ކޮންޓްރެކްޓް އާ ކުރުމާ ބެހޭގޮތުން ލިވަޕޫލުން އެއްވެސް އެއްޗެއް ނާންގާ: ސަލާހް

މުހައްމަދު ސަލާހްގެ ކޮންޓްރެކްޓް އާ ކުރަން ލިވަޕޫލުން މަސައްކަތް ފަށަފައިވާ ކަމުގެ އަޑުފެތުނު ނަމަވެސް އެކަމާ ގުޅޭ އެއްވެސް އެއްޗެއް ކްލަބުން ނާންގާ ކަމަށް އޭނާ ބުނެފި އެވެ.

މިިސްރުގެ ފޯވާޑް ދަނީ މި ސީޒަނުގައި ވެސް މޮޅު ކުޅުމެއް ދައްކަމުންނެވެ. ޓޮޓްނަމް ހޮޓްސްޕާސްއާ ދެކޮޅަށް 6-3 ން ރޭ ލިވަޕޫލް މޮޅުވި މެޗުގައި ސަލާހް ޖެހި ދެ ލަނޑާ އެކު އޭނާ ވަނީ ލީގުގައި 15 ލަނޑު ޖަހައިފަ އެވެ. ލަނޑު ލިސްޓްގެ އެންމެ ކުރީގައި އޮތީ އޭނާ އެވެ.

ސަލާހާ އެކު ލިވަޕޫލުން މިހާރު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. އޭނާ މިހާރު ދައްކަމުންދާ ކުޅުމާ އެކު ކޮންޓްރެކްޓް އާ ކުރުމަށް އެ ޓީމުގެ ސަޕޯޓަރުން ވެސް ދަނީ ކްލަބަށް ގޮވާލަމުންނެވެ.

ސަލާހްގެ އާ ކުރަން އުޅޭ ވާހަކައިގެ އަޑުގަދަ ވީ ސިޓީގެ ކުރީގެ ކުޅުންތެރިޔާ ސާޖިއޯ އަގުއޭރޯ އެ ވާހަކަ ދެއްކުމުންނެވެ.

މިހާރު ކުޅުން ހުއްޓާލާފައިވާ އަގުއޭރޯއާ، އިންޓަވިއުއެއްގައި ސަލާހްގެ ސުވާލު ކުރުމުން ބުނީ ލިވަޕޫލްގެ ސަޕޯޓަރުންނަށް އުފާވެރި ހަބަރުތަކެއް ލިބެން އުޅޭ ކަމުގެ މައުލޫމާތު ލިބިފައިވާ ކަމަށެވެ.

"ކޮންމެވެސް ވަރަކަށް މިކަމުގެ ވާހަކަތައް އަހަރެން ކިޔައިފިން. އަހަންނަށް އެނގިފައި އޮތީ އިތުރު ދެ އަހަރަށް އޭނާގެ ކޮންޓްރެކްޓް އާ ކޮށްފައިވާކަމަށް. އެކަން އިއުލާން ކުރާ ޚަބަރާ އެކު އެކަން ވާނީ ލިވަޕޫލްގެ ސަޕޯޓަރުންނަށް ލިބޭ އެންމެ އުފާވެރި ދުވަހަށް."

އެކަމަކު އެކަމާ ގުޅޭ އެއްވެސް ވާހަކަ އެއް ވެސް ލިވަޕޫލުން ނުދައްކަ އެވެ. ކޮންޓްރެކްޓް އާ ކުރުމުގެ އަޕްޑޭޓަކީ ކޮބައިތޯ ސުވާލުކުރުމުން ސަލާހް ވެސް ބުނީ އަޕްޑޭޓެއް ނެތް ކަމަށެވެ.