ނުފޫޒު ބޭނުންކޮށްގެން ބިންތަކެއް ދޫކުރި އެޗްޑީސީގެ އިސް މުވައްޒަފަކު ސަސްޕެންޑުކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބިންތަކެއް މަގާމުގެ ނުފޫޒު ބޭނުންކޮށްގެން ދޫކުރި ކަމުގެ ތުހުމަތުގައި އެ ކުންފުނީގެ އިސް މުވައްޒަފަކު މިއަދު ސަސްޕެންޑުކޮށްފި އެވެ.

"މިހާރު" އަށް އެނގިފައިވާ ގޮތުގައި އެ އަންހެން މުވައްޒަފު ސަސްޕެންޑުކުރީ މަގާމުގެ ނުފޫޒު ބޭނުންކޮށްގެން ހުޅުމާލެ އަދި ތިލަފުށިން ބިންތަކެއް ދޫކުރި މައްސަލައެއްގަ އެވެ.

އޭނާއާ ގުޅޭ މައްސަލަތަކެއް އޭސީސީން ވެސް ބަލަމުން އަންނަ ކަމަށް މައުލޫމާތު އެނގިވަޑައިގަންނަވާ ބޭފުޅަކު ވިދާޅުވި އެވެ.

ނަމަވެސް އެ މުވައްޒަފު ސަސްޕެންޑު ކުރަންޖެހުނު މައްސަލައިގެ އިތުރު ތަފްސީލެއް ހާމަކޮށްފައެއް ނުވެ އެވެ.

މިހާރު ގެ މެނޭޖިން ޑިރެކްޓަރު އަލީ ޒުހައިރު މަގާމާ ހަވާލުވެވަޑައިގެންނެވިތާ ކުރީކޮޅު އެޗްޑީސީގެ ބައެއް ޑިޕާޓްމަންޓުތަކުގެ ވެރިން އެ މީހުންގެ މަގާމުގެ ޒިންމާތަކުން އެކަހެރި ކުރި އެވެ. އަދި މިހާރު ވަނީ އެ ފަސް ވެރިން އެހެން ޑިޕާޓުމަންޓުތަކަށް ބަދަލުކޮށްފަ އެވެ.

ގެދޮރުވެރިޔާ/ބިންވެރިޔާ ސްކީމާ ގުޅޭ ކޮރަޕްޝަންގެ މައްސަލަތަކެއް ފެންމަތިވުމާ އެކު، އެޗްޑީސީގެ މުވައްޒަފުންތަކެއް މިދިޔަ އަހަރުގެ ޑިސެމްބަރު މަހު ވެސް ސަސްޕެންޑުކުރި އެވެ.

އެ މައްސަލައާ ގުޅިގެން 17 މީހަކު ސަސްޕެންޑުކޮށް، އޭގެ ތެރެއިން ތިން މީހަކު ވަޒީފާއިން ވަކިކޮށްފައިވާއިރު އެކަކު އަމިއްލައަށް ވަކިވެފައިވާ ކަމަށް އެޗްޑީސީން ބުންޏެވެ.

ބާކީ 13 މީހުންގެ ސަސްޕެންޝަން އުވާލުމުން މިހާރު އަނބުރާ މަސައްކަތަށް ނުކުންނަން ފަށާފައިވަނީ މިދިޔަ އޭޕްރީލް މަހުގެ ތެރޭގަ އެވެ. އަދި ބައެއް މީހުން މަގާމުން ވަކިކުރުމުގެ ލޭބަ ޓްރައިބިއުނަލަށް ގޮސް މައްސަލަ ވަނީ ކާމިޔާބު ކޮށްފަ އެވެ.