ހުރިހާ ތައްޓަކަށް ވާދަކުރަން ބޭނުން: ސްލޮޓް

ސީޒަނުގެ ހުރިހާ ތައްޓަކަށް ވާދަކުރަން ލިވަޕޫލުން ބޭނުންވާ ކަމަށް އެ ޓީމުގެ ކޯޗު އާން ސްލޮޓް ބުނެފި އެވެ.

ލިވަޕޫލް އޮތީ ޕްރިމިއާ ލީގާއި ޗެމްޕިއަންސް ލީގުގައި ވެސް މި ވަގުތު އެއް ވަނައިގަ އެވެ. އަނެއްކޮޅުން ރޭ ވަނީ ސައުތުހެމްޓަން 2-1 އިން ބަލިކޮށް އިނގިރޭސި ލީގު ކަޕުގެ ސެމީ ފައިނަލުން ޖާގަ ހޯދައިފަ އެވެ.

ގިނަ ބަޔަކު ހީކޮށްގެން ތިބީ ޔާގެން ކްލޮޕް ލިވަޕޫލް ދޫކޮށްލުމުން އުފެދުނު ބާގަނޑު، ސްލޮޓް އަށް އެންމެ ސީޒަނަކުން ބައްދާނުލެވޭނެ ކަމަށެވެ. އެކަމަކު ސްލޮޓް އަންނަނީ ފުރަތަމަ ސީޒަނުގައި ވެސް ރަނގަޅު ނަތީޖާތަކެއް ނެރުމުގެ އިތުރުން މޮޅަށް ކުޅުވަމުންނެވެ.

ކާޑު ހަމަވުމުގެ ސަބަބުން ލިބުނު ސަސްޕެންޝަނަކާ ގުޅިގެން ރޭގެ މެޗުގައި ބެންޗުގައި ނުހުރެވުނު ނަމަވެސް އޭނާ ވަނީ މެޗަށް ފަހު މީޑިއާ އަށް އިންޓަވިއުދީފަ އެވެ. އޭނާ ބުނީ މިދިޔަ އަހަރު ލީގު ކަޕް ކާމިޔާބު ކޮށްފައިވުމުން، މި އަހަރު އެ ތަށި ދިފާއު ކުރުން އޭނާ އަށް ވަރަށް މުހިންމު ކަމަށެވެ.

"އަހަރެމެން ޖެހޭނެ މި ތަށި ދިފާއު ކުރަން. ސަބަބަކީ މިދިޔަ އަހަރު ވެސް މި ތަށި ހޯދާފައިވުން. އަނެއްކޮޅުން އަހަރެން ބޭނުން ހުރިހާ ތައްޓަކަށް ވާދަކުރަން. މިއީ އޭގެ ތެރެއިން އެއް ތަށި. އަހަރެމެން ސެމީ ފައިނަލަށް ދިއުމުން މިތިބީ ހިތްހަމަޖެހިފައި،" ޕްރެސް ރޫމްގައި ހުރެ މެޗު ބެލި ސްލޮޓް ބުންޏެވެ.

ސައުތުހެމްޓަންގެ ސްޓޭޑިއަމުގައި ކުޅުނު މި މެޗުގެ ފުރަތަމަ ހާފުގައި ލިވަޕޫލުން ވަނީ ދެ ގޯލު ޖަހައިފަ އެވެ. އެ ޓީމަށް ގޯލުތައް ޖަހައިދިނީ ޑާވިން ނޫނޭޒް އާއި ހާވޭ އެލިއޮޓް އެވެ. ސައުތުހެމްޓަން އިން ތަފާތުކުޑަކުރީ ދެ ވަނަ ހާފުގަ އެވެ.