އިޓްލޮސްގެ ނިންމުން ބަލައިނުގަތުމަކީ ރާއްޖެ އަށް ރަނގަޅު ގޮތް: ނަޝީދު

ޗާގޮސްގެ ސިޔާދަތީބާރު ރާއްޖެއިން ދޫކޮށްލައި، މިއަދުގެ ނިންމުމާ އެކު ކަނޑުގެ ސަރަހައްދުން ބައެއް ގެއްލިފައިވާ ކަމަށާއި އެކަން ރާއްޖެ އިން ބަލައިނުގަތުމަކީ އެމަނިކުފާނަށް ފެނިވަޑައިގަންނަވާ އެންމެ ރަނގަޅު ގޮތް. ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު ވިދާޅުވީ އިޓްލޮސްގެ މިއަދުގެ ނިންމުމުގައި ޗާގޮސްގެ ސިޔާދަތީ ބާރު ދޫކޮށްލަން ރާއްޖެއިން އެއްބަސްވެފައިވާ ކަމަށާއި އޭގެ ނަތީޖާ އަކީ ކަނޑުގެ ސަރަހައްދުން ބައެއް ގެއްލުން ކަމަށެވެ.

"ޗާގޮސްގެ އަތޮޅުތަކުގެ ސިޔާދަތީ ބާރު ރާއްޖެއިން ދޫކޮށްލުމުން މިހާރު މި ވަނީ ރާއްޖޭގެ ކަނޑުގެ ސަރަހައްދުން ބައެއް ގެއްލިފަ. އަޅުގަނޑު ދެކޭ ގޮތުގައި މިކަން ބަލައި ނުގަތުމަކީ ރާއްޖެ އަށް ރަނގަޅު ގޮތް،" މާ ބޮޑު ތަފުސީލެއް ދެއްވުމަކާ ނުލައި ނަޝީދު ވިދާޅުވި އެވެ.

ރާއްޖޭގެ ދެކުނު މޮރިޝަސްގެ އުތުރުން ކަނޑުގެ ސަރަހައްދު ގުޅޭ ހިސާބު އިން ކަނޑައެޅުމުގެ މައްސަލާގައި ދެ ގައުމުން ހިޔާލު ތަފާތުވުމުން، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން މިއަދު ނިންމީ ރާއްޖެ އަށް ބޮޑު ބައެއް ލިބޭ ގޮތަށެވެ. ރާއްޖޭގެ ދެކުނު 47،232 އަކަކިލޯމީޓަރުގެ ސަރަހައްދެއް ރާއްޖެ އަށް ލިބެ އެވެ. މޮރިޝަސް އަށް ދޭން ނިންމީ 45،331 އަކަކިލޯ މީޓަރެވެ. އެއީ ކޮންމެ ގައުމަކަށް 200 މޭލުގެ ސަރަހައްދެއް ނެގުމުން ފުށުއަރާ 95،000 އަކަކިލޯމީޓަރަށް ވުރެ ބޮޑު ސަރަހައްދު ބަހާލި ގޮތެވެ. އެކަމަކު އެއީ، ރާއްޖެ އިން ބޭނުންވި ގޮތެވެ. އެކަމަކު މޮރިޝަސް އިން ބޭނުންވި ގޮތެއް ނޫނެވެ.

އިޓްލޮސްގެ މިއަދުގެ ނިންމުމާ އެކު އިދިކޮޅު ބޭފުޅުން ވިދާޅުވަމުން ގެންދަވަނީ ރާއްޖޭގެ ސަރަހައްދުން ބައެއް ގެއްލިއްޖެ ކަމަށެވެ. އެކަމަކު، އެކަން ވީއެހެނެއް ނޫނެވެ.

މޮރިޝަސް އަށް ލިބުނީ ރާއްޖެ އަށް ލިބުނު ކޮންމެ އަކަކިލޯމީޓަރަކަށް 0.960 އަކަކިލޯމީޓަރެވެ.