ރާއްޖެއިން ވަގަށް ބޭރުކުރަން އުޅުނު ބައިޓަނުގެ މިޔަރާއި މަޑިމަސް ހިފަހައްޓައިފި

ރާއްޖެއިން ބޭރުކުރަން އުޅުނު ބައި ޓަނުގެ މިޔަރު މަހާއި މަޑިމަސް ކަސްޓަމްސް އިން ހިފެހެއްޓުމަށްފަހު، ނައްތާލައިފި އެވެ.

ކަސްޓަމްސްގެ އޮފިޝަލަކު "މިހާރު" އަށް ވިދާޅުވީ ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން، ރާއްޖެއިން ބޭރުކުރުން މަނާތަކެތި ބޭރުކުރާ ކަމަށް ލިބުނު މައުލޫމާތާ ގުޅިގެން ޝިޕްމަންޓެއް ފާސްކުރިއިރު 582 ކިލޯގެ މިޔަރު މަހާއި މަޑިމަސް ފެނިފައިވާ ކަމަށެވެ.

އޭނާ ވިދާޅުވީ މިދިޔަ މަހުގެ އެ ތަކެތި ރާއްޖެއިން ބޭރުކުރަން އުޅުނީ ލޮނު މަހުގެ ގޮތުގަ އެވެ. އެކަމަކު، މެރިން ރިސާޗް ސެންޓަރުން އިތުރަށް ޓެސްޓު ހެދުމަށްފަހު، އެއީ މިޔަރު މަހާއި މަޑި މަސް ކަމަށް ކަށަވަރުކޮށް ދީފައިވާ ކަމަށް އޭނާ ވިދާޅުވި އެވެ.

އެހެންވެ، ކަސްޓަމްސް އިން ވަނީ އެ ތަކެތި މިދިޔަ އާދިއްތަ ދުވަހު ތިލަފުށީގައި ނައްތާލައިފަ އެވެ.

ގިނަ އަދަދެއްގެ މިޔަރާއި މަޑިމަސް ބޭރުކުރަން އުޅުނީ ކޮން ކުންފުންޏަކުން ކަމެއް ސާފެއް ނުވެ އެވެ.

މިޔަރާއި މަޑީގެ ބާވަތްތަކަކީ ރާއްޖޭގެ މަސްވެރިކަމުގެ އާއްމު ގަވާއިދުގެ ދަށުން ހިފުމާއި ބޭނުން ކުރުމާއި އެކްސްޕޯޓް ކުރުން މަނާ ބާވަތްތަކެވެ.