ހާލުގައި ޖެހުނީ ރެނާޓަސްގެ ލޭބަރުން، އިންޑިއާގެ ހައި ކޮމިޝަނުން އެ މީހުންނަށް އެހީވަނީ

ކޮންސްޓްސްރަކްޝަން މަސައްކަތަށް ގެނެސް ހާލުގައި ޖެއްސި އިންޑިއާގެ ލޭބަރުންނަކީ ރާއްޖޭގައި އިމާރާތްކުރުމުގެ އެކި ކަހަލަ މަސައްކަތްތައް ކުރާ އިންޑިއާގެ ކުންފުންޏެއް ކަމަށްވާ ރެނާޓަސްގެ މުވައްޒަފުންކަން އެނގިއްޖެ އެވެ.

އެއީ އިންޑިއާގެ އެގްޒިމް ބޭންކުން ދޫކޮށްފައިވާ ލައިން އޮފް ކްރެޑިޓްގެ ދަށުން 17 މިލިއަން ޑޮލަރު (262 މިލިއަން ރުފިޔާ) ހަރަދު ކޮށްގެން އައްޑޫ ގަން އިންޓަނޭޝަނަލް އެއާޕޯޓް ތަރައްގީ ކުރުމުގެ މަސައްކަތަށް ގެނައި ލޭބަރުންނެވެ.

އެ އެއާޕޯޓް ތަރައްގީ ކުރުމުގެ މަސައްކަތް ހަވާލުކޮށްފައި ވަނީ ރެނާޓަސްއާ އެވެ. އައްޑޫ އެއާޕޯޓުގެ އިތުރުން ހުޅުމާލޭގައި މިހާރު ވެސް ރެނާޓަސް އިން ވަނީ ބައެއް ފްލެޓްތައް އިމާރާތް ކޮށްދީފަ އެވެ. ހުޅުމާލެ 1 ގައި ވެސް ރެނާސްޓަސްގެ ދެ ފްލެޓް އިމާރާތް ހުރެ އެވެ.

ދަ އިންޑިއަން އެކްސްޕްރެސް ނޫހުން މިއަދު ރިޕޯޓްކުރި ގޮތުގައި، ހާލުގައި ޖެހުނު މީހުން އެދުނު ގޮތަށް އެ މީހުން އަނބުރާ ގެންދިއުމުގެ މަސައްކަތް ރާއްޖޭގައި ހުންނަ އިންޑިއާގެ ހައި ކޮމިޝަނުން ވަނީ ފަށައިފަ އެވެ. އެއީ ރާއްޖޭގައި ރަޖިސްޓަރީ ކޮށްގެން ހިންގާ އިންޑިއާގެ އަމިއްލަ ކުންފުންޏެއް ކަމަށްވާ ރެނާޓަސްގެ މުވައްޒަފުން ކަމަށް އެ ނޫހުގައި ވެސް ވެ އެވެ.

މި މައްސަލާގައި އިންޑިއާ ހައި ކޮމިޝަނުން ވަނީ ރެނާޓަސްގެ ޕްރޮޖެކްޓް މެނޭޖަރާ ވާހަކަ ދައްކައިފަ އެވެ.

އެ ކުންފުނީގެ ޕްރޮޖެކްޓް މެނޭޖަރާ ހަވާލާދީ، އިންޑިއަން އެކްސްޕްރެސްގައި ބުނީ އަނބުރާ ގައުމަށް ގެންދިއުމަށް އެދުނީ އިންޑިއާގެ އޮޑިޝާ ސްޓޭޓުގެ 35 މީހަކާއި ޓެމިލް ނާޑޫ ސްޓޭޓުގެ ހަތަރު މީހެއް ކަމަށެވެ. އެ އެންމެން ވެސް މި މަހުގެ ފަސް ވަނަ ދުވަހު ވަޒީފާ އިން ވަކިވެފައިވާ ކަމަށް މެނޭޖަރު ވިދާޅުވި ކަމަށް އެ ނޫހުގައި ބުންޏެވެ.

އެ އެންމެންނަށް ނުދީ ހުރި މުސާރަ ވެސް ކުރިއަށް އޮތް ދެތިން ދުވަހެއްގެ ތެރޭގައި ހަމަޖައްސައިދޭނެ ކަމަށް މެނޭޖަރު ވިދާޅުވި ކަމަށް އެ ނޫހުގައިވެ އެވެ. އެ ފައިސާ އަވަހަށް ހަމަޖައްސައިދޭން އެ ކުންފުނިން ނިންމީ އިންޑިއާގެ ހައި ކޮމިޝަނުން އެކަމަށް އެދިފައިވާތީ ކަމަށް ވެސް ބުންޏެވެ.

އިންޑިއާ ހައި ކޮމިޝަނާ ހަވާލާދީ އެ ނޫހުގައި ބުނީ އެ ތަނުގައި އިންޑިއާގެ 196 ލޭބަރުން ތިބި ކަމަށެވެ.

އެ މީހުން ނުދީ ހުރި މުސާރަ ހަމަޖައްސައިދިނުމުން އެ މީހުން އިންޑިއާ އަށް ފުރުވައިލުމަށް ހައި ކޮމިޝަނުން ނިންމާފައިވާ ކަމަށް ވެސް އެ ނޫހުން ބުންޏެވެ.

އިންޑިއާގެ ބައެއް ނޫސްތަކުން އިއްޔެ ރިޕޯޓްކުރި ގޮތުގައި، އެ ގައުމުގެ ސާޅީހަކަށް ލޭބަރުން ރާއްޖޭގައި ހާލުގައި ޖެހިގެން އެ މީހުން ސަލާމަތްކޮށްދިނުމަށް އިންޑިއާގެ ސަރުކާރުގައި އެދި ވަނީ ސޯޝަލް މީޑިއާގައި ވީޑިއޯއެއް އާންމުކޮށްފަ އެވެ.

ބިދޭސީން އާންމުކުރި ވީޑިއޯއާ ހަވާލާދީ ޓައިމްސް އޮފް އިންޑިއާގައި އިއްޔެ ބުނީ އެއީ އިމާރާތްކުރުމުގެ މަސައްކަތަށް މިދިޔަ ޖޫން/ޖުލައި މަހު ރާއްޖެ ގެނައި ބައެއް ކަމަށެވެ. އެ މީހުން ރާއްޖެ އައި ފަހުން މުސާރަ ދީފައި ވަނީ އެންމެ މަހަކު ކަމަށާއި މުސާރަ ނުދޭ މައްސަލާގައި ކުންފުންޏާ ދެކޮޅަށް އިހުތިޖާޖު ކުރުމުން، އެ މީހުންނަށް ހަމަޖައްސާފައިވާ އެކޮމޮޑޭޝަން ބްލޮކުން ކަރަންޓުގެ ހިދުމަތް ކަނޑާލާފައިވާ ކަމަށް ވެސް އެ މީހުން ބުންޏެވެ.