިފަހައްޓައިފި

ބިދޭސީންގެ ބޮޑު ކޮންޓްރޯލެއް އޮންނަ ލޯކަލް މާރުކޭޓު ސަރަހައްދާއި ހީނާމާގެ ޕާކިން ސަރަހައްދުން، ގަވާއިދާ ހިލާފަށް ރާއްޖޭގައި އުޅޭ 25 ބިދޭސީއަކު މިއަދު ހިފަހައްޓައިފި އެވެ.

މޯލްޑިވްސް އިމިގްރޭޝަނުން މިރޭ އެކްސްގައި ކުރި ޕޯސްޓެއްގައި ބުނީ މާލޭގައި ގަވާއިދާ ހިލާފަށް އުޅޭ ބިދޭސީންގެ ނުފޫޒުގަދަ ދެ ސަރަހައްދެއްގެ މައުލޫމާތު "އިމިގްރޭޝަން ވޮޗް" އަށް ލިބިފައިވާ ކަމަށެވެ. އެއީ، ލޯކަލް މާރުކޭޓު ސަރަހައްދާއި ހީނާމާގޭ ޕާކިން ސަރަހައްދު ކަމަށް އިމިގްރޭޝަނުން ބުންޏެވެ.

އެހެންވެ، އެ ދެ ސަރަހައްދަށް ހާއްސަކޮށްގެން ފުލުހުންނާއި އިމިގްރޭޝަންގެ ޓާސްކުފޯހުން މިއަދު ހާއްސަ ރެއިޑް އޮޕަރޭޝަނެއް ހިންގާފައިވާ ކަމަށް އެ ޕޯސްޓުގައި ބުންޏެވެ.

މިއަދުގެ ރެއިޑްގައި 137 ބިދޭސީއަކު ބަލައި ފާސްކޮށް، ގަވާއިދާ ހިލާފަށް ރާއްޖޭގައި އުޅޭ 25 ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނީ މިއަދުގެ ރެއިޑް އޮޕަރޭޝަނުގައި އިމިގްރޭޝަންގެ ކޮންޓްރޯލަރު މުހައްމަދު ޝަމްއާން ވަހީދު އާއި ޑެޕިއުޓީ ކޮންޓްރޯލަރު އަހުމަދު އަޝްފާން ވެސް އަމަލީ ގޮތުން ބައިވެރިވެވަޑައިގެންނެވި ކަމަށެވެ.

އިމިގްރޭޝަނުން އިއްޔެ ވެސް ވަނީ ލޯކަލް މާރުކޭޓް ސަރަހައްދުގައި ރެއިޑް އޮޕަރޭޝަނެއް ހިންގައިފަ އެވެ. އިއްޔެ ފަތިހުން ފެށިގެން މެންދުރާ ހަމައަށް ކުރިއަށް ގެންދިޔަ އެ ރެއިޑުގައި އެ ސަރަހައްދުގައި އަޅާފައިވާ އުޅަނދުފަހަރާއި، ލަފައިފުރާ އުޅަނދުތައް ވެސް ބެލި އެވެ. އަދި ގަވައިދާ ހިލާފަށް ރާއްޖޭގެ އުޅުނު 23 ބިދޭސީއަކު ހިފެހެއްޓި އެވެ.