ސްޓެލްކޯގެ ރިސާޗް ފައުންޑޭޝަން އިފްތިތާހުކޮށް، ކަނޑުއަޑީގެ ޑްރޯން މަޝްރޫއު ފަށައިފި

ސްޓެލްކޯގައި މަސައްކަތްކުރާ ތައުލީމީ ގާބިލު މުވައްޒަފުންގެ ބޭނުން އެންމެ އެކަށީގެންވާ ގޮތަށް ހިފުމަށް، އެ ކުންފުނީގެ ރިސާޗް ފައުންޑޭޝަން މިއަދު އިފްތިތާހުކޮށްފި އެވެ.

ސްޓެލްކޯއިން ބުނީ އެ ކުންފުނީގައި މަސައްކަތްކުރާ ތައުލީމީ ގާބިލް ޒުވާނުންގެ އިލްމުގެ ބޭނުން އެ ކުންފުންޏަށާއި ގައުމަށް އެންމެ ފައިދާހުރި ގޮތެއްގައި ހިފުމަށްޓަކައި އީޖާދީ އާ ވިސްނުންތަކާއި ތަސައްވުރުތަކަކާއެކު ސްޓެލްކޯ ރިސާޗް ފައުންޑޭޝަން (އެސްއާރުއެފް) މިއަދު އިފްތިތާހު ކޮށްފައިވާ ކަމަށެވެ.

މި ފައުންޑޭޝަން އިފްތިތާހު ކޮށްދެއްވުމަށްފަހު އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ވަނީ ގައުމަށް ކުރިއެރުން ގެންނަން ބޭނުންވެފައި ތިބި ތައުލީމީ އަދި އީޖާދީ ވިސްނުމުގެ ޒުވާނުންނާއި ދިރާސާކުރާ ފަރާތްތަކުން ސްޓެލްކޯގެ ދިރާސާގެ މަސައްކަތުގައި ބައިވެރިވުމަށް ދައުވަތު އަރުވައިފަ އެވެ.

މީގެ އިތުރުން ސްޓެލްކޯއިން މިއަދު ވަނީ އެ ކުންފުނީގެ އެންމެ ފަހުގެ މަޝްރޫއު ކަމަށްވާ، އަންމޭންޑް ސަބްމާސިބަލް ވެހިކަލް (ޔޫއެސްވީ) މަޝްރޫއު އިއުލާންކޮށްފަ އެވެ.

ފަހުމީ ވިދާޅުވި ގޮތުގައި، ކަނޑުއަޑީގައި ބޭނުން ކުރެވޭ މި ޑްރޯން ފަރުމާކޮށްފައިވަނީ ކަނޑު އަޑީގައި އިންސާނުން ދާން ދަތި ސަރަހައްދުތައް ހޯދައި، މޮނިޓާކުރުމުގެ އިތުރުން ކަނޑާބެހޭ މައުލޫމާތު އެއްކޮށް، ތިމާވެށި ހިމާޔަތްކުރުމުގެ މަސައްކަތްތަކަށް އެހީތެރިވުމަށެވެ. އަދި މުސްތަގުބަލުގައި ގައުމަށް ފައިދާކުރާ މިފަދަ އެތައް މަޝްރޫއުތަކެއް މި ފައުންޑޭޝަންގެ ތެރެއިން ގެނެސްދެވޭނެ ކަމުގެ ޔަގީންކަން ވެސް އޭނާ ދެއްވި އެވެ.

ފާއިތުވި އަހަރެއްހާ ދުވަހުގެ ތެރޭގައި ރައްޔިތުންނަށް ދެމުންދާ ހިދުމަތްތަކުގެ ފެންވަރު ޒަމާނާ އެއްގޮތަށް ކުރިއަށް ގެންދަން ގިނަ މަސައްކަތްތަކެއް ސްޓެލްކޯއިން ވަނީ ކޮށްފަ އެވެ. އެގޮތުން އިލެކްޓްރިކް ވެހިކަލްތައް ޗާޖު ކުރެވޭ ގޮތަށް ޗާޖިން ސްޓޭޝަނެއް ގާއިމް ކުރުމާއި ކަނޑުގެ ރާޅުން ހަކަތަ އުފެއްދުމުގެ ދިރާސާއަކާއި މުވައްޒަފުން ތަމްރީނު ކުރުން އިތުރަށް ފުޅާކުރުން ފަދަ ގިނަ މަސައްކަތްތަކެއް ވަނީ ރާވައިފަ އެވެ.