އެމްޕީއެލްއަށް ސައުތު އޭޝިއަން ބިޒްނަސް އެކްސެލަންސްގެ ދެ އެވޯޑެއް

ދެކުނު އޭޝިއާ ސަރަހައްދުގެ ވިޔަފާރިތަކަށް ދޭ "ސައުތު އޭޝިއަން ބިޒްނަސް އެވޯޑު"ގެ މުހިންމު ދެ އެވޯޑެއް އެމްޕީއެލްއަށް ލިބިއްޖެ އެވެ.

މި މަހުގެ 20 ވަނަ ދުވަހު އޮތް އެ އެވޯޑު ހަފްލާގައި ދެކުނު އޭޝިއާގެ ހަތް ގައުމެއްގެ ކުންފުނިތަކާ ވާދަކޮށް، އެމްޕީއެލް އިން ވަނީ "އިނޮވޭޓިވް ލާނިން އެންޑް އޯގަނައިޒޭޝަނަލް ޑިވަލޮޕްމަންޓް ޕްރެކްޓިސް" އެވޯޑާއި "އިނޮވޭޓިވް ބިޒްނަސް އެވޯޑު" ހޯދައިފަ އެވެ.

އެ އެވޯޑު ހަފުލާގައި އެމްޕީއެލް އަށް ލިބުނު "އިނޮވޭޓިވް ބިޒްނަސް" އެވޯޑަކީ އެ އެވޯޑު ހަފްލާގެ ހާއްސަ ކެޓަގަރީގައި ހިމެނޭ އެވޯޑެކެވެ. އަދި މިއީ، އެ އެވޯޑު އެ ކުންފުންޏަށް ލިބުނު ފުރަތަމަ ފަހަރެވެ.

"ސައުތު އޭޝިއަން ބިޒްނަސް" އެވޯޑަކީ ދެކުނު އޭޝިއާގެ ގައުމުތަކުގެ ކުންފުނިތަކުގެ މެދުގައި ވާދަވެރި މާހައުލެއް އުފައްދައި ވިޔަފާރިތައް ކުރިއަރުވައި ފުޅާކުރަން ހިތްވަރު ދިނުމުގެ ގޮތުން ދޭ އެވޯޑެކެވެ.

މި އެވޯޑުގައި ކުންފުނިތަކުން ވިޔަފާރިފުޅާ ކުރުމަށާއި ޒަމާނާ ގުޅޭ ގޮތަށް ހިދުމަތްތައް ދިނުމަށް ކުރަމުން އަންނަ މަސައްކަތްތަކަށް ބަލައި ތަފާތު 17 ދާއިރާއަކުން އެންމެ ކުރިއަރަމުން އަންނަ އެންމެ ފާހަގަކޮށްލެވޭ ކުންފުނިތަކަށް އެވޯޑު ދެ އެވެ.

އެވޯޑު ދެމުން އަންނަނީ، ޖަޖުންގެ ޕެނަލަކުން ކުންފުނިތަކުގެ ޕާފޯމަންސް އިވެލުއޭޓް ކުރުމަށް ފަހު އެވެ.

އެ އެވޯޑު ހަފްލާގައި އެމްޕީއެލްއަށް "އިނޮވޭޓިވް ލާނިން އެންޑް އޯގަނައިޒޭޝަނަލް ޑިވަލޮޕްމަންޓް ޕްރެކްޓިސް" އެވޯޑު ލިބުނީ އެ ކުންފުނީގެ މުވައްޒަފުންނަށް ތައުލީމާއި ތަމްރީން ދޭން ކުރަމުން އަންނަ ތަފާތު އެކި މަސައްކަތްތައް ފާހަގަކޮށްފަ އެވެ.

އެމްޕީއެލް އަކީ މުވައްޒަފުންނަށް ތައުލީމާއި ތަމްރީންގެ ފުރުސަތުތައް ތަނަވަސްކުރަން އެ ކުންފުނީގެ ލާނިން އެންޑް ޑިވެލޮޕްމަންޓް ޑިޕާޓްމަންޓް މެދުވެރިކޮށް ކޮންމެ އަހަރަކު ވެސް ގިނަ ކޯސްތަކަކާއި ތަމްރީނުތައް ހިންގާ އެޕްރެންޓިސް ޕްރޮގްރާމްތަކާއި އިންޓާންޝިޕް ޕްރޮގްރާމްތައް ވެސް ކުރިއަށް ގެންދާ ކުންފުންޏެކެވެ.

އެ ކުންފުނިން މި އަހަރު ކުރީކޮޅު މޯލްޑިވްސް މެރިޓައިމް ކޮންފަރެންސެއް ވެސް ވަނީ ބާއްވައިފަ އެވެ. އެ ކޮންފަރެންސަކީ މެރިޓައިމްގެ ދާއިރާއިން ރާއްޖޭގައި ބޭއްވި ފުރަތަމަ ބައިނަލްއަގުވާމީ ބައްދަލުވުމެވެ. އަދި އެ ކުންފުނިން ވަނީ މޮޑާން ޕޯޓް މެނޭޖްމަންޓް ކޯހެއް ވެސް މި އަހަރު ފަށައިފަ އެވެ.

"ސައުތު އޭޝިއަން ބިޒްނަސް އެވޯޑު"ގައި އެ ކުންފުންޏަށް އިނޮވޭޓިވް ބިޒްނަސް އެވޯޑު ލިބުނީ ފާއިތުވި އަހަރެއްހާ ދުވަހުގެ ތެރޭގައި ވިޔަފާރި ފުޅާކުރުމާއި އާމްދަނީ އިތުރުކުރަން ކުންފުނިން ކޮށްފައިވާ މަސައްކަތްތައް ފާހަގަކޮށް ލިބުނު އެވޯޑެކެވެ.

އެމްޕީއެލް އިން ވަނީ ރާއްޖޭގައި އަލަށް "ސީ-ޓު-އެއާ" ކާގޯގެ ހިދުމަތާއި އުތުރު މެރިޓައުން ސާވިސަސް ހިދުމަތް ވެސް ތައާރަފްކޮށްފަ އެވެ.

އެމްޕީއެލް އިން އަންނަނީ ވިޔަފާރި ފުޅާކޮށް، އާ ހިދުމަތްތައް ފޯރުކޮށްދޭން ގިނަ މަސައްކަތްތަކެއް ކުރަމުންނެވެ.