ކޮރަޕްޝަނަށް އެއްވެސް ފުރުސަތެއް ނުދެއްވާނެކަން ރައީސްގެ ނިންމެވުންތަކުން ސާފުވޭ: އާދަމް ޝަރީފް

ރައީސް ޑރ. މުހައްމަދު މުއިއްޒުގެ ނިންމެވުންތަކުން ކޮރަޕްޝަނަށް އެއްވެސް ފުރުސަތެއް ނުދެއްވާނެ ސާފުވާ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް މިއަދު ވިދާޅުވެއްޖެ އެވެ.

އޭނާ އެހެން ވިދާޅުވީ، ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ގޯތީގެ ރަޖިސްޓްރީއެއް ހަދައިދިން މައްސަލަ ފެންމަތިވެ. ސަރުކާރުން އެ މީހުންނާ ދެކޮޅަށް ފިޔަވަޅުތަކެއް އަޅަން ފެށުމުންނެވެ. ފަޒީލްގެ އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ވަނީ ފަޅާއަރައިފަ އެވެ.

އާދަމް ޝަރީފް ވިދާޅުވީ ކޮރަޕްޝަންގެ އެއްވެސް ފުރުސަތެއް ރައީސް މުއިއްޒުގެ ސަރުކާރުން ނުދޭކަން ރައީސްގެ ނިންމުންތަކުން ސާފުވާނެކަމަށެވެ.

ރާއްޖެއިން ކޮރަޕްޝަން މަދުކުރެވޭނީ، ކޮރަޕްޝަނަށް މަގުފަހިވާ ކަންތައްތަކަށް ކޮންމެ ކަމަކަށް ހުރިހާ މުއައްސަސާތަކުންނާއި ރައްޔިތުން ވެސް ނޫނެކޭ ބުނެގެން ކަމަށާއި އެ ހިތްވަރު އެންމެންގެ ކިބައިގައި ހުންނަން ވާނެ ކަމަށް މިނިސްޓަރު ވިދާޅުވި އެވެ.

ރިޔާސީ އިންތިހާބުގެ ކެމްޕެއިނުގެ ދުވަސްވަރުން ފެށިގެން ވެރިކަށް ލިބިވަޑައިގަތުމަށް ފަހު ވެސް ރައީސް މުއިއްޒު ގެންދަވަނީ ސަރުކާރުން ކޮރަޕްޝަނާއި ދެކޮޅަށް މަސައްކަތް ކުރައްވާނެކަމަށް ވިދާޅުވަމުންނެވެ.

ރިޔާސީ އިންތިހާބުގައި ލިބިވަޑައިގަތް ކާމިޔާބީއާ ގުޅިގެން ޝުކުރު އަދާކުރެއްވުމަށް ބޭއްވެވި ޖަލްސާގައި ރައީސް މުއިއްޒު ވިދާޅުވީ، ކޮރަޕްޝަންގެ އަމަލުތައް ހިންގާ ނަމަ ސަރުކާރުން އިސްވެ އެ ފަރާތްތަކާ ދޭތެރޭގައި އަޅަންޖެހޭ ފިޔަވަޅު އަޅާނެ ކަމަށެވެ.

އަދި ސަރުކާރުގެ ނިޒާމުގެ ތެރޭގައި އެފަދަ ކަންކަން ހިނގުން މަދުކޮށް ސާފު ސަރުކާރެއް ގާއުމުކޮށް ދިނުމަކީ އެ މަނިކުފާނުގެ އަމާޒެއްކަމަށާއި ރައްޔިތުންނަށް ފެންނާނީ ދެފުށް ފެންނަ އެއްވެސް ކަމެއް ނުފޮރުވާ، ޖަވާބުދާރީވުމުގައި ޖެހިލުމެއް ނުވާ ސާފު ސަރުކާރެއްކަމަށް އެ މަނިކުފާނު ވަނީ ވިދާޅުވެފަ އެވެ.

"އަޅުގަނޑު ތިޔަބޭފުޅުންނަށް އަރުވާނެ ޔަގީން ކަމަކީ އިރާދަކުރެއްވިއްޔާ އަޅުގަނޑުމެންގެ ސަރުކާރު ކޮރަޕްޓް ނުވެ ހިންގާނަންކަން. ހަމަ އެެހެންމެ އަޅުގަނޑުމެންގެ ސަރުކާރުގައި އެއްވެސް ފަރާތަކުން އެފަދަ ކަމެއް ހިންގާކަން ސާބިތުވެއްޖެ ހާލަތެއްގައި ނަމަ އެ ފަރާތަކާ މެދުގައި އަޅަންޖެހޭ ގާނޫނީ ފިޔަވަޅު އަޅުގަނޑުމެން ފަސްޖެހުމެއް ނެތި އަޅާނެކަން،" ރައީސް މުއިއްޒު ދާދި ފަހުން ވެސް ވިދާޅުވެފައި ވެ އެވެ.

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވުމުން ފުލުހުން ފެށި ތަހުގީގާ ގުޅިގެން އެޗްޑީސީގެ ޗެއާމަން އަހުމަދު ނާސިފް (ޑީޑީ) ފިޔަވައި، ފަޒުލް ހިމެނޭ ގޮތަށް އެ ކުންފުނީގެ ބޯޑު އެއްކޮށް މިއަދު ވަނީ ސަސްޕެންޑު ވެސް ކޮށްފަ އެވެ. އަދި އެމްޑަބްލިއުއެސްސީގެ ޑީއެމްޑީ ކަމުން ފަޒީލް ވެސް މިއަދު ވަނީ ސަސްޕެންޑުކޮށްފަ އެވެ.

އެ ދެ ބޭފުޅުންގެ އިތުރުން އެޗްޑީސީގެ މެނޭޖުމަންޓުގެ އިސްވެރިންތަކެއް ވެސް މިއަދު ވަނީ ސަސްޕެންޑްކޮށްފަ އެވެ. އެއީ އައިޓީ ކޮންސަލްޓެންޓް އަބްދުﷲ ޝުހޫދާއި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން އެވެ.

ބިންވެރިޔާ ސްކީމްގެ ލިސްޓުގައި ނެތް ބަޔަކަށް ގޯތި ދިން މައްސަލަ ފަޅާއެރުމުން ފުލުހުންނާއި އޭސީސީ ގުޅިގެން ވަނީ ބޮޑު ތަހުގީގެއް މިހާރު ފަށައިފަ އެވެ. އަދި ބިންވެރިޔާ ސްކީމާއި ގެދޮރުވެރިޔާ ސްކީމާ ގުޅޭ ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް އައްބާސް ޝަރީފް ވަނީ ފުލުހުންނާއި އޭސީސީ އަށް މިއަދު އަމުރު ކުރައްވައިފަ އެވެ.