ކުރަނގި އޮޕަރޭޝަން: 18،000 އަށް ވުރެ ގިނަ ބިދޭސީންގެ ބަޔޮމެޓްރިކް ޑޭޓާ އެއްކޮށްފި

ރާއްޖޭގައި އުޅޭ ބިދޭސީންގެ މައުލޫމާތު އެއްކުރުމަށް ސަރުކާރުން ފަށާފައިވާ އޮޕަރޭޝަން "ކުރަނގި"ގެ ދަށުން މިހާތަނަށް 18،000 އަށް ވުރެ ގިނަ ބިދޭސީންގެ ބަޔޮމެޓްރިކް ޑޭޓާ އެއްކޮށްފި އެވެ.

ރާއްޖޭގައި އުޅޭ ހުރިހާ ބިދޭސީންގެ ބަޔޮމެޓޮރިކް މައުލޫމާތު ނަގަން ފަށައި، ގަވާއިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް "ކުރަނގި" އޮޕަރޭޝަން ފެށީ މިދިޔަ މެއި މަހުގެ ދެވަނަ ދުވަހު އެވެ.

ހޯމް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު "ސަރުކާރު" ވެބްސައިޓަށް ވިދާޅުވީ "އޮޕަރޭޝަން ކުރަނގި" ފެށި ފަހުން މިހާތަނަށް 18،919 ބިދޭސީންގެ ބަޔޮމެޓްރިކް ޑޭޓާ އެއްކޮށްފައިވާ ކަމަށެވެ. މި އޮޕަރޭޝަން މި ވަގުތު 194 ރަށެއްގައި ކުރިއަށް ގެންދާއިރު، 50 ރަށެއްގައި އެ މަސައްކަތް އެއްކޮށް ނިމިފައިވާ ކަމަށް އޭނާ ވިދާޅުވި އެވެ.

މި އޮޕަރޭޝަން ކުރިއަށް ގެންދަނީ ދެ މަރުހަލާއަކަށް ބަހާލައިގެން ތިން އަހަރު ދުވަހުގެ މުއްދަތަކަށެވެ.

ފުރަތަމަ މަރުހަލާގައި ބިދޭސީންގެ ފިންގާޕްރިންޓު ނަގައި، އެ މީހުން މަސައްކަތް ކުރަނީ ރާއްޖޭގެ ގާނޫނާއި ގަވާއިދާ އެއްގޮތަށްތޯ ބަލަ އެވެ. މި މަރުހަލާ ނިމުމުން، ދެވަނަ މަރުހަލާގައި ރަސްމީ ލިޔެކިޔުން ނެތި، ގަވާއިދާއި ހިލާފަށް ރާއްޖޭގައި އުޅޭ ބިދޭސީންގެ ބަޔޮމެޓްރިކް އައިޑެންޓިފިކޭޝަނެއް ހަދައި، އެ ގައުމުތަކުގެ އެމްބަސީތަކާ ގުޅިގެން އެމީހުން އަނބުރާ ގައުމަށް ފޮނުވާލުމުގެ މަސައްކަތް ކުރާނެ އެވެ.

ހޯމް މިނިސްޓްރީން ބުނި ގޮތުގައި، މި އޮޕަރޭޝަންގައި ބިދޭސީ މަސައްކަތްތެރިންގެ މައުލޫމާތު އެއްކުރި ނަމަވެސް އެ މީހުންނާ ދެކޮޅަށް ފިޔަވަޅު އެޅުމުގެ ބަދަލުގައި، ގަވާއިދާ އެއްގޮތަށް އުޅެން ބޭނުންވާ ބިދޭސީންނަށް އެ ފުރުސަތު ފަހި ވެސް ކޮށްދޭނެ އެވެ.

ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ހޯމް މިނިސްޓްރީ އާއި ފުލުހުންނާއި އިމިގްރޭޝަން ގުޅިގެން އަންނަނީ ގިނަ މަސައްކަތްތަކެއް ކުރަމުންނެވެ. އެ އިދާރާތަކުން ހިންގި އޮޕަރޭޝަންތަކުގައި ހިފެހެއްޓި ބިދޭސީންގެ ތެރެއިން ގަވާއިދާ ހިލާފަށް ރާއްޖޭގައި އުޅުނު 5،000 އަށް ވުރެ ގިނަ މީހުން މިހާރު ވަނީ ޑީޕޯޓްކޮށްފަ އެވެ.