އިންޑިއާގެ ސަފީރު ރައީސް އަރިހަށް ވަދާއީ ޒިޔާރަތް ކުރައްވައިފި

އިންޑިއާގެ ސަފީރު މުނޫ މަހާވަރު، ރައީސް ޑރ. މުހައްމަދު މުއިއްޒުގެ އަރިހަށް ވަދާއީ ޒިޔާރަތް ކުރައްވައިފި އެވެ.

އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫގެ ތިން އަހަރުގެ ދައުރު މިހާރު ވަނީ ހަމަވެފަ އެވެ.

ރައީސް އޮފީހުން ބުނީ ސަފީރު މުނޫ އަނބުރާ އިންޑިއާއަށް ވަޑައިގަތުމުގެ ކުރިން ރައީސްގެ އަރިހަށް ކުރެއްވި ޒިޔާރަތުގައި އިންޑިއާ އާއި ރާއްޖޭގެ ގާތް ގުޅުން ދެމެހެއްޓުމަށްޓަކައި ސަފީރު ކޮށްދެއްވި ބުރަ މަސައްކަތަށް ރައީސް ޝުކުރު އަދާކުރެއްވި ކަމަށެވެ. އަދި ރާއްޖޭގެ ތަރައްގީގައި އިންޑިއާ އިން މުހިންމު ދައުރެއް އަދާކުރާކަން ވެސް ރައީސް ފާހަގަކުރެއްވި އެވެ.

އިންޑިއާގެ ސަފީރު ވަނީ ރައީސް އާއި ދިވެހި ސަރުކާރުން އޭނާއަށް ދެއްވި އެއްބާރުލުމާއި އެހީތެރިކަމަށް ޝުކުރު އަދާކުރައްވައިފަ އެވެ.

ރައީސް އާއި ސަފީރު ވަނީ މިދިޔަ އޮކްޓޯބަރު މަހު ރައީސް އިންޑިއާއަށް ކުރެއްވި ރަސްމީ ދަތުރުފުޅުގައި އިގްތިސާދީ އާއި މެރިޓައިމް ސެކިއުރިޓީގެ ދާއިރާއިން ދެ ގައުމުގެ ދެމެދުގައި ވެވުނު އެއްބަސްވުންތަކަށް އަލިއަޅުއްވާލައިފަ އެވެ. މި އެއްބަސްވުންތަކުން ކުރާނެ ފައިދާތަކާއި އިންޑިއާއިން ރާއްޖޭގެ ތަރައްގީއަށް އެކި ދާއިރާތަކުން ދެމުން އަންނަ އެހީތެރިކަމާ ގުޅޭ ގޮތުން ވެސް ދެ ބޭފުޅުން މަޝްވަރާކުރެއްވި އެވެ.

ރައީސް އޮފީހުން ބުނީ ދެ ގައުމުގެ ގާތް ގުޅުން ދަމަހައްޓައި، ހެދިފައިވާ އެއްބަސްވުންތަކާ އެއްގޮތަށް މަސައްކަތްތައް ކުރިއަށް ގެންދާނެ ކަމުގެ ފުރިހަމަ ޔަގީންކަން ރައީސް އާއި ސަފީރު ވެސް ދެއްވި ކަމަށެވެ. އަދި އިތުރު ދާއިރާތަކުން ގުޅުން ގާއިމްކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާކުރެއްވި ކަމަށް ރައީސް އޮފީހުން ބުންޏެވެ.

ރައީސް ވަނީ ސަފީރަށް މުސްތަގުބަލުގައި ކާމިޔާބީއަށް އެދިވަޑައިގަންނަވާ ކަމަށް ވިދާޅުވެފަ އެވެ. އަދި ދެން ވަޑައިގަންނަވާ އިންޑިއާގެ ސަފީރާ އެކު ވެސް ވަރަށް ގާތުން މަސައްކަތްކުރައްވާނެ ކަމަށް ރައީސް ވިދާޅުވި އެވެ.

އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމަށް މުނޫ ވަޑައިގަތީ ނޮވެމްބަރު 17، 2021 ގަ އެވެ.

އިންޑިއާއިން މިހާރު ވަނީ ރާއްޖެއަށް އާ ސަފީރެއް ކަނޑައަޅައިފަ އެވެ. އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުނެފައިވާ ގޮތުގައި ރާއްޖެއަށް ހަމަޖައްސަނީ މިހާރު ނައިޖީރިއާގެ ސަފީރު ކަމުގައި ހުންނެވި ޖީ ބާލާސުބްރަމާނިއަން އެވެ.

ބާލާސުބްރަމާނިއަނަކީ 1998 ވަނަ އަހަރުން ފެށިގެން އިންޑިއާގެ ހާރިޖީ ދާއިރާގައި މަސައްކަތް ކުރައްވަމުން އަންނަ ބޭފުޅެކެވެ.