އިތުރު މައްސަލަ އުފެދޭ ގޮތަށް ޗާގޯސް، މޮރިޝަސްއާ ހަވާލުނުކުރަން ނަޝީދު ގޮވާލައްވައިފި

ރާއްޖޭގެ ދެކުނުން އިންޑިއާ ކަނޑުގައި އިނގިރޭސިވިލާތުން އިސްތިއުމާރުކޮށްފައި އޮންނަ ޗާގޯސްގެ ރަށްތައް މޮރިޝަސް އަށް ދިނުމުގެ މަޝްވަރާ ކުރިއަށް ދާއިރު އެކަމުގެ ސަބަބުން އިތުރު މައްސަލަތައް ނުއުފެދޭނެ ގޮތަަށް ކަންކަން ކުރަން ވިސްނަން ޖެހޭ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

އެތައް ޒަމާނެއް ވަންދެން ކުރި މަޝްވަރާތަކަށް ފަހު އިނގިރޭސި ވިލާތުން މިދިޔަ އޮކްޓޫބަރު މަހު އެއްބަސްވީ ޗާގޯސްގެ ރަށްތައް ކުރީގެ ކޮލޮނީއެއް ކަމަށްވާ މޮރިޝަސްއާ ހަވާލުކުރާށެވެ. އެ އަތޮޅުގެ އެންމެ ބޮޑު ރަށް ކަމަށްވާ ޑިއޭގޯ ގާސިއާގައި ހިންގާ އެމެރިކާގެ އަސްކަރީ މަރުކަޒު ބެހެއްޓޭނެ ކަމަށް އޮތީ އިގުރާރު ވެފަ އެވެ.

ނަމަވެސް މޮރިޝަސްގެ ބޮޑުވަޒީރު ނަވީން ރަމްގޫލަމް މިދިޔަ މަހު ވެރިކަމާ ހަވާލުވެވަޑައިގަތުމަށް ފަހު، އެ އެއްބަސްވުމާ މެދު ޝައްކު އުފެދޭ ކަމަށާއި އެއްބަސްވުން އަދިވެސް ފައިނަލް ނުވާ ކަމަށް ވަނީ ވިދާޅުވެފަ އެވެ.

މޮރިޝަސް އާ އެ ރަށްތައް ހަވާލުކުރާނެ ތާރީހަކާ މެދު ސުވާލު އުފެދިފައިވަނިކޮށް ނަޝީދު "އެކްސް"ގައި ކުރެއްވި ޕޯސްޓެއްގައި ވިދާޅުވީ އިނގިރޭސި ވިލާތުން ޗާގޯސް ދޫކޮށްލަން ވާނީ އެ ކަމުގެ ސަބަބުން މޮރިޝަސް އާއި ޗާގޯސް ރަށްތަކުގެ ކައިރީގައި ދެން ހުރި ގައުމުތަކާ މެދު އިތުރު މައްސަލަތަކެއް ނުޖެހޭނެ ފަދަ ގޮތަކަށް ކަމަށެވެ.

އެހެންވެ އިނގިރޭސި ވިލާތުގެ ނިންމުމާ މެދު އަލުން ވިސްނަން ޖެހޭ ކަމަށް ނަޝީދު ވިދާޅުވި އެވެ.

ނަޝީދު މީގެ ކުރިން ވަނީ ޗާގޯސް އަކީ ރާއްޖޭގެ ތަނެއް ކަމަށް ވެސް ވިދާޅުވެފަ އެވެ.

ޗާގޯސްގެ ރަށްތައް މޮރިޝަސްއާ ވަކިކޮށް، އަސްކަރީ މަރުކަޒެއް ގާއިމުކުރުމަށް އިނގިރޭސިވިލާތުން ނިންމީ 1965 ވަނަ އަހަރު އެވެ. އިންޓަނޭޝަނަލް ކޯޓް އޮފް ޖަސްޓިސް އިން ވަނީ އެ ރަށްތަކަކަށް އޮންނާނީ މޮރިޝަސްގެ ބާރު ކަމަށާއި އެހެންވެ އެ ރަށްތައް އެ ގައުމާ ހަވާލުކުރަން ޖެހޭނެ ކަމަށް ބުނާ ލަފައެއް ނެރެފަ އެވެ.

އެ ނިންމުމަށް ބިނާކޮށް މޮރިޝަސް އިންޓަނޭޝަނަލް ޓްރައިބިއުނަލް ފޮ ދަ ލޯސް އޮފް ދަ ސީ (އިޓްލޮސް) އަށް ހުށަހަޅައިގެން އެ ގައުމާއި ރާއްޖެއާ ދެމެދު ކަނޑުގެ އިގްތިސާދީ ސަރަހައްދުން ފުށުއަރާ ބައި ވަނީ ބަހައި ވެސް ލައިފަ އެވެ. އިޓޮލޮސްގެ މި ނިންމުމަކާ ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގެ އިހުމާލުން ކަނޑުގެ ބައެއް ގެއްލުނީ ކަމަށް ބުނެ އެ ބައި އަލުން ހޯދުމަކީ މި ސަރުކާރުގެ ވައުދެކެވެ.

އެ މަސައްކަތް ކުރަމުން އަންނައިރު ރައީސް ޑރ. މުހައްމަދު މުއިއްޒު ވަނީ ޗާގޯސް މޮރިޝަސްއާ ހަވާލުކުރުމަށް ވުރެ އައުލާކަން ބޮޑީ ރާއްޖެއާ ހަވާލުކުރުން ކަމަށް ވިދާޅުވެ އިނގިރޭސި ވިލާތަށް ސިޓީއެއް ވެސް ފޮނުއްވައިފަ އެވެ.