ހާލުގައި ޖެހުނު އިންޑިއާގެ ލޭބަރުންގެ މައްސަލަ ލޭބާ ރިލޭޝަން އޮތޯރިޓީން ބަލަނީ

ކޮންސްޓްސްރަކްޝަން މަސައްކަތަށް ރާއްޖެ ގެނެސް ހާލުގައި ޖެއްސި އިންޑިއާގެ ލޭބަރުންގެ މައްސަލަ ލޭބާ ރިލޭޝަން އޮތޯރިޓީ (އެލްއާރުއޭ) އިން ބަލަމުން އަންނަ ކަމަށް މިއަދު ބުނެފި އެވެ.

އެލްއާރުއޭ އިން ނެރުނު ބަޔާނެއްގައި ބުނީ ކޮންސްޓްރަކްޝަން މަސައްކަތަށް ރާއްޖެ ގެނެސްފައިވާ ސާޅިއެއްހާ ބިދޭސީންނަށް އެއް މަހާއި 10 ދުވަހުގެ މުސާރަ ނުދޭ ކަމަށާއި އެނބުރި ގައުމަށް ދާން ބޭނުންވާ ކަމަށް ބުނެ، އެ އޮތޯރިޓީއަށް މައްސަލަ ހުށަހަޅާފައިވާ ކަމަށެވެ.

މި މައްސަލައާ ގުޅިގެން އެ މީހުން ގެނައި ކުންފުންޏާ މުއާމަލާތްކޮށް، އެ މުއްދަތަށް ވާ ފައިސާ ލިބުމުން، އެނބުރި ގައުމަށް ފުރަން ބޭނުންވާ މުވައްޒަފުން ފުރުވާލުމުގެ އިންތިޒާމު ހަމަޖައްސަމުން އަންނަ ކަމަށް އެ އޮތޯރިޓީން ބުންޏެވެ.

އެލްއާރުއޭ އިން ބުނީ މައްސަލަ ހައްލުކުރުމަށް ކުންފުންޏާ އެކު، އެ އޮތޯރިޓީން މަޝްވަރާކުރަމުން އަންނަ ކަމަށެވެ.

އެނގިފައިވާ ގޮތުގައި، އެއީ އިމާރާތްކުރުމުގެ އެކި ކަހަލަ މަސައްކަތްތައް ކުރާ އިންޑިއާގެ ކުންފުންޏެއް ކަމަށްވާ ރެނާޓަސްގެ މުވައްޒަފުންނެވެ. އެއީ އިންޑިއާގެ އެގްޒިމް ބޭންކުން ދޫކޮށްފައިވާ ލައިން އޮފް ކްރެޑިޓްގެ ދަށުން 17 މިލިއަން ޑޮލަރު (262 މިލިއަން ރުފިޔާ) ހަރަދު ކޮށްގެން އައްޑޫ ގަން އިންޓަނޭޝަނަލް އެއާޕޯޓް ތަރައްގ ކުރުމުގެ މަސައްކަތަށް ގެނައި ލޭބަރުންނެވެ.

އިންޑިއާގެ ބައެއް ނޫސްތަކުން މިއަދު ރިޕޯޓްކުރި ގޮތުގައި، އެ މީހުން އަނބުރާ ގައުމަށް ފުރުމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ވެސް އަންނަނީ އެހީތެރިވަމުންނެވެ.

އެ މީހުންނަށް ހަ މަހުގެ މުސާރަ ނުދޭ ކަމަށް ވެސް އިންޑިއާގެ ބައެއް ނޫސްތަކުން ރިޕޯޓްކުރި އެވެ.

މި މައްސަލަ ފެންމަތިވީ މުސާރަ ނުދީ ގިނަ ދުވަސްތަކެއް ވަންދެން ގެންގުޅުނު ކަމަށް ބުނެ، އެ މީހުން ސަލާމަތްކޮށްދޭން އިންޑިއާގެ ސަރުކާރުގައި އެދި ސޯޝަލް މީޑިއާގައި އެ ލޭބަރުން ވީޑިއޯއެއް އާންމުކުރުމުންނެވެ.